Ang Pagtamod sang Biblia

Nagakaigo Bala Maggamit sang Nagapadungog nga mga Titulo?

SA MATAG-ADLAW nga pagkabuhi sang unang siglo nga mga Cristiano kag sa ila pagbantala sing maayong balita sang Ginharian sang Dios, nakasumalang sila sang pila ka opisyales sang gobierno, ang iban may manubo nga posisyon kag ang iban naman mataas. Apang, ang mga sumulunod ni Jesus wala nagatawganay sa mga titulo agod kilalahon ang posisyon ukon kahimtangan sang kada isa. Pero, kinaandan na sadto pa nga yadtong may posisyon tawgon sa ila mga titulo. Ang Romanong emperador gintawag nga ang “Isa nga Augusto.”​—Binuhatan 25:21.

Sang nag-atubang ang mga disipulo ni Jesus sa mga opisyales sang gobierno, paano sila naggamit sang nagapadungog nga mga titulo? Nagakaigo man bala nga maggamit kita sang nagapadungog nga mga titulo?

Pagpadungog, Indi Pag-ugyon

Ginlaygayan ni apostol Pablo ang iya mga masigkatumuluo nga “ihatag sa tanan ang mga natungod sa ila, . . . sa iya nga nagapatuman sang pagpadungog, ini nga pagpadungog.” (Roma 13:7) Nalakip sa sini ang pagtawag sa mga opisyales sa ila mga titulo. Sa karon ang mga titulo nga Dungganon, Your Honor, kag Your Excellency amo ang masami nga ginagamit sa pagtawag sa opisyales sang gobierno. Apang mahimo mamangkot ang iban, ‘Paano ko matawag nga dungganon ang isa ka tawo nga ang iya paggawi indi talahuron kag indi maayo?’

Madamo nga opisyales sang gobierno ang mapisan sa ila mga katungdanan, apang indi tanan nagapakita nga masaligan sila. Walay sapayan sina, ginapalig-on kita sang Biblia nga magpasakop sa mga hari ukon sa mga gobernador “tungod sa Ginuo.” (1 Pedro 2:13, 14) Huo, ang pagkilala nga ang mga yara sa posisyon sang awtoridad may pahanugot sang Dios, magapahulag sa aton nga hatagan sila sang nagakaigo nga pagtahod kag pagpadungog.​—Roma 13:1.

Sa sini nga punto, indi ang paggawi sang isa ka opisyal ang basihan sang pagpadungog. Ang pagtawag sa isa ka opisyal sa iya nagapadungog nga titulo wala nagapakita nga ugyon kita sa iya buhat. Ginpakita ini sa inagihan ni apostol Pablo.

Si Pablo Naggamit sang mga Titulo

Gindakop si apostol Pablo sa Jerusalem bangod sa butig nga mga panumbungon batok sa iya kag  gindala sia sa atubang ni Felix, ang gobernador sa Judea. Si Felix indi maayo nga halimbawa subong opisyal sang gobierno. Ang Romanong istoryador nga si Tacitus nagsulat nga si Felix “naghunahuna nga bisan maghimo sia sing malain indi sia pagsilutan.” Mas luyag pa niya nga magbaton sang suhol sa baylo nga magpadapat sang katarungan. Sa sulod sang duha ka tuig nga nabilanggo si Pablo, gintahod niya ang gobernador kag masami sila nga nagasugilanunay kay nagapaabot si Felix nga hatagan sia ni Pablo sang kuarta apang wala ini matabo sa baylo gingamit ini ni Pablo nga kahigayunan agod bantalaan sia.​—Binuhatan 24:26.

Sang nagbulos si Festo kay Felix, nahibaluan sang bag-o nga gobernador ang kaso ni Pablo sa Cesarea. Agod kahamut-an sang mga Judiyong lider, ginpanugyan ni Festo nga bistahon si Pablo sa Jerusalem. Apang nahibaluan ni Pablo nga indi sia makatigayon sing makatarunganon nga bista didto, amo nga ginpanginpuslan niya ang iya Romanong pagkabanwahanon, nagsiling sia: “Nagaapelar ako kay Cesar!”​—Binuhatan 25:11.

