Tala Fatu po o Tala Moni?

Na faatonuina e le toeaina Kerisiano o Timoteo i latou o loo faanaunau e tapuaʻi i le Atua moni ia aua neʻi uaʻi atu i “tala sesē ma “tala o le vavau.” (1 Timoteo 1:3, 4, Byington) Pe talafeagai na lapataʻiga i aso nei? Ioe e talafeagai, auā o manatu sesē e faatatau i le Tusi Paia ma ana aʻoaʻoga, ua lē ō mai ai nisi i le tapuaʻiga moni. O nisi nei o manatu taatele e faatatau i le Tusi Paia. Seʻi mātau mai faamatalaga a le Tusi Paia. E fesoasoani nei mea iā te oe e te iloa ai tala fatu ma tala moni.

▪ Tala Fatu: E lē mafai ona tupu vavega o loo taʻua i le Tusi Paia.

Tala Moni: E tele mea tatou te aʻoaʻoina mai foafoaga a le Atua. E leai ma se saienitisi e mafai ona ia faamalamalama atoatoa le kalave, faamatala vaega uma o se atoma, pe faamalamalama auʻiliʻili uiga tonu o le taimi. “O le suʻesuʻe e te maua ai ea le Atua? e te maua atoatoa ai ea Lē e ona le malosi uma lava?” (Iopu 11:7) Ona tatou te lē mafai ona malamalama atoatoa i le foafoaga, ua faaeteete saienitisi i le faia o se faamatalaga faapea e lē mafai ona faia se mea patino.

▪ Tala Fatu: E tapuaʻi lotu uma i le Atua.

Tala Moni: Na fetalai Iesu: “O outou o oʻu soo moni pe a outou tumau i aʻu upu, ma e iloa e outou le upu moni, e tuusaʻoloto foʻi outou e le upu moni.” (Ioane 8:31, 32) Pe ana fai e tapuaʻi lotu uma i le Atua, pe faamata e manaʻomia ona faasaʻoloto ona tagata? O lea na aʻoaʻoina ai e Iesu e toʻalaiti i latou o loo i le “auala e tau atu i le ola.”—Mataio 7:13, 14.

▪ Tala Fatu: O tagata lelei uma e ō i le lagi pe a maliliu.

Tala Moni: “A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele. E fai lava le nuu mo tagata amiotonu, e nonofo ai pea i latou. Ia e faatalitali iā Ieova, ma e tausi i lona ala; ona faaeaina lea o oe e ia ina ia fai mou le nuu.” (Salamo 37:11, 29, 34) E na o le 144,000 tagata faamaoni e ō i le lagi. O lo latou tofiga e mai le Atua, ma “ua latou pule mai foʻi o ni tupu i le lalolagi.”—Faaaliga 5:9, 10; 14:1, 4.

▪ Tala Fatu: E lē o toe aogā le “Feagaiga Tuai” mo Kerisiano.

Tala Moni: “O Tusitusiga Paia uma e mai le agaga o le Atua, ma e aogā.” (2 Timoteo 3:16, 17) “O mea uma na tusia i aso ua mavae, na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.” (Roma 15:4) O le “Feagaiga Tuai,” o Tusitusiga Eperu, o se vaega tāua mo le mauaina o faatonuga faaleagaga, ua tatou maua ai se faavae e faatuatua ai i le “Feagaiga Fou,” o Tusitusiga Eleni.

▪ Tala Fatu: O le tele o faamatalaga o le tusi o Kenese, e aofia ai le tala iā Atamu ma Eva, o se tala fatu.

Tala Moni: Sa tusia i le Evagelia a Luka le gafa o Iesu seʻia oo iā Atamu. (Luka 3:23-38) Pe ana fai o se talafaafagogo le Kenese, o fea la i le gafa e muta mai ai igoa moni lava o tagata ae o fea foʻi e amata mai ai igoa na fai e tagata? Na talitonu Iesu o lē na soifua i le lagi a o leʻi afio mai i le lalolagi, i mea o loo tusia i le Kenese, e aofia ai ma le tala iā Atamu ma Eva. (Mataio 19:4-6) O lea la, o le fesiligia o le maufaatuatuaina o le Kenese, e fesiligia ai foʻi le talitonuina o Iesu, faapea foʻi isi tusitala o le Tusi Paia.—1 Nofoaiga a Tupu 1:1; 1 Korinito 15:22; Iuta 14.