Go Thuša Bana Bao ba Nago le Mathata a go Ithuta

KA MONGWADI WA PHAFOGA! KUA MEXICO

Steven o thatafalelwa ke go bala. Nako le nako ge a tseba gore o tlo kgopelwa gore a bale ka go hlaboša ka klaseng, o longwa ke teng.

Go sa šetšwe dikgothatšo tša morutiši wa gagwe, Maria o na le mathata a go ngwala ka bothakga. Go mo tšea diiri tše dintši pele a ka fetša mošomo wa gagwe wa gae.

Noah o bala mošomo o tee wa sekolo wo a o abetšwego kgafetša-kgafetša. Lega go le bjalo, o lebala seo a se balago gomme o thatafalelwa ke mphato wa gagwe.

STEVEN, Maria le Noah ba na le mathata a go ithuta, ao bjo bogolo bja ona e lego bothata bja go bala. Ka mohlala, batho bao ba nago le bolwetši bja Dyslexia gantši ga ba bone gabotse ditlhaka tšeo di bonagalago eka di a swana. Mathata a mangwe a go ithuta ke dysgraphia (bothata bja go ngwala) le dyscalculia (go thatafalelwa ke dipalo). Lega go le bjalo, bontši bja bao ba nago le mathata a go ithuta ba na le bohlale bjo bo tlwaelegilego goba bjo bo fetago bjo bo tlwaelegilego.

Maswao a mathata a go ithuta a akaretša go thoma go kgona go bolela ka morago ga nako, bothata bja go bitša mantšu ao a nyakilego go swana, mokgwa wa go se bitše mantšu gabotse, go se kgaotše go bolela bjalo ka ngwana, go thatafalelwa ke go ithuta ditlhaka le dipalo, go se kgone go bitša ditlhaka tšeo di lego mantšung a bonolo, go gakantšhwa ke mantšu ao a kwagalago a swana gotee le go thatafalelwa ke go latela ditaelo. *

Go Thuša Ngwana wa Gago go Lebeletšana le Boemo

O ka dira’ng ge e ba ngwana wa gago a bonala a e-na le bothata bja go ithuta? Sa pele, dira gore a hlahlobje ditsebe le mahlo go bona gore bothata ke eng. * Ke moka o hwetše tharollo ya tša kalafo. Ge e ba ngwana wa gago a e-na le bothata bja go ithuta, o tla nyaka thekgo ya gago maikwelong. Gopola gore  bothata bja go ithuta ga bo tswalane felo le bohlale bja ngwana.

Diriša lenaneo le ge e le lefe leo le kgethegilego, le bjalo ka go nea tlhahlo, leo sekolo seo ngwana wa gago a tsenago go sona se ka bago se e-na le lona. Kgopela morutiši gore a thekge maiteko a gago. Mohlomongwe ngwana wa gago a ka dumelelwa gore a dule ka pele-pele ka klaseng gomme a fiwe nako e oketšegilego ya go fetša mešomo ya gagwe ya sekolo. Morutiši wa gagwe a ka mo fa ditaelo tšeo di ngwadilwego le tša molomo gomme a mo dumelela gore a hlahlobje ka molomo. Ka ge bana bao ba nago le mathata a go ithuta gantši ba lebala e bile ba se na thulaganyo, ba ka fiwa dipuku tša bobedi tša sekolo tšeo ba ka di dirišago gae. Go ka dirwa gore go be le khomphutha yeo e nago le lenaneo la go phošolla diphošo tša mongwalelo yeo e ka dirišwago sekolong goba bakeng sa mošomo wa gae.

E-bang le dinako tše kopana tša go bala letšatši le letšatši. Ke mo gobotse kudu gore ngwana yo a nago le bolwetši bja dyslexia a bale ka go hlaboša e le gore wena, motswadi, o be le sebaka sa go nea ditšhišinyo le phošollo. Thoma ka go bala ka go hlaboša ngwana wa gago a sepedišana le wena. Se se latelago, balang yona taba yeo gotee ka go hlaboša. Ke moka o dire gore ngwana wa gago a e bale ka boyena. Mo kgothaletše gore a bee rula ka tlase ga mothaladi o mongwe le o mongwe ge a dutše a bala gomme a thalele mantšu ao a mo thatafalelago. Tlwaetšo ye e ka tšea metsotso e 15 feela ka letšatši.

