Te Manako o te Pipiria

Akapeea te au Taoonga Akangateiteia?

MEI te au Kerititiano i te anere mataiti mua e rave ra i ta ratou angaanga i te au ra ravarai i te tutu aere anga i te tuatua meitaki o te Patireia o te Atua, e maata te au opita kavamani ta ratou e aravei atu ana​—⁠tetai pae e turanga akaaka to ratou e tetai pae e turanga teitei to ratou. I rotopu i te au pipi a Iesu kare ratou e taangaanga ana i te au taoonga ei akataka i to ratou turanga i roto i te oraanga. Inara, e mea matauia no te aronga tataki tai e akaaere ra i to ratou au tangata i te reira tuatau, kia kapikiia ma te au taoonga. Kua taikuia te emepera o Roma e ko “Auguso.”​—⁠Angaanga 25:⁠21.

No reira me tu ratou ki mua i te aroaro o te au opita kavamani, eaa te manako o te au pipi a Iesu no te taangaanga i te au taoonga akangateitei? Akapeea tatou?

Kare te Akangateitei e Aite ki te Akatika Anga

Kua ako te apotetoro a Paulo i te au taeake irinaki kia “tuku atu i te mea tau i te tangata katoatoa ra, . . . ko tei akateiteiia ra, ka akateitei atu ïa.” (Roma 13:⁠7) Te kapitiia maira teia i te kapiki anga i te au opita ma to ratou au taoonga. I teia tuatau e peu matau katoaia te kapiki i taua aronga taoonga ra e Tei Teitei e Toou Ngateitei. Inara, penei ka ui tetai pae e, akapeea au me kapiki i tetai tangata taoonga i roto i tetai tu e te tarotokaka ra au e kare tona tu e tau ana me kore e meitaki ana?

E manganui te au opita papuriki e rave ra i ta ratou au angaanga ma te tau, inara kare te maataanga ia ratou e akakeu ana i te tu kia irinakiia. Noatu ra, te raurau maira te Pipiria ia tatou kia kauraro tatou ki te ui ariki e te au kavana no “te Atu ra.” (1 Petero 2:​13, 14) No reira, na te arikianga i te turanga mana o tetai opita tei akatikaia e te Atua, ka akakeuia tatou kia akaari i te ngateitei tei tau ki tona turanga mana.​—⁠Roma 13:⁠1.

Kare e ko te tu o te opita te tumu i roto i teia manako. Kare te reira i te tumu no te oronga anga i te ngateitei. Te kapikianga i tetai opita ma tona taoonga akangateiteiia, kare te reira e akakite maira e te akatika ra tatou i tona tu. Te akaariia maira teia i roto i te oraanga o te apotetoro ko Paulo.

Taangaanga a Paulo i te au Taoonga

Kua opuia te apotetoro a Paulo no tetai tapepeanga pikikaa i Ierusalema e kua aratakiia atu ki mua i te kavana o Iudea, ko Feliki. Kare  a Feliki i te opita papuriki tu meitaki. Kua tata te tangata tuatua enua Roma ko Tacitus e te “manako [ra a Feliki] e ka tau aia kia rave i tetai ua atu ravenga kino ma te kore e akautungaia.” Te manako maata ra aia i te moni ka rauka mai iaia, kare e i te oronga anga i te tu tika. Noatu ra, i te tapeka angaia aia e rua mataiti, kua akangateitei a Paulo i te kavana, e e pukapuka ua ana teia nga tangata​—⁠te irinaki ra a Feliki i te moni kare i tutakiia mai, e te taangaanga ra a Paulo i te atianga no te tutu aere.​—⁠Angaanga 24:⁠26.

I te mono anga a Fesito ia Feliki, kua akarongo te kavana ou i te manamanata o Paulo i Kaisarea. Kia arikiia mai e te au arataki ngati Iuda, kua karanga a Fesito e kia akavaia a Paulo i Ierusalema. Inara kua kite a Paulo e kare e rauka tetai akavaanga meitaki nona, no reira kua taangaanga aia i tona tikaanga ei tangata no Roma, i te karanga anga e: “Ei ia Kaisara au.”​—⁠Angaanga 25:⁠11.

