Talatupu‘a pe Mo‘oni?

Ko e mātu‘a Kalisitiane ko Tīmoté na‘á ne fakahinohino‘i ‘a e fa‘ahinga ko ia na‘e mahu‘inga‘ia ‘i he lotu ki he ‘Otua mo‘oní ke ‘oua te nau tokanga ki he “me‘a kehe” mo e “ngaahi talatupu‘a.” (1 Timote 1:3, 4) ‘Oku fiema‘u he ‘ahó ni ‘a e fakatokanga peheé? ‘Io, koe‘uhi ko e ngaahi fakakaukau hala fekau‘aki mo e Tohi Tapú mo ‘ene ngaahi akonakí ‘oku fakatafoki‘i ai ‘a e kakaí mei he lotu mo‘oní. ‘Oku ‘i lalo ‘a e ngaahi fakakaukau ‘oku tui ki ai ‘a e kakai tokolahi fekau‘aki mo e Tohi Tapú. Fakatokanga‘i ‘a e ngaahi fakamatala mei he Tohi Tapú tonu. ‘Oku lava ke tokoni‘i koe ‘e he ngaahi me‘á ni ke ke fakamavahe‘i ‘a e talatupu‘á mei he mo‘oní.

▪ Talatupu‘a: Ko e ngaahi mana ‘i he Tohi Tapú ‘oku ‘ikai ala lava.

Mo‘oni: ‘Oku lahi ‘a e me‘a ke ako ‘e he tangatá fekau‘aki mo e fakatupu ‘a e ‘Otuá. ‘Oku ‘ikai ha faisaienisi ‘e lava ke ne fakamatala‘i kakato ‘a e kalāvité, fakapapau‘i tonu mātē ‘a e fanga ki‘i kongokonga kotoa ‘o ha ‘ātomi, pe fakamatala‘i ‘a e natula tonu ‘o e taimí. “He te ke ilo ae Otua i he faa eke? he te ke faa kumi ke ilo haohaoa ae Mafimafi?” (Siope 11:7, PM) Koe‘uhi ko e fakatupú ‘oku mahulu atu ia ‘i he‘etau mahino kakató, ko e kau saienisi lavame‘á ‘oku nau hoko ‘o tokanga lahi fekau‘aki mo hono lea‘aki ha me‘a pau ‘oku ‘ikai ala lava.

▪ Talatupu‘a: Ko e lotu kotoa pē ‘oku taki atu ai ki he ‘Otuá.

Mo‘oni: “Kapau te mou nofo ma‘u ‘i he‘eku akonaki,” ko e lea ia ‘a Sīsuú, “ko ‘eku kau ako mo‘oni kimoutolu; pea ‘e faifai pea mahino kiate kimoutolu ‘a e mo‘oni, pea ‘e fakatau‘atāina ‘a kimoutolu ‘e he mo‘oni.” (Sione 8:31, 32) Kapau ko e lotu kotoa pē ‘oku taki atu ai ki he ‘Otuá, ‘e fiema‘u ke toe fakatau‘atāina‘i ‘a honau kau mēmipá? Ko hono mo‘oní, na‘e ako‘i ‘e Sīsū ko ha kakai tokosi‘i pē ‘oku nau ‘i he “hala, ‘oku fakatau ki he mo‘ui.”—Mātiu 7:13, 14.

▪ Talatupu‘a: ‘Oku ‘alu ‘a e kakai lelei kotoa pē ki hēvani ‘i he‘enau maté.

Mo‘oni: “‘E ma‘u ‘a e fonua ‘e he fa‘a kataki; pea te nau fefiefia‘i ‘i he melino lahi. Ko ha‘a fai totonu te nau ma‘u ‘a e fonua, pea te nau nofo ai ‘o tuputupu‘a. Tatali kia Sihova, pea tauhi hono ‘alunga, pea te ne hakeaki‘i koe ke ma‘u ‘a e fonua.” (Sāme 37:11, 29, 34) Ko e fa‘ahinga faitōnunga pē ‘e toko 144,000 ‘o e tangatá te nau ō ki hēvaní. Ko ‘enau ngāue kuo ‘omai ‘e he ‘Otuá ke “nau Hau ‘i mamani.”—Fakahā 5:9, 10; 14:1, 4.

▪ Talatupu‘a: Ko e “Fuakava Motu‘á” ‘oku ‘ikai kei ‘aonga ia ki he kau Kalisitiané.

Mo‘oni: “Ko e potu Folofola kotoa pe ne fakamanava mei he ‘Otua, ‘oku ‘aonga.” (2 Timote 3:16, 17) “‘Ilonga ha me‘a na‘e tohi mu‘a na‘e tohi mo‘otau akonekina; koe‘uhi ko e me‘a ‘i he fakakataki mo e poupou ‘oku fai ‘e he folofola ke tau ma‘u ai ‘a e ‘amanaki lelei.” (Loma 15:4) Ko e “Fuakava Motu‘a,” ‘a e Ngaahi Konga Tohi Tapu Faka-Hepeluú, ko ha matavai mātu‘aki mahu‘inga ia ‘o e fakahinohino fakalaumālie pea ‘oku ‘omai ai kia kitautolu ‘a e makatu‘unga ki he tui ki he “Fuakava Fo‘ou,” ‘a e Ngaahi Konga Tohi Tapu Faka-Kalisi Kalisitiané.

▪ Talatupu‘a: Ko e konga lahi ‘o e tohi Senesí, ‘o kau ai ‘a e fakamatala fekau‘aki mo ‘Ātama mo ‘Iví, ko e talanoa fa‘u.

Mo‘oni: Ko e laine hohoko ‘o Sīsuú ‘o foki ai kia ‘Ātama na‘e hiki ia ‘e he tokotaha-tohi Kōsipeli ko Luké. (Luke 3:23-38) Kapau ko e tohi Senesí ko e talatupu‘a, ko fē leva ‘i he laine hohokó ‘e ngata ai ‘a e ngaahi hingoa mo‘oní pea kamata ai ‘a e ngaahi hingoa ‘oku taku ‘oku fakaetalatupu‘á? Ko Sīsū, ‘a ia na‘e ‘i hēvani ki mu‘a ke ne ha‘u ki māmaní, na‘á ne tui ki he me‘a na‘e hiki ‘i he tohi Senesí, ‘o kau ai ‘a e fakamatala kia ‘Ātama mo ‘Iví. (Mātiu 19:4-6) Ko ia ai, ke fehu‘ia ‘a e tohi Senesí ko hono fakavaivai‘i ia ‘a e tu‘unga falala‘anga ‘o Sīsuú tonu, pea pehē ki he kau hiki Tohi Tapu tokolahi.—1 Kalonikali 1:1; 1 Kolinito 15:22; Siutasi 14.