Ngwana a ka rutwa dipalo ka ditsela tše di šomago, tše bjalo ka ge go elwa dilo tšeo di dirišwago ge go apewa, go diriša rula ge go betlwa, goba ge go iwa mabenkeleng. Pampiri yeo e nago le dikerafo le diswantšho e ka thuša ge go dirwa dipalo. Bakeng sa mathata a go ngwala, leka go diriša letlakala leo le nago le dikgoba tše dikgolo magareng ga methaladi gotee le go diriša diphensele tše koto. Ditlhaka tše di nago le makenete tšeo di ka kgomaretšwago lesenkaneng di ka thuša ngwana wa gago go kgona go tseba mopeleto wa mantšu.

Go na le mekgwa e mengwe e šomago ya go dirišana le bao ba nago le ADHD. Pele o ka bolela le ngwana yo a nago le tšharakano ya go tsepamiša kgopolo, mo lebelele ka mahlong. Dira gore a be lefelong leo le se nago lešata bakeng sa go dira mošomo wa gae gomme o dumelele ngwana wa gago go khutša kgafetša-kgafetša. Diriša mafolofolo a gagwe a feteletšego ka go mo fa mediro yeo e nyakago mafolofolo, e bjalo ka go mo roma lebenkeleng.

Katlego e ka ba Gona

Thea motheo dilong tšeo ngwana wa gago a di kgonago, o mo kgothaletše go tšwetša pele bokgoni goba talente yeo a ka bago a e-na le yona. Mo rete gomme o mo putse bakeng sa selo le ge e le sefe seo a se fihleletšego, gaešita le ge e le se senyenyane. Ntšha mešomo e megolo ka diripa tše dinyenyane le tše di laolegago e le gore a ka ipona a kgona go atlega. Diriša diswantšho goba o thale megato yeo a swanetšego go e gata gore a kgone go phetha modiro.

Mafelelong, go kgona go bala, go ngwala le dipalo go bohlokwa go bafsa. Kgodišega gore ge ngwana wa gago a newa kgothatšo le thušo tše swanetšego, o tla kgona go ithuta—a ka no dira seo ka tsela e fapanego le ya ba bangwe e bile a ka tšea nako e teletšana.

[Mengwalo ya tlase]

[Lepokisi go letlakala 10]

BOTHATA BJA GO ITHUTA BO FETOGA SELO SE BOHLOKWA

“Ge ke be ke lebelela mantšu letlakaleng, a be a bonagala e le methalatšana ya manyokenyoke. A be a bonala eka a ka leleme le šele. Mantšu a be a sa mpotše selo go fihlela motho yo mongwe a a bala ka go hlaboša. Barutiši ba be ba nagana gore ke sebodu goba ke hloka tlhompho goba gore ke be ke sa iteke goba ke sa theetše ge go rutwa. Seo e be e se therešo le gatee. Ke be ke theetša e bile ke leka ka thata, eupša ke be ke no ba ke palelwa ke go kwešiša kgopolo ya go bala le go ngwala. Dithuto tše dingwe, tše bjalo ka dipalo, di be di sa nthatafalele. Ge ke be ke le ngwana, ke be ke akgofela go ithuta go lebiša tlhokomelo dilong tše bjalo ka dipapadi, mešomo ya diatla, bokgabo le selo le ge e le sefe seo se bego se akaretša go dirišwa ga diatla, ge feela se be se sa tswalane le go bala le go ngwala.

“Ge nako e dutše e e-ya, ke ile ka kgetha go šoma ka diatla, ka baka leo ke ile ka ba mošoma-ka-diatla. Se se dirile gore ke be le tokelo ya go šoma medirong e mehlano ya go aga ya ditšhaba-tšhaba ya Dihlatse tša Jehofa. Ka ge go nyakega maiteko a mantši go nna ge ke bala, ke na le bokgoni bja go gopola bontši bja seo ke se balago. Bjalo ka morutwana wa Beibele, ke bone se se nthuša e le ruri, kudu-kudu bodireding bja-ka bja Bokriste. Ka go rialo, go e na le go lebelela bothata bjo e le bofokodi, ke bo lebelela e le selo se bohlokwa.”—Peter, motho yo a nago le bolwetši bja “dyslexia” yoo e lego modiredi wa nako e tletšego wa Dihlatse tša Jehofa.

[Seswantšho go letlakala 9]

Bana ba ka ba le bokgoni bjo bogolo bja go “lebelela diswantšho” ge ba dutše ba theeditše ka kelohloko