Pamangkot sang mga Pamatan-on

Ano ang Himuon Ko Kon Ginbulagan Ako sang Akon Nobyo?

“Lima ka tuig na kami nga kilalahay kag anom ka bulan na nga nobyahanay. Indi niya mahambal sa akon nga gusto niya makig-break. Basta wala lang niya ako ginabugno. Naglalain gid ako. Daw indi ko ini mabaton. Pirme ko ginapamangkot ang akon kaugalingon, ‘Diin bala ako nagsala?’”​—Rachel. *

ANG pagbulagay makadula sang imo kalipay kag makapasubo gid. Binagbinaga sanday Jeff kag Susan nga duha ka tuig na nga magnobyahanay. Sa sulod sinang tion, nangin suod sila sa isa kag isa. Kada adlaw, pirme gina-text ni Jeff si Susan nga palangga niya sia. Kon kaisa, ginaregaluhan man niya si Susan agod ipabatyag sa iya nga nadumduman sia. “Ginapamatian gid ako ni Jeff kag ginahangop,” siling ni Susan. “Ginapabatyag niya sa akon nga espesyal gid ako sa iya.”

Wala magdugay, nagplano na sanday Jeff kag Susan nga magpakasal kag kon diin sila maistar sa tapos sang ila kasal. Namangkot pa gani si Jeff kon ano ang size sang tudlo ni Susan. Dayon, gulpi lang nga nakig-break si Jeff sa iya! Naglalain gid si Susan. Bisan pa gintinguhaan niya nga mangin masako sa sulod sang balay, daw wala sia pirme sa iya kaugalingon. “Nagpalangluya gid ako,” siling niya. *

Kon Ngaa Masakit Ini

Kon ikaw si Susan, mahimo mamangkot ka, ‘Maumpawan pa ayhan ako?’ (Salmo 38:6) Normal lang nga masakitan ka. Ang pagbulagay mahimo amo ang isa sa pinakamapait nga maeksperiensiahan mo sa  imo kabuhi. Ang iban nagasiling nga daw mapatay sila. Mahimo masubuan ka kag maagyan mo ang:

Pagpanghiwala. ‘Indi ko gid mabaton nga wala na kami. Mabalik man na sia gihapon sa akon.’

Kaakig. ‘Paano niya ini nahimo sa akon? Naugot gid ako sa iya!’

Depresyon. ‘Wala na gid sing may nagapalangga sa akon.’

Pagbaton. ‘Masakit matuod ang magbulagay pero maumpawan man lang ako sini sa ulihi.’

Ang matuod, mabaton mo gid ini sa ulihi. Kon san-o, depende sa pila ka butang, lakip na kon daw ano na kamo kalawig nga magnobyahanay ukon daw ano na kamo ka suod. Apang ano ang himuon mo subong agod mahaganhagan ang kasakit?

Paligara ang Tion

Ang iban nagasiling, Nagapali ang pilas pagligad sang tion. Kon bag-o pa lang kamo nagbulagay, mahimo nga daw indi ka magpati sa sini, kay ang pagpaligad sang tion indi lamang amo ang solusyon. Sa pag-ilustrar: Ang pilas magaayo sa ulihi, apang nagasakit pa ini subong. Gani dapat mangita ka sing paagi agod mauntat ang pagdugo kag maghaganhagan ang kasakit. Dapat halungan mo man nga indi ini maimpeksion. Amo man sini kon tuhoy sa pilas sa imo balatyagon. Masakit ini subong. Pero may mga paagi kon paano mo mapahaganhagan ang kasakit kag indi maimpeksion sang imo kaakig. Ang tion makabulig gid man sa pag-ayo sang pilas, pero ano naman ang dapat mo himuon? Tilawi ang masunod.

▪ Kon nasubuan ka, hibi lang. Indi malain ang maghibi. Ang matuod, ang Biblia nagasiling nga may “tion sa paghibi” kag may “tion sa paglalaw.” (Manugwali 3:1, 4) Kon maghibi ka, indi buot silingon nga maluya ka. Sang yara sa tuman nga kasubo, bisan ang maisog nga soldado nga si Hari David nag-ako: “Kada gab-i humog ang akon higdaan sa paghilibion, ang akon ulonan basa sang akon mga luha.”​—Salmo 6:6, Maayong Balita nga Biblia.

