Ikugwasya Bana Batafwambaani Kwiiya

CAKALEMBWA AMULEMBI WA SINSIMUKA! WAKU MEXICO

Steven cilamukatazya kubala. Lyoonse aambilwa kuti nguuya kubala mukkilasi, mwida mulacisa.

Nokuba kuti bayi balamukulwaizya, Maria ulaalilwa kulemba kabotu. Tafwambaani kulemba ziiyo nzyapegwa kuya kulembela kuŋanda.

Noah ulaakubala nzyobamupa kucikolo cakwiinduluka-induluka. Nokuba boobo, ulaakuluba zyintu nzyabala alimwi taciti kabotu.

STEVEN, Maria a Noah tabafwambaani kujata zyintu nzyobaiya alimwi bunji bwabana bajisi penzi eeli cilabaalila kubala kabotu. Mucikozyanyo, bulema bwakuti Dyslexics bupa kuti muntu katabali kabotu akaambo kakuti amwi mabala waabona mbuli kuti alakozyanya. Bulema abumwi ibupa kuti muntu katafwambaani kwiiya mbwa dysgraphia (ibupa kuti muntu katalembi kabotu) abwa dyscalculia (ibupa kuti muntu kaalilwa kujana namba). Nokuba boobo, ibana banji bali boobu balijisi maano.

Zitondezyo zyakuti ibana aaba balilemene nzyakuti balaccelwa kwaambaula nobali bana, balaalilwa kwaamba kabotu mabala alimwi akubala, balaalilwa kwaandaanya mabala aalimvwisya kuti aamba cintu comwe alimwi balaalilwa kutobela malailile. *

Mbomukonzya Kumugwasya Mwaneenu

Ino ncinzi ncomukonzya kucita ikuti mwaneenu katafwambaani kwiiya? Cakusaanguna ncomukonzya kucita ncakuti, mweelede kumutola kucibbadela kutegwa bakabone naa matwi ameso ali kabotu. Ikuti naa mwaneenu wajanika kuti mulema cakuti takonzyi kufwambaana kwiiya, mweelede kumugwasya. Amubone kuti kulemana kwamwana tacaambi kuti tali musongo pe.

Ikuti naa kuli bubambe buli boonse kucikolo bwakuyiisya bana balema, amumulembye  mwaneenu. Amubalombe bayi bakwe kuti mubelekele antoomwe. Ambweni mulakonzya kubalomba bayi kuti mwaneenu kakkalila kumpela kutegwa kabamugwasya kabotu. Bayi bakwe balakonzya kumupa malailile aazyintu nzyayelede kulemba, kwamana boobo balakonzya kumusunka. Mbwaanga bana aaba kanji-kanji balafwambaana kuluba, balakonzya kupegwa amabbuku aakubala aakucikolo kutegwa kababelesya kuŋanda. Ikuti kacikonzyeka balakonzya kubelesya kkompyuta mukkilasi naa nobalemba ziiyo kuŋanda kutegwa ibagwasye kulemba kabotu.

Kamumugwasya kubala zibeela zifwaafwi abuzuba. Imwana ulaapenzi lyakubala mulakonzya kumwaambila kuti kabala cakupozya kutegwa mukonzye kumululamika mpaalubizya. Cakusaanguna inywe nobazyali mulakonzya kubala cakupozya mpoonya mwaneenu katobelezya. Cabili, amubalile antoomwe cakupozya. Mpoonya kamumwaambila kuti abale alikke. Nabala ulakonzya kubelesya lula abboopeni iisalala kutegwa kaenga mabala aakatazya. Kubala ooku kulakonzya kutola buyo maminiti aali 15 abuzuba.

Namba zilakonzya kuyiigwa munzila ziindene-indene, mbuli nomupima zyakulya zyeelede kujikwa, kubelesya lula nomupima zyintu nzyomufwala naa kubala mali ngomuyanda kubelesya kuula zyintu. Pepa lijisi tubbokesi lilakonzya kumugwasya kulemba namba. Kutegwa mwana acizyibe kulemba, mulakonzya kubelesya pepa lijisi myeengo iitanteene apensulo. Mabala aajisi magineti alakonzya kubikkwa acisenke kutegwa mwaneenu kabala kabotu.

Kuli nzila zimwi zigwasya nzyomukonzya kubelesya kubana bajisi penzi lya ADHD lyaambwa atala awa. Kamutana ambaula amwana uujisi penzi eeli, mweelede kumulanga. Anikubala kuŋanda takweelede kuba bantu bayobeka alimwi weelede kuti kapumuna-pumuna. Ikuti mwana katakkalikani mulakonzya kumupa milimo iipa kuti lyoonse kajisi bubi.

Ulakonzya Kucita Kabotu

Amumuyumye-yumye mwaneenu kweelana anguzu aluzyibo ndwajisi. Amumulumbaizye nokuba kuti cintu ncaacita tacili cipati. Kamumupa milimo misyoonto njakonzya kumanizya kutegwa alimvwe kuti ulicizyi kubeleka. Kamumutondezya zifwanikiso zitondezya ncayelede kucita kutegwa aubeleke kabotu mulimo ngwaapegwa.

Masimpe, kulayandika kapati kuti mwana kacizyi kubala, kulemba akubalila namba. Ikuti mwaneenu mwamukulwaizya akumugwasya ulakonzya kwiiya—nokuba kuti nzyacita inga kaziindene abeenzinyina alimwi inga katola ciindi cilamfwu.

Bupanduluzi buyungizidwe

[Kabbokesi kali apeeji 10]

NOKUBA KUTI NDILI MULEMA, NDICITA KABOTU

“Ndakali kucita kuti ndalanga abbuku, ndakali kubona mbuli kuti mabala alijatene. Akali kulibonya kube alembedwe mumusyobo ngonditazyi. Mabala akali kundaalila kubala ccita kuti muntu umwi wandibalila cakupozya. Bamayi bakali kuyeeya kuti ndili mutolo, tandibalemeki naa kuti tandiyandi buya kwiiya. Pele aaya tanaakali masimpe. Ndakali kuswiilila akubikkila maano pele cakali kundaalila kubala akulemba. Ziiyo zimwi mbuli namba tiizyakali kundikatazya. Nindali mwana, ndakali kubikkila maano kukwiiya zyintu mbuli zisobano, zyakupanga-panga azyintu zimwi zitajatikizyi kubala akulemba.

“Mukuya kwaciindi ndakatalika kubeleka mulimo wakuyaka akubamba mapaipi aameenda. Mulimo ooyu wandigwasya kutola lubazu ziindi zyosanwe mumulimo wakuyaka mumasi aamwi wa Bakamboni ba Jehova. Akaambo kakuti ndiyandika kubikkila maano ndanikubala, ndilaakuziyeeya zyintu nzyondibala. Lino mbwaanga ndilalibala Bbaibbele, eeci candigwasya mumulimo wa Bunakristo. Aboobo, nokuba kuti ndililemene, ndilizyi kuti wakalilekelela wakawa.”—Peter, ulaapenzi lipa kuti kacimukatazya kubala kabotu alimwi imukambausi waciindi coonse wa Bakamboni ba Jehova.

[Cifwanikiso icili apeeji 9]

Bana balakonzya kuswiililisya kumwi kabalemba “zifwanikiso”