Mulai sian i Gabe Lam Jahat do Pangalaho ni Jolma

MENURUT hamu, mulai nandigan ma lam roa jala lam jahat pangalaho ni jolma? Mulai sian jamanmuna do manang mulai sian jaman ni akka donganmuna, manang sian mulai jaman ni akka halak na uttua sian hamu? Adong piga-piga na mandok, dung masa Porang Dunia I taon 1914, lam roa manang lam jahat ma pangalaho ni akka jolma. Professor sejarah si Robert Wohl manurat di bukkuna na marjudul The Generation of 1914, “Dang boi lupa akka halak na selamat sian porang i, molo jaman na parjolo i nungnga salpu be jala ro nama jaman na asing. Di mulai ma i, di bulan Agustus 1914.”

Sahalak sejarawan na margoar si Norman Cantor mandok, “Manang didia pe, nga lam jahat be jala nga lam roa be pangalaho ni halak saonari on. Songon tu akka binatang na lao diseat do dibahen akka politikus dohot jenderal tu marjuta halak. Jadi dang adong be manang ise na boi mangambati akka halak asa unang memperlakukan akka donganna songon binatang. . . . Saleleng Porang Dunia I [1914-18] hira na so mararga do ngolu ni jolma.”

Sahalak sejarawan Inggris na margoar si H. G. Wells mandok di karyana na marjudul The Outline of History, dung berterima teori evolusi di akka halak, “gabe lam roa jala lam jahat do pangalaho ni akka jolma”. Boasa boi songon i? Alana adong piga-piga na mandok, holan otik do umtimbo derajat ni jolma sian binatang. Di taon 1920, sahalak evolusionis na margoar si Wells manurat, “Didok roha ni nasida, molo jolma sarupa do songon biang parburu sian India . . . , jadi dang sala molo sahalak na umgogo manang na lebih berkuasa menindas jala mambahen na kejam tu akka halak na lebih lemah.”

Songon na didok si Cantor, dukkon Porang Dunia I gabe muba do pandangan ni akka halak taringot aha na sittong dohot na sala. Didok ibana muse, “Molo akka halak naung matua, sala do sude akka na diulahon nasida di bidang politik, cara marpakkean, dohot aturan taringot seks.” Didukung akka gareja do ajaran taringot evolusi, jala dijujui nasida do akka halak asa dohot marporang. Jala dohot do muse nasida berperan mambahen asa lam jahat pangalaho ni halak. Sahalak Brigadir Jenderal Inggris na margoar si Frank Crozier mandok, “Dipakke hami do akka Gareja-Gareja lao mendukung hami asa semangat hami lao mambunu akka jolma.”

Lam Roa Pangalaho ni Jolma

Di taon 1920-an, lam roa do pangalaho ni jolma jala hidup bebas. Sejarawan Frederick Lewis Allen mandok, “Sappulu taon dukkon Porang Dunia I, boi ma didok taon i, i ma taon pangalaho ni jolma na massai roa. . . . Dang diboto halak be mambedahon dia na denggan dia na roa.”

Taon 1930-an, masa ma Depresi Hebat di dunia. Lam sadar ma akka jolma, alana lam susa do ngolu ni jolma ala lam marpogos. Piga-piga taon dukkon i, masa ma porang na upparah, i ma Porang Dunia II. Godang ma akka bangso mambahen senjata na canggih jala lam denggan do ekonomi ni akka negara di tikki i. Alai, lam susa do ngolu ni jolma di tikki i alani porang i. Dung sae porang i, marratus kota na hancur. Adong ma dua kota di Jepang na hancur ala dibom atom. Jala marjuta akka halak mate di kamp konsentrasi. Jadi alani porang i, adong ma hira-hira 50 juta halak na mate.

Saleleng Porang Dunia II, gabe lam tamba do muse roa ni pangalaho ni jolma jala naeng hidup bebas. Bukku Love, Sex and War—Changing Values, 1939-45 mandok, “Saleleng porang i, nga dianggap biasa mangulahon seks bebas. Alani i, gabe dohot do masyarakat biasa menganggap mangulahon seks bebas i hal na biasa. . . . Akibatna, dang dianggap nasida be perkawinan gabe hal na serius.”

Ala boi do toppu halak mate di tikki i alani porang. Gabe dilului halak ma cara lao mandapot holong ni roha sian halak na asing, nang pe holan satokkin i boi dihilala nasida. Contohna adong sahalak ina di Inggris, dianggap ibana do molo saleleng masa porang i dang sala mangulahon seks bebas. Didok ibana, “Dang ala na roa pangalahonami umbahen na diulahon hami seks bebas. Alai ala ni porang on do.” Asing ni i, adong sahalak tentara ni Amerika mandok, “Menurut akka halak, roa do pangalahonami ala mangulahon seks bebas. Alai diulahon hami pe i, ala poso dope hami jala boi do hami mate sogot.”