Kare i papu ana ia Fesito e akapeea i te akamarama i te au tapepeanga no runga ia Paulo kia Kaisara, inara kua tae mai tetai tauturu i te atoro anga te Ariki ko Ageripa II ia Fesito, e te akaari anga i tona manako no teia akavaanga. I tera mai ra, ma te akaepaepaanga maata kua aru mai te au akaaere vaeau e te aronga taoonga o te reira ngai i te ariki, ki roto i te ngai aravei anga i te tangata.​—⁠Angaanga 25:​13-23.

Te patiia anga aia kia tuatua, kua taangaanga a Paulo i te taoonga “ariki” i roto i te akamataanga o tana tuatua, e kua akakite i to Ageripa tu kite pakari i roto i te au peu e te au manamanata i rotopu i te ngati Iuda. (Angaanga 26:​2, 3) I taua taime rai, te manakoia ra e te au tangata e te rave ra a Ageripa i tetai pirianga ainga ki tona uaorai tuaine. Papu e kua kite a Paulo e kua akakinoia te ingoa o Ageripa no tona tu tau kore. Noatu ra, kua oronga a Paulo kiaia i te akangateiteianga tei tau ei ariki.

I te tuatau o to Paulo akavaanga, kua tuatua a Fesito e: “E Paulo, kua auouoia koe.” Kare aia i riri atu ana, inara kua pau maru atu a Paulo na te tuatua anga atu ki te kavana e “e Fesito teitei.” (Angaanga 26:​24, 25) Kua akaari a Paulo kiaia i te ngateitei tei tau ki tona turanga mana. Inara, te akatupu maira teia au akaraanga i te uianga e, E kotinga ainei tetai no te akaari i te tu ngateitei?

Akangateitei i te Turanga i Akanooia

E turanga akanooia te mana akaaere o te kavamani, mei tei taikuia i roto ia Roma 13:1, te karanga ra e: “Te aronga mana e noo nei, kua akonoia ïa e te Atua.” No reira, e turanga akanoo katoaia i te akangateiteianga i te au komono o te kavamani. Kua akanoo a Iesu i te kotinga no te akangateitei tei tau ki tetai ke, i tona akakite anga ki tana au pipi e: “Auraka kia tapaia ia Rabi; okotai rai oki o kotou Orometua, ko te Mesia: e taeake anake oki kotou katoa na. Auraka kotou e akametua i tetai tangata i teianei ao: okotai rai oki o kotou Metua, ko tei noo i te rangi. Auraka kotou kia tapaia i te arataki; okotai o kotou Arataki, ko te Mesia.”​—⁠Mataio 23:​8-10.

Te tukeanga i rotopu i te taoonga akonoanga e te taoonga o teianei ao, kua akanooia te kotinga no te oronga anga i te ngateitei tau. Me ariki te au opita o teianei ao i te au taoonga akonoanga, kua ako a Paulo e auraka kia akangateiteiia taua au taoonga ra. Ko tetai tangata e aru ra i te akoanga Tuatua Tapu, ka akono i taua au opita ra ma te tu ngateitei. Inara, ka akakeu tona akava ngakau tei tereniia e te Pipiria, kia kopae i te taangaanga i te au taoonga akonoanga, no te mea te umuumuia ra aia e kia ‘apai i ta te Atua ra ki te Atua.’​—⁠Mataio 22:⁠21.

I MANAKO ANA AINEI KOE?

▪ Eaa te manako o te au pipi a Iesu no runga i te au mana akaaere o teianei ao?​—⁠Roma 13:⁠7.

▪ Kua taangaanga ainei te apotetoro ko Paulo i te au taoonga ngateitei no te au opita kavamani?​—⁠Angaanga 25:11; 26:​2, 25.

▪ Eaa te au taoonga kare a Iesu i akatika ana?​—⁠Mataio 23:​8-10.

[Tutu i te kapi 10, 11]

Akapeea a Paulo i te kapikianga ia Ageripa?