¿Tleka xopopoliuj Biblia maski miyekej kinekiyaj kipopoloskej?

¿Tleka xopopoliuj Biblia maski miyekej kinekiyaj kipopoloskej? Uelis tikijtoskej ika se milagro ika hasta aman tikpiyaj Biblia niman ika xonopatlak tlen kijtoua. Ikipiya más de 1900 xiuitl ijkuak otlan noijkuiloua niman onoijkuilo ipan kuetlaxtli niman ipan amamej tlen nochijchiuayaj ika xiujtli tlen itoka papiro. Noijki onoijkuilo ika tlajtoltin tlen aman xmiyekej tlajtouaj. Miyekej tlakamej akin uejueyixtoyaj kinekiyaj kipopoloskej.

¿TLEKA xouel opopoliuj Biblia? Matikitakan ome tlemach tlen okichiuj maka mapopoliui Biblia.

Onochiujkej miyek copias

Israelitas akin kinpiayaj kachtopa tlajkuilolamamej itech Biblia, kuajli okintlajpixkej niman okinchiujkej miyek copias. Akin tekiuajtiyaj nonekiyaj kichiuaskej se copia itech yejon tlanauatiltin tlen kinmakayaj teopixkej niman levitas (Deuteronomio 17:18).

Miyekej israelitas kuelitayaj kinamapouaskej tlajkuilolamamej pampa kimatstoyaj ika katka iTlajtol toTajtsin. Ika yejon, akin kinchiuayaj copias kuajli kitayaj ika nochi kuajli manotlali. Matikonteneuakan Esdras, se tlajkuilojketl itech iTlajtol toTajtsin, yejua melak “kuajli kajsikamatiya on ley yejuan iminTEKO Dios on israelitas okimakak Moisés” (Esdras 7:6). Masoretas, akin kinchiuayaj copias itech Tlajkuiloltin ika Hebreo ipan siglo VI niman X, hasta kinpouayaj letras niman ijkon xnopopoloskej. Pampa ijkon okichiujkej, xtlaj okipatilijkej niman hasta okitlajpixkej para maka itlaj makichiuilikan akin kinekiyaj kipopoloskej.

Ipan xiuitl 168 ijkuak xpeuaya xiuitl 1, tekiuaj Antíoco IV okiyejyeko kinpopolos nochi copias itech Tlajkuiloltin ika Hebreo tlen onkatkaj Palestina. Judíos kijtouaj ika ijkuakon yejon tekiuaj otlanauati makintlatikan yejon tlajkuilolamamej tlen kipiyaj Tlajkuiloltin ika Hebreo. The Jewish Encyclopedia kijtoua ika soldados akin kintlatiayaj yejon tlajkuilolamamej noijki kinmiktiayaj akin kipiayaj se itech yejuin tlajkuilolamamej. Maski ijkon okichiujkej, xouel okinpopolojkej nochi copias tlen kinpiayaj judíos akin chantiyaj Palestina noso oksekan.

Sakin ika otlan noijkuilouaj Tlajkuiloltin ika Griego nimantsin opeuj nochiuaj copias. Xtlanemili itech yejuin, apóstol Juan okijkuilo ievangelio ijkuak nemiya Éfeso noso ompa nisiuj, maski ijkon, ne Egipto, okinextijkej se copia itech yejuin evangelio tlen sekimej kijtouaj ika onoijkuilo kanaj 50 xiuitl sakin ika Juan okijkuilojka. Yejuin okiteititi ika sekimej akin ompa chantiyaj, kinpiayaj copias itech tlajkuilolamamej tlen kemach onoijkuilojkaj.

ITlajtol toTajtsin noijki xouel opopoliuj pampa miyekan onkatkaj copias. Ipan 23 de febrero itech xiuitl 303, tekiuaj romano Diocleciano kitstoya kenon isoldados kintlajkaliyaj ipuertas se teopan, kenon kintlatiayaj teopantin niman kintlatiayaj tlajkuilolamamej. Uajmostla otlanauati makintlatikan nochi Biblias tlen onkatkaj kampa yejua tlayekanaya pampa kinemiliaya ika tla ijkon kichiuaya, xok yakaj más tlaneltokas itech Jesús. Maski ijkon, xouel okintlatijkej nochi Biblias, niman, itech Biblias tlen onokaujkej, sakin onokixtilijkej okseki copias. Hasta aman onka seki partes itech Biblia ika griego tlen xouel opopoliujkej ipan yejon tonaltin ijkuak Diocleciano okiyejyeko kipopolos iTlajtol toTajtsin. Se copia itech yejon Biblia onka Roma niman okse ipan British Library tlen onka Londres.

