Tauturu Anga i te au Tamariki tu Marie i te Kite i te Apii

TANGATA TATA O TE MAKATINI E ARA! I MEIKO

E ngata tikai ia Steven i te tatau. I te au taime ravarai me kite aia e ka patiia mai aia kia tatau maata i roto i tona pupu apii, ka mamae tona kopu.

Noatu te akamaroiroi a tona puapii, kare e rauka ana ia Maria i te tata meitaki. E pou ana iaia te au ora i te akaoti i tana apii i te kainga.

E tatau putuputu ua ana a Noah i taua apii rai. Inara, e ngaropoina ua ana iaia tana i tatau e kare e meitaki ana tana maka i te apii.

E TU marie to Steven, Maria, e Noah i te apii, e ko te mea matau ravaia atu ko te tu marie i te tatau. Ei akaraanga, ko te aronga dyslexia, e manako tarevake ana i te au reta akaraanga aiteite te tu. Ko tetai atu tu marie i te apii ko te dysgraphia (e tu ngata i te tata meitaki) e te dyscalculia (e tu ngata i te au tu karape o te apii numero). Inara, ko te maataanga o taua aronga tu marie i te apii, e avereti ua me kore tei runga ake i te avereti to ratou kite pakari.

Te kapitiia maira te au akairo no te tu marie i te apii ki te marie i te kite i te tuatua, te ngata i te kite i te au tuatua aiteite te tangianga, te matau i te akatangi tarevake i te tuatua, te tuatua ua mei ta te pepe rai, te ngata i te apii i te au reta e te au numero, tu marie i te akatangi anga i te au reta i roto i te au kupu mama ua, te manako tarevake no te au kupu aiteite te tangianga, e te ngata i te aru i te au ikuikuanga. *

Tauturu Anga i Taau Tamaiti Kia Autu

Eaa taau ka rave me e tu marie to taau tamaiti i te apii? Te mea mua, e akara meitaki i tona nga taringa e te nga mata kia akakoreia te reira nga tumu. * I reira e apai i te tamaiti ki ko i te taote kia akara meitakiia. Me e tu marie i te apii to taau tamaiti, ka anoano aia i taau turuturu anga manako ngakau. Kia akamaara, ko te tu marie i te apii kare e piri atu ana ki te kite pakari o te tamaiti.

 E taangaanga i tetai ua atu porokaramu takake i ko i te apii a taau tamaiti, mei te au apiianga a tetai puapii. E pati ki tona puapii kia taokotai mai ki taau au tautaanga. Penei ka rauka i taau tamaiti kia noo ki mua roa i te are apii e kia akamaataia atu te taime i te akaoti i tana apii. Penei ka rauka i tona puapii i te oronga atu i te au ikuikuanga tataia e te tuatua, kia rauka iaia i te rave i tana tarere. No te mea ko te au tamariki marie i te apii e ngaropoina putuputu ana e te marikonga kore, penei ka rauka i te oronga atu i tetai putunga puka apii ke kia taangaangaia i te kainga. Penei ka anoanoia tetai komupiuta akatano tuatua kia taangaangaia i roto i te pupu me kore i te apii i te kainga.

Akanoo i te au tuatau poto i te tatau i te au ra ravarai. E meitaki tikai no te tamaiti dyslexia kia tatau maata kia koe, ei metua, kia rauka ia koe te atianga no te oronga atu i te tauturu anga e te akatanotano anga. Te mea mua e tatau maata koe, i taau tamaiti e aru maira. Aru mai, e tatau kapiti maata korua i taua tataanga ra. I reira e maani i taau tamaiti kia tatau koia anake ua. Apii iaia kia taangaanga i te rura i raro ake i te au raini e tatau ra aia, e e akaira i te au tuatua ngata. Penei ka raveia teia no te 15 miniti ua i te ra.

