Maanzi Aapa Buumi

Jesu naakali kweenda mu Samariya, Jerusalemu nkoili kunyika, wakali katede alimwi wakafwide nyota. Kakkede kumbali amugoti, wakalomba mukaintu muna Samariya kuti amupe maanzi aakunywa. Mukaintu ooyu wakagambwa nkaambo tanaakali kuyeeyela kuti mu Juda inga wamulomba maanzi, akaambo kakuti mumwaanda wamyaka wakusaanguna bama Juda abana Samariya tiibakali kumvwana.

Mukaintu ooyu kagambidwe wakamubuzya Jesu kuti: “Cilakonzeka buti, kuti yebo omu-Juda undikumbile cakunywa, mbwendi mu-Samaria?”

Jesu wakamwiingula kuti: “Nowali kuzi cipegwa ca-Leza, ayooyo uukwaambila kuti, Ndipa nywe, na nguni, nowamukumbila nguwe, awalo naakupa maanzi aabuumi.”

Jesu wakazumanana kumupandulwida kuti: “Umwi umwi uunywa aya maanzi ulafwa nyota alimwi, pele oyo uuti nywe maanzi ngenti mupe, tacifwi limbi, pele maanzi ngenti mupe buyooba bulolo bwamaanzi mulinguwe, aatuntumukila kubuumi ubutamani.”—Johane 4:1-15.

Ino maanzi nzi Jesu ngaakali kwaamba?

IBBAIBBELE lyaamba kuti Imulengi, Jehova Leza ‘nkasensa kamaanzi aabuumi.’ (Jeremiya 2:13) Buumi ncipego kuzwa kuli Leza alimwi kutegwa katupona tuyandika kuzumanana kunywa maanzi abuzuba amaanzi aakumuuya Jesu ngaakaamba.

Imazuba aano bantu bayandika busolozi bwakumuuya ikwiinda lyoonse. Bantu banji munyika balijisi nyota yakasimpe. Bayanda kujana bwiinguzi kumibuzyo mbuli yakuti: Ino bafwide bali kuli? Sena kuli bulangizi bwakuti tuya kubonana alimwi? Ino nkaambo nzi Leza ncalekela kuti bantu kabapenga? Sena nkondo, nzala alimwi akuciswa kuli noziya kumana? Bakamboni ba Jehova basyoma kuti bwiinguzi bwamibuzyo eeyi bulakonzya kujanwa mu Jwi lya Leza, Ibbaibbele imuli “maanzi” aakatalusya.

Jesu naakali kwaambaula amukaintu muna Samariya kumbali aamugoti, wakali kwaamba kasimpe kajanika mu Jwi lya Leza ikakonzya  kutusololela kubuumi. Bakamboni ba Jehova balamutamba kuti mukazyibe kasimpe kali mu Jwi lya Leza. Kutamba ooku kulaambwa mubbuku lyamamanino lyamu Bbaibbele, kuti: “Ayooyo uufwide nyota aboole. Amuntu woonse uuyanda anywe cabuyo maanzi aabuumi.”—Ciyubunuzyo 22:17.

Kuti kamuyanda kwiiya zinji kujatikizya Bwami bwa Leza mbobuya kugwasya bantu, amubaambile Bakamboni ba Jehova ku Ŋanda ya Bwami iili munsi-munsi ankomuzwa naa inga mwalembela kukkeyala yeelede akati kayaayo aatondezyedwe apeeji 5 mumagazini eeyi. Kunze lyaboobo, mulakonzya kulanga akkeyala ya Intaneti www.watchtower.org.

[Kabbokesi kali apeeji 16]

SENA BASIZIKOMBELO BALABAYIISYA KASIMPE BANTU?

Ikuunka buyo kucikombelo akulyaamba kuti mukombi takukonzyi kupa kuti muntu akazyibe kasimpe. Alimwi buya, bunji bwazikombelo mazuba aano nzezipa kuti mapenzi aabantu aindile muciindi cakwaamana. Mucikozyanyo, nokuli nkondo ba Katolika balajayana mulicabo abalo ba Protesitanti mbubonya—aimwi nkamu ilapaila kuli Leza kuti izunde.

Alimwi kwaambwa kuti basololi banji bazikombelo balabba mali aazikombelo akujata bana. Masimpe, zikombelo zinji taziyiisyi kasimpe. (Ciyubunuzyo 17:4-6; 18:1-5) Zyintu nzyobacita zilikozyenye azyeezyo zilembedwe mu Bbaibbele kulugwalo lwa Tito 1:16 kuti: “Balyaamba kuti, Tulizi Leza, anu kumilimo yabo balamukazya.” Aboobo, basizikombelo baalilwa kubayiisya kasimpe bantu.

[Kabbokesi/Cifwanikiso icili apeeji 17]

Ibbuku lyakuti Ino Ncinzi Cini Bbaibbele Ncoliyiisya? iijisi zibalo zili19 amapeeji aali 224, lilaingula mibuzyo mbuli yakuti:

“Ino Leza ujisi makanze nzi kujatikizya nyika?”

“Ino bafwide bali kuli?”

“Sena tupona ‘kumazuba aakumamanino?’”

“Nkaambo nzi Leza ncalekelede kupenga?”

[Cifwanikiso icili apeeji 17]

Mulakonzya kukajana ‘kasimpe’ ku Ŋanda ya Bwami iili mucilawo canu