Ti Peggad a Pakaseknan Amin a Nagannak
NAGANAYGAY ken naragsak nga agassawa da Heather ken ni Scott. Adda nasaririt ken nasalun-at nga anakda a lalaki nga agtawen iti tallo. * Ay-aywananda a naimbag ti anakda. Kadagitoy a tiempo, narigat a trabaho dayta gapu iti adu a pakadanagan ken responsabilidad. Nagadu ti nasken a maisuro kadagiti ubbing! Ngem adda pakaseknan unay da Heather ken ni Scott: Kayatda a salakniban ti anakda kadagiti peggad ti seksual a panangabuso. Apay?
Kinuna ni Heather: “Saan a nadungngo ni tatangko ken nauyong no mabartek. Nakaro ti panangkabkabilna kaniak, ken minolestianak agraman dagiti addik.” Adu ti umanamong a nasaem ken narigat a malipatan dagiti epekto ti kasta a seksual a panangabuso. * Dayta ti gapuna a determinado ni Heather a mangsalaknib iti anakna! Kasta met laeng ti determinasion ni Scott.
Madanagan ti adu a nagannak gapu kadagiti kaso ti seksual a panangabuso iti ubbing. Nalabit kastakayo met. Mabalin a diyo mismo napadasan ti naabuso agraman dagiti epektona, kas iti napasaran ni Heather, ngem sigurado a nangnangngegyon dagiti makapasubkar a damag maipapan iti panagraira daytoy makarimon nga aramid. Iti intero a lubong, uray la a sumgar dagiti nadungngo a nagannak no madamagda ti mapaspasamak kadagiti ubbing iti lugarda.
Di pakasdaawan nga imbaga ti maysa a managsirarak maipapan iti seksual a panangabuso a ti nasaknap a pannakamolestia dagiti ubbing ket “maysa kadagiti makapadismaya unay a naduktalan iti panawentayo.” Talaga a makapaleddaang dayta a damag, ngem masdaawtayo kadi? Saan, no ad-adalentayo ti Biblia. Ilawlawag ti Sao ti Dios nga agbibiagtayo kadagiti napeggad a panawen a naawagan “maudi nga aldaw,” tiempo a nakadkadlaw ti panagraira ti “narungsot” a kababalin, a dagiti tattao ‘managayatda iti bagbagida’ ken “awanan nainkasigudan a panagayat.”—2 Timoteo 3:1-5.
Makapadanag a problema ti seksual a panangabuso. Wen, mariribukan unay ti dadduma a nagannak no pampanunotenda ti kakaro ti kinadangkes dagiti tattao nga agsapsapul kadagiti ubbing nga abusuenda. Ngem imposible kadi para kadagiti nagannak a risuten dayta? Wenno adda kadi dagiti praktikal nga addang a mabalinda nga aramiden tapno masalaknibanda dagiti annakda? Dagita a saludsod ti sungbatan dagiti sumaganad nga artikulo.
^ par. 2 Nabaliwan dagiti nagan kadagitoy agsasaganad nga artikulo.
^ par. 3 Mapasamak ti seksual a panangabuso iti ubing no penneken ti maysa nga adulto ti bukodna a derrep babaen ti panangmolestiana iti maysa nga ubing. Masansan a nainaig dayta iti aw-awagan ti Biblia a pannakiabig, wenno por·nei′a, a ramanenna ti panangay-ayam iti mabagbagi, seksual a panagdenna, ken panagseks babaen iti ngiwat wenno kerret. Dadduma nga aramid a panangmolestia—kas iti panangkarawa iti barukong, nalawag nga imoral a singasing, panangipakita iti pornograpia iti maysa nga ubing, panagsirip, ken panangipakita iti pribado a paset ti bagi—ket mabalin a katupagda dagiti kondenaren ti Biblia kas “nalulok a kababalin” wenno “kinarugit buyogen ti kinaagum.”—Galacia 5:19-21; Efeso 4:19.