Ui te au Mapu E

Akapeea Au i te Akakoromaki i te Akarukeia Anga?

“I aere kapiti ana maua e ono marama e e nga oa maua no nga mataiti e rima. I tona inangaro anga i te akamutu i to maua pirianga, kare rava e rauka ana iaia i te akakite mai kiaku. Kare aia i tuatua akaou mai kiaku. Kua manako puapinga kore tikai au. Kua tupu te taitaia maata. Kua ui putuputu au kiaku uaorai e, ‘Eaa taku tarevake i rave?’ ”​— Rachel. *

KA AKATUPU te akarukeanga i te taitaia maata ki toou turanga mataora e ka monoia te reira ki te tu aueue. E akamanako ana ia Jeff raua ko Susan, tei aere kapiti ana e rua mataiti. I roto i taua taime ra kua tupu to raua manako akainangaro. I roto i te ra katoa, e tuku mere ua ana a Jeff ki runga i te terepaoni a Susan ma te au akakiteanga akainangaro. I tetai au taime, e oake ana aia i tetai au apinga aroa i te akaari e te manako ra aia iaia. “Kua tauta tikai a Jeff i te akarongo mai kiaku e kia kite tikai i toku tu,” i karanga ai a Susan. “Kua manako aia iaku ei vaine akaperepere.”

Kare i roa ana, kua tuatua a Jeff raua ko Susan no runga i te akaipoipo e ka noo raua kiea ei tane e te vaine. Kua taiku a Jeff i te tapea te ka o ia Susan. Poitirere ua ake, i reira, kua akamutu aia i to raua pirianga! Kua tumatetenga tikai a Susan. Kua rave aia i tana angaanga, inara kua ngaro tona manako. “Kua parukaua toku manako e toku kopapa,” i karanga ai aia. *

Te Tumu i Mamae Ei

Me i na roto ana koe i tetai turanga tei aite atu ki to Susan, penei ka  manako katoa koe e, ‘Ka rauka akaou ainei iaku toku tu i mua ana?’ (Salamo 38:⁠6) Ka marama uaia toou tu taitaia. Penei ka riro te akaruke anga e ko tetai tumatetenga maata rava atu taau ka akakoromaki. E tika rai, kua karanga tetai aronga e ko te akaruke anga, mei te mea rai e kua mate tetai tuanga ia koe. Penei ka kite mai koe ia koe e na roto ra i teia au tu, e tetai atu au turanga ke o te tu mii:

Patoianga. ‘Kare e tano e kua akamutu rai to maua pirianga. Ka taui aia i tona manako a teia nga ra ki mua.’

Riri. ‘Eaa aia i rave ei i teia kiaku? Riri tikai au iaia!’

Manako Taitaia. ‘Kare au e inangaroia ana. Kare rava e tangata e inangaro iaku.’

Arikianga. ‘Ka meitaki ua au. E mamae te akarukeia anga, inara ka meitaki mai au.’

Te nuti meitaki ra, ka rauka ia koe i te ariki i teia. Eaa te roa e taeria ai te reira, tei runga te reira i te au tumu, te kapiti maira e eaa te roa o to korua pirianga e eaa te mamao i te aerenga o te reira. I teia taime ra, akapeea koe i te akakoromaki anga i te mamae ngakau?

Akamanako i te Tuatau ki Mua

Penei i akarongo ana koe i te tuatua e, Ka riro te tuatau i te rapakau i te au mamae. I te akamutu anga to korua pirianga, penei kare tera au tuatua e akapumaana ia koe. No te mea e tuanga ua te tuatau no te rapakau anga. Ei akatutuanga: Me motu toou pakiri ka roa rai e meitaki ei, inara i teia taime e mamae tikai. Ka anoanoia koe kia tapu i te toto e tae ra e kia akamaru i te mamae. Ka anoano katoaia koe kia akono i te reira kia kore e kino atu. Aiteite katoa rai te reira ki te mamae ngakau. I teia taime, e mamae tikai. Inara e au takainga tetai ka rauka ia koe i te rave i te akaiti mai i te mamae e kia kore e kino atu te riri. Na te tuatau e rave i tana tuanga, inara akapeea koe me rave i taau tuanga? Tauta i te aru i te au manako i raro akenei.

▪ Akatika ia koe kia aue. Kare e kino ana te aue. No te mea, te karanga ra te Pipiria e “e tuatau to te aue” e “e tuatau to te mii.” (Koheleta 3:​1, 4) Me aue koe kare i te mea e e paruparu koe. I tetai tupuanga tumatetenga tikai, kua akatika katoa a Davida​—⁠e tumutoa mataku kore e: “Te mauu nei toku roi i te au po katoa nei; toku roimata te akamauu i toku nei roi.”​—⁠Salamo 6:⁠6.