Maski xtikinpiyaj uan kachtopa tlajkuilolamamej, kema tikinpiyaj melak miyekej copias tlen onokixtijkej itech yejon kachtopa tlajkuilolamamej. ¿Itlaj onopatlak ijkuak onochiujkej copias? W. H. Green, okijto yejuin itech Tlajkuiloltin ika Hebreo: “Uelis kuajli tikmatstoskej ika xonka nion se libro tlen melak kuajli yonotlajtolkuep ijkon ken Biblia”. Niman ixtlamatki Sir Frederic Kenyon, okijto yejuin itech Tlajkuiloltin ika Griego: “Uelis kuajli tikmatstoskej ika tlen nestika ipan copias tlen onochijchiujkej itech on kachtopa tlajkuilolamamej, san noijki ken on kachtopa tlajkuilolamamej, pampa xmiyek tiempo opanok ika onokixtijkej yejon copias. Uelis tikijtoskej ika nochi tlen ijkuiliujtika ipan libros tlen onka ipan Nuevo Testamento kuajli ken onoijkuilo niman nochi onoijkuilo”. Niman noijki okijto: “Uelis tikneltokaskej nochi tlen kijtoua Biblia pampa kuajli ken okitlajtolkuepkej. [...] Xonka okse libro tlen melak kuajli yonotlajtolkuep ijkon ken Biblia”.

Ken okitlajtolkuepkej

Melak miyekej ouel okixmatkej Biblia pampa onotlajtolkuep ika miyek tlajtoltin xijkon ken okseki libros. Yejuin tlen toTajtsin kineki, ika makimatikan akinon yejua niman makiueyichiuakan ika espíritu niman ika tlen melauak (Juan 4:23, 24; Miqueas 4:2).

Kachtopa Biblia hebrea tlen onotlajtolkuep ika griego, katka versión de los Setenta, noso Septuaginta. Okitlajtolkuepkej seki judíos akin tlajtouayaj griego niman xchantiyaj Palestina. Otlankej kichijchiuaj yejuin Biblia kanaj ome siglos achto ika Jesús uajnemiskia niman peuaskia tenojnotsaskia. Niman, ijkuak otlan noijkuiloua nochi Biblia, nimantsin opeuj notlajtolkuepa ika miyek tlajtoltin. Niman más miyekpa onotlajtolkuepkej Tlajkuiloltin ika Griego. San ika, sakin onenkej tekiuajkej niman teopixkej akin xokinpaleuijkej oksekimej makiamapouakan Biblia. Yejuamej xkinekiyaj manotlajtolkuepa iTlajtol toTajtsin ika tlajtoltin tlen tlajtouayaj oksekimej.

Sekimej tlakamej xokichiujkej ken teopixkej niman tekiuajkej. Yejuamej okichiujkej tlen ouelkej niman ijkon okitlajtolkuepkej Biblia. William Tyndale, se tlakatl akin onomachti Oxford, ipan 1530 okitlajtolkuep Pentateuco (kachtopa makuijli libros tlen kipiya Tlajkuiloltin ika Hebreo). Maski melak okitlauelitakej, yejua akin kachtopa okitlajtolkuep ika inglés se Biblia tlen onkatka ika hebreo niman akin kachtopa okitlali itoka toTajtsin, Jehová. Noijki, Casiodoro de Reina okitlajtolkuep se Biblia ika español maski católicos kinekiyaj kimiktiskej. Para uelis kichiuas yejon, ononek yas Inglaterra, Francia, Holanda niman Suiza. *

Hasta aman, Biblia melak notlajtolkuepa niman melak miyek copias nokixtiaj. Pampa xouel okipopolojkej Biblia niman melak miyekej yokiamapoujkej, techititia ika yemelak yejuin tlen kijtoua apóstol Pedro: “On xojtli pilini niman uetsi ixochiyo, pero itlajtol Dios onyas para nochipa” (1 Pedro 1:24, 25).

[Nota]

[Recuadro/​Tlaixkopinaltin]

¿KATLEJUA BIBLIA NONEKI NIKAMAPOUAS?