Godang do halak na selamat sian porang i na gabe depresi. Adong do piga-piga halak na trauma termasuk ma na dakdanak dope nasida di tikki i jala jotjot mangingot kejadian i. Alani i, gabe mabiar nasida masa muse sisongon i. Godang do na gabe mago haporseaonna jala dang mabiar be nasida mangulahon na jahat. Dang parduli be akka halak tu aturan na dibahen taringot aha na denggan dohot na roa.

Akka Aturan na Baru

Dung Porang Dunia II, adong dipaboa akka hasil penelitian taringot kebiasaan seks ni akka jolma. Sada sian penelitian i, i ma Laporan Kinsey na di Amerika Serikat taon 1940-an. Jala tebal ni laporan i adong sahat tu 800 halaman. Alani i, dang maila be akka halak makkatai taringot seks, gabe hal na biasa nama i. Nang pe laporan taringot homoseksual dohot akka seks na asing adong na ditamba-tambai, alai sian laporan i patuduhon na lam roa do pangalaho ni halak dung masa porang i.

Saleleng piga-piga taon, berupaya do halak asa songon na denggan diida pangalahona. Contohna, disensor do akka adegan na roa di acara radio, film, dohot TV. Alai dang leleng i masa. Si William Bennett, sahalak mantan sekretaris pendidikan mandok, “Di taon 1960-an, di Amerika mulai ma lam roa pangalaho ni jolma jala dang adong be adat ni jolma di tikki i.” Jala gabe godang do muse akka negara na asing na mangulahon songon i. Boasa lam tamba roa ni pangalaho ni jolma di taon 60-an?

Di taon i, adong ma masa gerakan emansipasi wanita dohot revolusi seks. Asing ni i, lam godang do muse dibahen pil KB. Gabe godang ma halak na mangulahon “seks bebas” dang pola mabiar hamil. Alani i, “gabe godang ma halak na mangulahon seks dang pola ikkon menikah”.

Jadi di tikki i, dibahen do di media, di film, dohot di TV akka adegan na roa. Si Zbigniew Brzezinski, mantan kepala Dewan Keamanan Amerika Serikat paboahon songon dia akka acara na diputarhon di TV. Didok ibana, “Jelas-jelas do diputarhon di TV akka adegan pelampiasan nafsu, kekerasan, kekejaman, [dohot] seks bebas.”

Di toan 1970-an, mulai ma adong akka video. Nga boi be akka halak manonton film porno di jabuna sandiri. Alana maila do nasida molo manonton sisongon i di bioskop. Dukkon i, melalui internet nga boi be akka halak manonton film porno molo adong komputerna.

Alani i gabe lam parah do akibatna. Sahalak sipir di penjara di Amerika Serikat mandok, “Sappulu taon naung salpu, molo adong anak muda jalanan na masuk penjara, boi dope diattusi nasida molo hupaboa taringot aha na denggan dohot na sala. Alai saonari, molo adong akka anak jalanan na masuk penjara, dang diattusi nasida be aha na hudok.”

Didia do Boi Dapotta Petunjuk?

Dang boi tadapot akka petunjuk na denggan sian gareja. Alana nasida sandiri pe, dang diulahon songon na diulahon Jesus dohot akka siseanna di tikki abad na parjolo. Alai diihutton akka gareja on do akka pangalaho ni halak di portibi on jala diulahon nasida do akka na jahat. Contohna taringot marporang, sahalak penulis mandok, “Tiap marporang, sude do halak mandok na diurupi Debata nasida.” Jadi songon dia do taringot pangalaho? Piga-piga taon naung salpu, adong sahalak klerus di New York City mandok, “Unggodang do peraturan na ikkon taihutton molo naeng masuk tu bus dibandikkon molo naeng gabe anggota ni sada gareja.”

Takkas ma, nga lam jahat jala lam roa pangalaho ni akka jolma di portibi on. Jala dang boi be i dipasombu. Alani i, aha ma na ikkon diulahon? Aha ma na ikkon dipadenggan? Jala ise ma na lao padenggatton i? Jala songon dia do i annon boi saut?

[Kutipan]

“Saleleng Porang Dunia I [1914-18] hira na so mararga do ngolu ni jolma”

[Gambar]

Lam mura do mandapot akka hiburan na roa