▪ Atipana ang imo panglawas. Ang pag-ehersisyo kag ang husto nga pagkaon makabulig nga mabalik ang imo kapagsik bangod sa pagkunsumisyon. “Ang paghanas sa lawas may diutay nga kapuslanan,” siling sang Biblia.​—1 Timoteo 4:8.

Ano ang himuon mo agod magpagsik ka liwat?

․․․․․

▪ Mangin masako pirme. Padayuna ang paghimo sang mga butang nga naluyagan mo. Kag likawi nga mag-isahanon. (Hulubaton 18:1) Kon makig-upod ka pirme sa mga nagapalangga sa imo, mabuligan ka sini nga mangin positibo.

Ano ang puede mo himuon agod mangin masako ka pirme?

․․․․․

▪ Ipangamuyo sa Dios ang imo ginabatyag. Mahimo nga indi ini mahapos. Sa tapos sang ila pagbulagay, nagabatyag ang iban nga ginpaslaw sila sang Dios. Mahimo magsiling sila, ‘Grabe na ang pangamuyo ko sa Dios nga makakita ako sing nobyo, pero subong, amo pa sini ang natabo!’ (Salmo 10:1) Husto ayhan nga hunahunaon ang Dios nga isa ka manugpatigayon? Indi gid. Kag indi man sia ang balasulon kon nagbulagay kamo sang imo nobyo. Nahibaluan naton nga si  Jehova ‘nagaulikid sa imo.’ (1 Ped. 5:7) Gani ipabutyag sa iya ang imo ginabatyag paagi sa pangamuyo. Ang Biblia nagasiling: “Ipahibalo sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sang inyo tagipusuon kag sang inyo ikasarang sa paghunahuna paagi kay Cristo Jesus.”​—Filipos. 4:6, 7.

Anong espesipiko nga mga butang nga mahimo mo ipangamuyo kay Jehova samtang ginatinguhaan mo nga maghaganhagan ang imo kasubo?

․․․․․

Mangin Positibo

Kon maumpawan ka na, mahimo balikan mo kag binagbinagon ang mga rason kon ngaa nagbulagay kamo. Kon handa ka na nga himuon ina, mahimo mabuligan ka kon isulat mo ang sabat sang masunod nga mga pamangkot.

▪ Nahibaluan mo bala ang rason kon ngaa ginbulagan ka niya? Kon huo, isulat ini sa ubos bisan pa sa pamatyag mo indi ini matuod.

․․․․․

▪ Ano pa gid sa banta mo ang iban nga rason?

․․․․․

▪ Kon balikan mo ang nagligad, ano kuntani ang ginhimo mo agod wala kamo magbulagay?

․․․․․

▪ Paano ini nga eksperiensia makabulig sa imo nga maghamtong sa emosyon ukon magsuod kay Jehova kag mapalambo pa gid ang Cristianong mga kinaiya?

․․․․․

▪ Kon magnobyo ka gid man liwat, ano ang gusto mo nga pauswagon?

․․․․․

Matuod wala nagmadinalag-on ang inyo pagnobyahanay, apang dumduma ini: Kon nagabagyo, makita mo lang ang madulom nga kalangitan kag mabaskog nga ulan. Apang, sa ulihi magahulaw gid man ang ulan kag magasanag ang kalangitan. Ang mga pamatan-on nga nahinambitan na, naumpawan gid man kag nakapadayon sang ulihi. Makasalig ka nga pagligad sang tion, maumpawan ka man!

Ang dugang pa nga mga artikulo sa serye sang “Young People Ask” masapwan sa Web site nga www.watchtower.org/​ype

[Mga nota]

BINAGBINAGA INI

▪ Ano ang natun-an mo sa imo kaugalingon sang nobyahanay pa kamo?

▪ Ano ang natun-an mo sa imo nobyo?

▪ Kon grabe gid ang imo kasubo, kay sin-o mo puede isugid ang imo nga nabatyagan?

[Kahon sa pahina 20]

PANUGDA

Si Susan nga ginhinambitan kaina, naglista sang mga teksto sa Biblia nga mahapos niya dayon basahon kon daw nagalalain sia. Ayhan mahimo mo man listahon ang pila ka teksto nga yari sa sini nga artikulo.

[Retrato sa pahina 19]

Ang pagbulagay daw kaangay sang pilas​—masakit ini pero magaayo man lang sa ulihi