▪ Akono i toou kopapa. Na te akamatutu i te kopapa e te kaikai meitaki e akamaroiroi ia koe no te manako taitaia, no te akarukeia anga. ‘Ko te akamatutu i te kopapa e puapinga te ka rauka,’ i karanga ai te Pipiria.​—⁠1 Timoteo 4:8, NW.

Eaa te au ngai o toou oraanga kopapa ka anoanoia koe kia akamanako?

․․․․․

▪ Kia rave ua atu i te angaanga. Eiaa e akamutu i te rave i te au apinga tei inangaroia e koe. I teia taime tikai, auraka e akatakake ia koe uaorai. (Maseli 18:⁠1) Te kapiti anga atu ki te aronga e manako maira ia koe, ka oronga mai i te manako papu te ka rauka ia koe i te akamanako atu.

Eaa te au akakoroanga taau ka akanoo kia rave ua atu i te angaanga?

․․․․․

▪ Pure ki te Atua no runga i toou au manako. Penei ka riro teia ei akaaoanga. I muri ake i te akarukeia anga, kua manako tetai pae e kua akaruke te Atua ia ratou. Te manako ra ratou e, ‘E pure ua ana au e kia kitea e au tetai tangata, e i teianei, akara ra e eaa tei tupu!’ (Salamo 10:⁠1) E tau ainei i te akara i te Atua i runga i te rangi ei  Atua akapiri i tetai nga tokorua? Papu e kare; kare katoa e e apainga nana me ka akaruke tetai i tetai i roto i te pirianga. Kua kite ra tatou i teia no runga ia Iehova e: ‘Te manako ua maira aia ia koe.’ (1 Petero 5:7, NW) No reira e akakite i toou manako kiaia na roto i te pure. Te akakite maira te Pipiria e: “E akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”​—⁠Philipi 4:​6, 7.

Eaa te au apinga taka meitaki taau ka pure kia Iehova ia koe e tauta ra i te akakoromaki i te taitaia, no tei akarukeia mai koe?

․․․․․

Akara Atu ki Mua

I muri ake me meitaki mai koe, penei ka tau koe kia akara meitaki e eaa tei tupu ki toou pirianga i topa akenei. Me papa koe i te rave i tera, penei ka rauka mai te tauturu me tata koe i te au pauanga no te au uianga e aru mai nei.

▪ Kua orongaia atu ainei tetai tumu kia koe no te akarukeia anga? Me koia ia, tata i te tumu ki raro ake, noatu e te manako ra koe e e tika te reira.

․․․․․

▪ Eaa atu tetai au tumu e o maira, i toou manako?

․․․․․

▪ I te akamanako anga i tei tupu, e apinga ke atu ainei tetai ka tau koe kia rave i te taui i tei tupu? Me koia ia, eaa ra?

․․․․․

▪ Te akaari maira ainei teia tupuanga i tetai au mataara ka inangaro koe kia tupu i te pae vaerua, me kore i te pae manako ngakau?

․․․․․

▪ Eaa te mea tuke taau ka rave i roto i toou pirianga ka aru mai a muri mai?

․․․․․

E tikai rai, te pirianga taau i o atu kare i tupu mei taau rai i inangaro. Inara, e akamaara i teia: I roto tikai i tetai uriia, e mama ua i te kite atu i te tiaorangi kerekere e te ua maata. I te openga ra, kua akaoti te ua e kua rangi marie. Ko te au mapu tei taikuia i mua akenei i roto i teia atikara, kua kite mai e kua rauka ia ratou i te akamanako i te tuatau ki mua. Papu e ka tika rai teia kia koe!

[Au Tataanga Rikiriki i Raro]

KIA AKAMANAKO

▪ Eaa taau i kite mai no runga ia koe uaorai i roto i toou pirianga i topa akenei?

▪ Eaa taau i kite mai no runga i te vaine me kore i te tane?

▪ Koai taau ka akakite atu me maata roa toou manako taitaia no te akarukeia anga?

[Pia i te kapi 20]

TAMANAKO ANGA

Kua tata a Susan, tei taikuia i mua akenei, i te au irava e kua tuku i te reira ki tetai ngai kia rauka ua iaia i te tatau me aue aia. Penei ka rauka ia koe i te rave i te reira ki tetai au irava tei taikuia i roto i teia atikara.

[Tutu i te kapi 19]

Te akarukeia anga mei te motu mamae rai ​—⁠e mamae tikai, inara kare e roa ka meitaki