Determinadong Madato sa Espirituwal

ARON madato, gikinahanglan ang hugot nga paningkamot ug sakripisyo. Mao usab kini ang gikinahanglan aron mahimong dato sa espirituwal. Gipakita kini ni Jesus sa dihang siya miingon: “Pagtigom kamo ug mga bahandi alang kaninyo sa langit.” (Mateo 6:20) Ang espirituwal nga bahandi dili modaghan lang ug iya. Ang tawo dili malantaw nga dato sa espirituwal tungod lang kay duna siyay relihiyon ug sa samang paagi ang tawo dili malantaw nga dato sa materyal tungod lang kay duna siyay deposito sa bangko. Ang pag-ugmad ug suod nga relasyon uban sa Diyos, pag-uswag ingong espirituwal nga tawo, ug ang pagkahimong dato sa espirituwal nga mga hiyas nagkinahanglan ug determinasyon, panahon, hugot nga paningkamot, ug sakripisyo.—Proverbio 2:1-6.

Mahimo Bang Mabatonan Nimo Kining Duha?

Dili ba puwede nga mahimong dato sa espirituwal ug sa samang higayon dato usab sa materyal? Mahimo tingali, apan usa lang niini ang maagpas sa malamposong paagi. Si Jesus miingon: “Dili kamo mahimong ulipon sa Diyos ug sa Bahandi.” (Mateo 6:24) Nganong dili man? Tungod kay ang pagpangagpas ug espirituwal nga bahandi kaatbang sa pagpangagpas ug materyal nga bahandi. Kining duha ka pagpangagpas makababag sa usag usa. Busa, sa wala pa sugoa ni Jesus ang iyang mga tinun-an sa pagtigom ug espirituwal nga bahandi, siya miingon: “Hunong na kamo sa pagtigom ug mga bahandi alang kaninyo dinhi sa yuta.”—Mateo 6:19.

Unsay mahitabo kon ang usa dili manumbaling sa tambag ni Jesus ug pangagpason niyag dungan kining duha? Si Jesus miingon: “Walay usa nga mahimong ulipon sa duha ka agalon; kay mahimong dumtan niya ang usa ug higugmaon ang lain, o unongan niya ang usa ug tamayon ang lain.” (Mateo 6:24a) Kon iyang dunganon kini pagpangagpas, nan ang espirituwal nga mga butang mahimo na hinuong babag bisag iya pa kining gitagad ingong obligasyon. Imbes mosalig sa Diyos, basin mosalig na siya sa salapi ug sa kon unsay mapalit niini ingong pangunang paagi sa pagsulbad sa mga problema sa kinabuhi. Sama kini sa giingon ni Jesus: “Kon hain gani ang imong bahandi, atua usab didto ang imong kasingkasing.”—Mateo 6:21.

Angayng palandongon pag-ayo sa matag Kristohanon ang maong tambag sa Bibliya sa dili pa modesidir kon asa niya isentro ang iyang panahon, pagtagad, ug iyang kasingkasing. Kay wala man magtakda ang Diyos ug espesipikong limitasyon kon unsa ka daghan ang angayng tigomon sa usa ka Kristohanon, kini wala magpasabot nga wala na siyay maagoman nga silot kon iyang lapason ang mga pasidaan sa Diyos batok sa kadalo. (1 Corinto 6:9, 10) Sumala sa ato nang nasayran, kadtong dili mamati sa tambag sa Bibliya ug maningkamot nga madato mag-antos sa espirituwal, mental, ug emosyonal. (Galacia 6:7) Sa kasukwahi, si Jesus miingon nga kadtong mahunahunaon sa ilang espirituwal nga mga panginahanglan magmalipayon. (Mateo 5:3) Sa walay duhaduha, ang atong Maglalalang ug ang iyang Anak nahibalo kon unsay labing maayo ug makapalipay kanato!—Isaias 48:17, 18.

