Le persone no le pensa pi in quel che l’è giusto o sbalià

QUANDO le persone le ga scominsià a pensar e a far de pi robe sbaliade? Te pensi che l’è stà adesso, o sti ani indrio? Arquanti i dise che l’è stà dopo dela Prima Guera Mondial, in 1914, che le persone le ga scominsià a pensar e a far de pi robe sbaliade. Nel so libro The Generation of 1914 (Quei che i ga vivesto in 1914), el maestro de Stòria Robert Wohl el ga scrito: “Le persone che le ga vivesto nela època dela Prima Guera Mondial le ga sentio come se gavesse scominsià nantro mondo in agosto de 1914.”

El studioso Norman Cantor el ga dito: “Vanti dela Prima Guera Mondial, le persone belche le era drio far tante robe sbaliade, ma dopo dela Guera, l’è restà ancora pedo. I governanti e quei che i gavea autorità i gavea de tender e proteger le persone, ma i era drio tratarle come se le fusse bèstie che le saria copade. Se lori i era drio far questo, gnente podaria fermarle de tratar una al’altra come bèstie. Par causa de tuti quei che i ze stati copadi nela Prima Guera Mondial (1914-1918), le persone no le dea pi valor ala vita.”

Nel libro La Stòria Universal, el studioso Herbert George Wells el ga dito che dopo che le persone le ga scominsià a creder che semo vegnesti del macaco e che no l’è stà Dio che el ga creà tute le robe, le ga scominsià a tratar un al’altra ancora pedo. Arquanti i pensea che el omo l’è sol una bèstia un poco de pi furba che le altre. Wells, che el credea in questa idea, el ga scrito in 1920: “Le persone le ga dessidio che el omo l’è una bèstia che la vive insieme con altre, come un can. . . . Alora, saria giusto che i can pi poderosi i tratesse mal e i comandesse i altri.”

El studioso Cantor el ga dito che dopo dela Prima Guera Mondial, le persone no le savea pi quel che l’era giusto e quel che l’era sbalià. Quei pi gióveni no i ghe badea pi quel che i pi veci i pensea sora governar, le robe de meter su e el sesso. Le ciese le ga giutà le persone a pensar cossita parché le ga acetà che el omo l’era vegnesto del macaco e le incoraiea i esersiti nela guera. El comandante del esèrsito, Frank Crozier, el ga scrito: “Le ciese cristiane le ze drio incoraiar tanto le persone a copar e a far violensa, e lore le ze drio doperar queste ciese come scusa par far queste robe.”

Le persone le se ga fermà de far quel che l’era giusto

Nei dise ani dopo dela Prima Guera Mondial, le persone le pensea sol in goder la vita, anca se le gavesse pena infrontà una guera. Quele persone no le pensea pi in quel che l’era giusto o sbalià. Lore le fea tute le robe che le volea. El studioso Frederick Allen el ga parlà: “Podemo dir che nei diese ani dopo dela guera, le persone le ga fato tante robe sbaliade. Dopo dela guera, le persone le se ga fermà de pensar in quel che l’è bon e giusto nela vita, e le ga seità pensar cossita.”

Nei ani 1930, tuto el mondo el ga sofrio par causa de un bruto problema econòmico. Tante persone le ze restade tanto poarete e le ga patio fin la fame. Par quela, tanti i ga scominsià a pensar in cossa i era drio far nela so vita. Ma, nel fin dei ani de 1930, ga scominsià la Seconda Guera Mondial, che la ze stata ancora pi bruta che la prima. I paesi i ga scominsià a far arme che le podaria copar tante persone. Alora, i paesi i ze stati boni de dàrghene fora con quel bruto problema econòmico, ma i ga scominsià a sofrir tanto par causa de questa guera, che la ze stata pi bruta de quel che se podea imaginar. Par causa dela Seconda Guera Mondial, tante cità le ze state finide fora. Par esémpio, due cità nel Giapon le ze state finide fora par causa de una bomba. Milioni de persone anca le ze state morte nei campi dei nasisti. Par causa dela Seconda Guera Mondial, intorno de 50 milioni de òmini, done e tosatei i ze stati morti.

Nela Seconda Guera Mondial, le persone le ga scominsià a far tuto quel che le volea invesse de far quel che l’era giusto. El libro Love, Sex and War — Changing Values, 1939-​45 (Amor, Sesso e Guera — Le persone le ga cambià, 1939 – 1945) el ga dito: “Nela guera, le persone le pensea che le podea far sesso con chi che lore le volesse, ma le persone che no le era nela guera anca le ga scominsià a pensar cossita. Anca dopo dela guera, le persone le ga seità a pensar de questa maniera e a dar poco valor ala vita.”