Biblia yonotlajtolkuep ika miyek tlajtoltin. Seki Biblias onotlajtolkuepkej ika tlajtoltin tlen yeuejkaui nokuiyaj noso tlen ouijtika tikasikamatis. Ipan okseki Biblias kintlaliliaj noso kinkixtiliaj tlajtoltin para ijkon xouijtika makiamapouakan, niman ipan okseki san kintlajtolkuepaj tlajtoltin niman nion xkitaj tla nasikamati.

Uelis tikijtoskej ika Traducción del Nuevo Mundo de las Santas Escrituras ika inglés, tlen okichijchiujkej iteixpantijkauan Jehová, melak kuajli ken onochijchiuj. Yejuin Biblia okitlajtolkuep se grupo akin xkineki makixmatikan, niman akin nemiyaj ipan yejuin grupo kuajli okimitstiajkej tlajkuilolamamej itech Biblia tlen yeuejkaui onoijkuilojkej. Yejuin Biblia yonotlajtolkuep ika miyek tlajtoltin. Noijki onotlali nochi tlen kijtouaya Biblia tlen kachtopa onoijkuilo niman onoitak tla kuajli nasikamatiya. Akin okitlajtolkuepkej yejuin Biblia, onokojtilijkej kuajli kitlajtolkuepaskej niman ijkon akin kipouaskiaj ueliskiaj kuajli kasikamatiskiaj ijkon ken akin yeuejkaui okipoujkej kachtopa Biblia.

Sekimej yonomachtijkej Traducción del Nuevo Mundo ika inglés niman okseki Biblias para kitaskej tla kuajli onotlajtolkuepkej. Jason David BeDuhn, akin tlapaleuiya ipan Estudios Religiosos de la Northern Arizona University tlen onka Estados Unidos, ipan 2003 okimijkuilo 200 páginas kampa tlajtouaya itech chiknaui Biblias tlen más nokuiyaj ika inglés. Yejua onomachti tlaxeloltin kampa miyekej xnotlajtolnamikiyaj kenon kitlajtolkuepaskej. BeDuhn okitak tla Tlajkuiloltin ika Griego notlajtolnamikiyaj ika tlen kijtouayaj Biblias ika inglés. ¿Tlenon okinexti?

BeDuhn kijtoua ika miyekej kinemiliaj ika akin okitlajtolkuepkej Traducción del Nuevo Mundo okichiujkej manotlajtolnamiki ika tlen yejuamej kineltokaj. San ika, yejua kijtoua: “Yejuin Biblia melak kuajli ken onotlajtolkuep, yejua ika, xsa noijki ken okseki Biblias”. Maski BeDuhn xkuelita ken Traducción del Nuevo Mundo kintlajtolkuepa seki tlaxeloltin, kijtoua ika yejuin Biblia yejon tlen más kuajli yonotlajtolkuep itech nochi Biblias tlen yejua yonomachti.

Benjamin Kedar, akin nomachtia itech hebreos ne Israel, ipan 1989 okijto yejuin itech Traducción del Nuevo Mundo: “Yejuin amatlajkuilojli kipantlantia ika akin okitlajtolkuepkej melauak kinekiyaj kasikamatiskej tlen kiteasikamachiltisneki on yektlajkuilojli. […] Xnesi tla itlaj okipatilijkej”.

Xmotlajtolti: “¿Tleka nikamapoua Biblia? ¿Nikneki nikamapouas se Biblia tlen nimantsin nasikamati maski okipatlakej ijkuak okitlajtolkuepkej? ¿Noso nikneki nikamapouas se Biblia tlen kuajli okitlajtolkuepkej niman xtlaj okipatilijkej?” (2 Pedro 1:20, 21). Tla timotlajtoltia yejon, tikmatis katlejua Biblia tiktlapejpenis.

[Tlaixkopinajli]

Traducción del Nuevo Mundo de las Santas Escrituras yonotlajtolkuep ika miyek tlajtoltin

[Tlaixkopinajli]

Tlajkuilolamamej masoréticos

[Tlaixkopinajli]

Ipan yejuin parte uajnesi tlen kijtoua Lucas 12:7: “Maka xmomojtikan pampa nemejuamej más nenueyi kijtosnekij xken miyekej tototsitsinmej”

[Reconocimiento]

Kachtopa página: Biblioteca Nacional de Rusia (San Petersburgo); ika ome niman ika yeyi: Bibelmuseum, Münster; tlakuitlapan: © The Trustees of the Chester Beatty Library (Dublín)