Usa ka Desisyon nga Dili Nimo Basolan

Unsay imong hatagag linaing pagtagad, ang Diyos o bahandi? Siyempre, kinahanglang atong hatagan  ug pagtagad ang atong materyal nga mga panginahanglan. Sa iyang unang sulat kang Timoteo, si apostol Pablo miingon: “Tino nga kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.” Apan, gidasig usab ni Pablo ang mga Kristohanon sa pagsalig, dili sa salapi, kondili sa Diyos ug “nga magmadato sa maayong mga buhat.” (1 Timoteo 5:8; 6:17, 18) Unsay imong hatagag hugot nga pagtagad? Unsay imong pangagpason? Sa tanang maayong mga buhat nga gihisgotan ni Pablo, nanguna ang buluhatong pagsangyaw ug paghimog tinun-an nga gisugo ni Jesus nga buhaton sa iyang mga tinun-an. (Mateo 28:19, 20) Sa dihang himoong simple sa mga Kristohanon ang ilang kinabuhi, dili lang aron makarelaks ug maglipaylipay sa kinabuhi kondili aron makapakigbahin pag dugang niining hinungdanong buluhaton, sila “maampingong magtipig alang sa ilang kaugalingon ug usa ka maayong patukoranan alang sa umalabot” diha sa bag-ong kalibotan nga gisaad sa Diyos. Ug bisan karon ilang makita nga ang espirituwal nga bahandi ‘pagkalabing-maayo kay sa bulawan!’—1 Timoteo 6:19; Proverbio 16:16; Filipos 1:10.

Tagda ang kasinatian ni Eddie, kansang pamilya nahimong mga Saksi ni Jehova sa bata pa siya. Dihay higayon nga ang iyang pamilya napildihan sa tanan nilang katigayonan ug napugos sa paghawa sa ilang balay. Si Eddie miingon: “Kaniadto nabalaka kaayo ako kon unsay mahitabo kanamo kon moabot ang panahon nga kami wala na unyay mahikap bisag diyot. Aw, nianang higayona kami wala gayoy kuwarta bisag diyot. Ug nahibalo ka ba kon unsay nahitabo? Wala! Kami nakakaon, nakainom, ug nakabesti gihapon. Si Jehova nagtagana sa among panginahanglan, ug sa ngadto-ngadto nakabangon ra kami gikan sa kalisod sa panalapi. Kini nga kasinatian nagtudlo kanako sa pagpakitag bug-os nga pagtuo sa gisaad ni Jesus sa Mateo 6:33—nga kon atong unahon ang Gingharian sa Diyos sa atong kinabuhi, dili gayod kita angayng mabalaka sa atong materyal nga mga panginahanglan.” Karon si Eddie nag-alagad ingong bug-os-panahon nga nagapanawng ministro uban sa iyang asawa. Sila wala magkulang sa ilang materyal nga panginahanglan. Labaw sa tanan, sila dato sa espirituwal.

Dili Masukod nga mga Benepisyo

Dili sama sa mga bahandi sa yuta, nga makawat sa mga kawatan, ang espirituwal nga bahandi dili makawat. (Proverbio 23:4, 5; Mateo 6:20) Tinuod nga mas lisod sukdon ang espirituwal nga pag-uswag kay ang sukod sa imong pag-uswag sa gugma, kalipay, o pagtuo dili dayon makita, dili sama sa imong pag-asenso sa pinansiyal. Apan ang ganti sa espirituwal nga bahandi dili masukod. Naghisgot bahin sa mga tinun-an nga andam mobiya bisan sa ilang mga balay ug kaumahan ug sa ilang panginabuhian alang sa espirituwal nga mga butang, si Jesus miingon: “Sa pagkatinuod ako magaingon kaninyo, Walay usa nga nagbiya ug balay o mga igsoong lalaki o mga igsoong babaye o inahan o amahan o mga anak o kaumahan tungod kanako ug tungod sa maayong balita nga dili makabaton ug usa ka gatos ka pilo karon niining yugtoa sa panahon, sa mga balay ug mga igsoong lalaki ug mga igsoong babaye ug mga inahan ug mga anak ug kaumahan, uban ang mga paglutos, ug sa umaabot nga sistema sa mga butang sa kinabuhing walay kataposan.”—Marcos 10:29, 30.

Unsay imong unahon sa imong kinabuhi? Ang Diyos o bahandi?

[Mga hulagway sa panid 8, 9]

Nangagpas ka ba ug materyal nga bahandi . . .

. . . o espirituwal nga bahandi?