Indi makapat-od si Festo kon ano ang himuon sa panumbungon kay Pablo batok kay Cesar, apang ang pagduaw ni Hari Agripa II nakabulig sa iya kay interesado man ini sa kaso. Sang masunod nga adlaw, nag-abot ang hari nga may daku nga pagpadayaw kag nagsulod sa hulot nga palamatian upod sa mga kumander sang militar kag kilala nga mga tawo sa siudad.​—Binuhatan 25:13-23.

Sang ginpahambal na si Pablo, naggamit sia sang titulo nga “Hari” sa iya nagabukas nga komento kag ginkilala niya ang pagkasampaton ni Agripa sa tanan nga kinabatasan kag kasuayon sang mga Judiyo. (Binuhatan 26:2, 3) Sadto nga tion, nabalahuba ang makahuluya kag imoral nga relasyon ni Agripa sa iya utod nga babayi. Huo, nahibaluan ni Pablo nga indi gid maayo ang reputasyon ni Agripa. Apang, ginpadunggan gihapon sia ni Pablo subong hari.

Sang ginpangapinan ni Pablo ang iya kaugalingon, si Festo nagsiling: “Nagbuang ka na, Pablo!” Sa baylo nga maakig, kalma nga nagsabat si Pablo kag gintawag ang gobernador nga “Labing Halangdon.” (Binuhatan 26:24, 25) Ginpadunggan sia ni Pablo nga nagakaigo sa iya posisyon. Apang, ini nga mga halimbawa, nagpautwas sing pamangkot, May limitasyon bala ang aton pagpadungog sa mga opisyales?

Relatibo nga Pagpadungog

Ang awtoridad sang gobierno relatibo lamang subong sang ginsiling sa Roma 13:1: “Ang nagaluntad nga mga awtoridad ginbutang sang Dios sa ila relatibo nga mga posisyon.” Gani, ang pagpadungog sa mga opisyales sang gobierno relatibo lamang. Nagpahamtang si Jesus sing limitasyon sa pagpadungog sa iban sang nagsiling sia sa iya mga disipulo: “Indi kamo magpatawag nga Rabbi, kay isa lamang ang inyo manunudlo, kag tanan kamo mag-ulutod. Dugang pa, indi kamo magtawag nga amay kay bisan sin-o sa duta, kay isa lamang ang inyo Amay, ang Isa nga langitnon. Indi man kamo magpatawag nga ‘mga lider,’ kay isa lamang ang inyo Lider, ang Cristo.”​—Mateo 23:8-10.

Ang aton pagpadungog may limitasyon kon nagadalahig na ini sang relihioso nga titulo. Kon ang isa ka opisyal sang gobierno maggamit sang relihioso nga titulo, ang laygay ni Pablo nga magpadungog wala naaplikar sa sini. Ang isa nga nagasunod sa laygay sang Biblia nagatahod sa mga opisyales. Apang, ang iya nahanas sa Biblia nga konsiensia nagagiya sa iya nga indi pagtawgon ang isa ka opisyal sa iya relihioso nga titulo bangod dapat niya “ibayad . . . sa Dios ang mga butang nga iya sang Dios.”​—Mateo 22:21.

NAPAMANGKOT MO NA BALA?

▪ Paano ginatamod sang mga sumulunod ni Jesus ang sekular nga mga awtoridad?​—Roma 13:7.

▪ Naggamit bala si apostol Pablo sang nagapadungog nga mga titulo para sa opisyales sang gobierno?​—Binuhatan 25:11; 26:2, 25.

▪ Ano nga mga titulo ang wala ginkahamut-an ni Jesus?​—Mateo 23:8-10.

[Retrato sa pahina 20, 21]

Paano gintawag ni Pablo si Agripa?