Te Tuatua Pui​—⁠E Ravenga Karape i te “Tuatua”

TANGATA TATA O TE MAKATINI E ARA! I MEIKO

▪ I roto i te maunga o Oaxaca, i Meiko, kare takiri e terepaoni a te iti tangata Matateko. Inara, e rauka ana ia ratou i te komunikeiti ki tetai au ngai mamao atu i te rua kiromita​—⁠ei akaraanga, ia ratou e angaanga ra i roto i te au aua kaope i runga i te maunga. Eaa ta ratou ravenga muna? I te tuatau i mua ana, kua rauka i te iti tangata Matateko tetai tu pui no to ratou reo. Kua karanga tetai mapu Matateko, ko Pedro e: “Ko te reo Matateko e reo akatangi pui. No reira me pui matou, e aru ana matou i te tiunu e te tangi anga o te tuatua. E e pui ana matou ki to matou ngutu ua, kare e taangaanga ana i to matou mangamanga rima.” *

Te akamarama maira te oa o Pedro ko Fidencio i te puapinga no te tu karape i te pui o to ratou reo e: “E taangaanga ana matou i teia tu komunikeiti anga i te au ngai mamao e no tetai tuatuaanga poto ua. Ei akaraanga, penei ka tono tetai papa i tana tamaiti ki ko i te toa i te oko mai i tetai varaoa paraa punupunu inara kua ngaropoina iaia i te pati kia oko mai aia i tetai tomati. Me e mamao roa te tamaiti i te akarongo mai i te tuatua, ka pui i reira tona papa i te akakite atu i te reira kiaia.”

E pui katoa ana te Au Kite o Iehova i tetai au taime i te komunikeiti ki tetai e tetai. Kua akamarama mai a Pedro e: “Me atoro au i tetai ngai tutuanga i vao roa e te inangaro ra i te pati i tetai taeake pae vaerua kia aru mai iaku, kare au e aere roa atu ki tona kainga. Ka pui ua au kiaia.”

“Kia kite matou e koai te ‘tuatua nei,’ ” i karanga ai a Pedro, “e pui ta matou na matou tataki tai. Tei matauia, ko te au tane Matateko ua te taangaanga ana i te tuatua pui. Penei ka marama tetai vaine i te reo e ka taangaanga i te reira i roto i te ngutuare tangata, inara kare aia e taangaanga i te reira i te komunikeiti ki tetai ua atu tane. Kare te reira i te akono anga tau.”

Kare te tuatua pui e na te iti tangata Matateko ua; ko tetai aronga pui e kiteaia ana i roto i te Kaneri Airani, i Papua Nu Kini, e i Tinito. E raveia ana teia e te au tangata e noo ra i runga i te au maunga e i roto i te au vaorakau mamaata. Ko te tika, e maata atu i te 70 te au reo pui penei te vai nei, e e 12 kua apiiia.

E mea umere tikai kia tatou te tu kite karape o te tangata. E tika rai, me kapiti koe i tera tu tareni ki te anoano pakari i te komunikeiti, ko te au kotinga ua ko tei akanooia e to tatou manako​—⁠e i te akaraanga kare e kotinga no te reira!

[Tataanga Rikiriki i Raro]