Come le persone le savea che presto le podaria morir, lore le gavea tanta voia de restar insieme con qualchedun e passionarse, anca che fusse par poco tempo. Una dona dela Gran-Bretagna la pensea che ghen’era scusa par far sesso con chi che la volesse. Ela la ga dito: “No podemo dir che èrino drio far robe sbaliade parché èrino nte una guera.” Un soldà dei Stati Unidi anca el ga dito: “Quasi tute le persone in quela època le pensea che èrino drio far robe tanto sbaliade, ma èrino gióveni e podeino morir nel giorno dopo.”

Tanti de quei che no i ze morti nela guera ancora i sofre tanto par causa dele robe che i ga visto. Lori i sofre fin ancoi parché i se ricorda dele robe che i ga infrontà, e ghe par che i ze nela guera nantra volta. Tanti no i ga pi fede e no i sa pi quel che l’è giusto o sbalià. Alora, come i crede che no ghen’è pi nissun par dirghe quel che l’è giusto e quel che l’è sbalià, i fà tuto quel che i vol.

Le persone le ga cambià quel che le pensea sora el sesso

Dopo dela Seconda Guera Mondial, studiosi i ga scominsià a proar capir cossa le persone le pensea sora el sesso. Un dei studi l’è stà fato nei ani 1940 nei Stati Unidi. El nome de questo stùdio l’era Kinsey e el gavea de pi de 800 pàgine. Dopo de questo, le persone no le gavea pi vergogna de parlar sora sesso. Quel stùdio el ga anca parlà che i òmini i era drio far sesso con altri òmini e che le done le era drio far sesso con altre done, e che le persone l’era drio far sesso de brute maniere. Anca che le persone le pensesse che quel che el stùdio el disea no l’era pròpio giusto, el ga mostrà che lore le era drio far tante robe sbaliade.

Le persone le fea finta che le era drio far quel che l’era giusto e polito. Par esémpio, lore no le podea parlar sora sesso e altre robe sbaliade nel ràdio, nel sinema e nela television. Ma dopo de un tempo, questo ga cambià tanto. William Bennett, che l’era una autorità del governo dei Stati Unidi, el ga dito: “Nei ani de 1960, le persone le ga scominsià a far robe cada volta pi sbaliade e no le se ga pi fermà. Lore le ga scominsià a far robe de gnanca creder.” Questo el ga anca sucedesto in altri posti. Parché che questo ga scominsià a suceder dopo dei ani 1960?

Le done le ga scominsià a esser pi lìbere par far tuto quel che le volea e le persone le ga cambià tanto quel che le pensea sora el sesso. Par causa de un rimèdio che i ga fato, le persone le ga scominsià a far sesso con tuti quei che le volesse sensa preocuparse in comprar fioi.

In quela època, le persone le ga scominsià a parlar robe che vanti no le parlea mia anca nela television. Zbigniew Brzezinski, che l’era una autorità dei governi dei Stati Unidi, el ga dito sora quel che le persone le era drio mostrar nela television: “Lore le parla che tuti i ga de far quel che ghe piase a lori, che i ze lìberi par far sesso con quei che i vol e che la violensa no la ze tanto bruta cossita.”

Nei ani 1970, le persone le ga scominsià a doperar tanto le fite cassete. Alora, le persone le podea vardar vìdei de sesso casa. Cossita, lore no le gavea pi vergogna de veder quele robe lì parché nissun ndaria saverlo. Ancoi, par causa dela internet, tuti quei che i vol i pol vardar vìdei de sesso.

Adesso, vedemo tante robe brute suceder. Un omo, che el comanda una preson nei Stati Unidi, el ga dito: “Diese ani indrio, mi ero bon de parlar sora quel che l’è giusto o sbalià coi gióveni che i vegnea qua. Ma ancoi, lori gnanca i capisse cossa che vol dir queste robe.”

Ndove podemo catar aiuto?

Invesse dele ciese ndar drio a Gesù e ai so primi dissìpoli, lore le va drio a quel che le persone le fà de sbalià. Alora, le ciese no le ze bone de dir quel che l’è giusto o quel che l’è sbalià. Un scritor el ga dito: “In tute le guere, le persone le ga dito che Dio l’era drio giutar tuti i esèrsiti.” Un lìder de una ciesa in Nova York el ga dito: “Una persona la ga de far manco robe par far parte de una ciesa che par ndar rento un ònibus.”

Semo sicuri che le robe le ze drio restar cada volta pedo. Alora, tuti i vede che qualcossa ghe toca cambiar. Cossa ghe toca cambiar? Chi che pol farlo, e come farlo?

[Comentàrio]

“Tanti i ze stati copadi nela Prima Guera Mondial (1914-1918). Par quela, le persone no le dea pi valor ala vita”

[Stampa]

Ancoi, l’è cada volta pi fàcile veder robe sbaliade