Ka rauka katoa te apii numero kia apiiia na roto i te au mataara tau, mei te vaito anga i te au apinga no te tunu kai, te taangaanga i te rura i roto i te angaanga kamuta, me kore i te okooko anga. Penei ka riro te pepa raini piapia rikiriki e te au tutu toroia i te tauturu i te rave anga i te manamanata o te apii numero. No te tu ngata i te tata, e taangaanga i te au pepa atea te raini e te au penitara mamaata. Penei ka tauturu te au reta taimana akanooia ki runga i te papa auri i taau tamaiti kia kite i te tipera.

Te vai katoa ra te au ravenga puapinga i te akono i te ADHD. I mua ake ka tuatua ai ki tetai tamaiti kare e rauka i te noo marie ua, e akara tika atu ki roto i tona nga mata. E akanoo i tetai ngai muteki ua no te apii i te kainga, e e akatika kia akangaroi putuputu taau tamaiti. Taangaanga i tona tu kare e rauka i te noo marie ua, na te oronga anga i te au angaanga i te akapou i tona maroiroi, mei te akaori aere anga i te puakaoa.

Ka Rauka te Puapinga

E taangaanga meitaki i te tu maroiroi o taau tamaiti, na te akamaroiroi anga i tetai ua atu o tona kite me kore tareni. E akameitaki e e tutaki i tetai ua atu angaanga tei rauka iaia, noatu eaa te meangiti. E akatuanga rikiriki i te au angaanga, kia rauka iaia i te rave puapinga i te reira ma te merengo tikai. E taangaanga i te au tutu me kore i te au tutu toroia no te au takainga te ka rave aia kia oti te angaanga.

I te openga, ko te kite anga i te tatau, i te tata, e te tu karape o te apii numero e puapinga tikai ki tetai mapu. Kia papu e na te oronga anga i te akakeuanga tau e te tauturu, ka rauka i taau tamaiti i te kite i te apii​—⁠penei ka rave aia i te reira kia tuke rai mei tetai ke e ka roa atu e oti ei te reira.

[Au Tataanga Rikiriki i Raro]

[Pia i te kapi 17]

TE RIRO ANGA TE TU MARIE I TE APII EI MEA PUAPINGA

“Me akara au i te au tuatua i runga i te kapi, a te au raini mingimingi ua rai te reira, kare e aiteanga. Penei e ngari ake tetai tataanga reo ke takiri. Kare e aiteanga o te au tuatua kiaku, kia tatau maata roaia mai ra e tetai tangata. Kua manako te au puapii e e kope au e te kanga me kore kare au e tauta ana e kare katoa e akarongo ana ki te au apii. Kare rava teia i te tika. Te akarongo ra e te tauta pakari ra au, inara kare takiri au e marama ana i te tu o te tatauanga e te tataanga. Ko tetai au tumu apii, mei te apii numero rai, mama ua iaku. I toku tamarikianga, kua viviki au i te akamou i toku manako ki runga i te au apinga mei te tarekareka, te rave angaanga, te ati, e tetai ua atu apinga e taangaanga ana au i toku nga rima, auraka ra te tatauanga e te tataanga e o mai.

“I muri mai, kua iki au i te angaanga ma toku nga rima, no reira kua riro mai au ei tangata kamuta karape. Kua arataki atu teia iaku kia rauka te tikaanga meitaki i te angaanga i runga i te au angaanga akatu are e rima taime a te Au Kite o Iehova i te pa enua. No te mea e e maata te anoanoia ra iaku kia tatau, e maata rai taku ka maara i taku i tatau ana. Ei tangata apii i te Pipiria, kua kite mai au i teia ei tauturu anga tikai, i roto tikai i taku angaanga orometua Kerititiano. No reira, kare au e akara ana i teia tu marie ei tu paruparu, mari ra e akara ana au i te reira ei mea puapinga.”​—⁠Na Peter, e tangata “dyslexia” i roto i te angaanga orometua tamou o te Au Kite o Iehova.

[Tutu i te kapi 16]

E kite karape ana te tamariki i te “toro i te au tutu” ia ratou e akarongo meitaki ra