Baituti ba ba Kuliswa ki ku Eza Lituto ze Ñata

JENNIFER wa lilimo ze 17 hañata naa li yo muñwi wa baituti ba ne ba eza hande ni ku fita mwa sitopa sa naa li ku sona. Naa abananga mwa lipapali ze ñata ze ne ezwanga fa sikolo mi naa kutekiwa hahulu ki baluti ni baelezi ba fa sikolo. Kono mwa silimo sa mafelelezo a si ka kwaza kale sikolo, a kala ku opa hahulu toho ni ku ikutwanga ku nyembunya nako ni nako. U ikutwa kuli lihola ze ñata za naa tandanga inge a eza lituto za kwa sikolo ni ku sa bona buloko kona ze nee mu kulisanga.

Baituti ba bañata ba kula butuku bo bu swana ni bwa Jennifer. Palo ya baituti ba bañata ba ba kula butuku bo bu tiswa ki ku eza misebezi ye miñata hahulu kwa sikolo i sweli ya ekezeha, mi ba bañwi ba yo batanga likalafo kwa baalafi ba matuku a munahano. Ku ekezeha kwa palo koo ku tahisize kuli sikwata sa baluti ni babeleki ba fa likolo za mwa America ba eze tukiso ya ku kusufaza kwa matuku a tiswa ki ku eza lituto ze ñata kwa likolo. Tukiso yeo i bizwa kuli Challenge Success (Ku Tatulula Butata).

Haiba mu muituti, mwendi ka ku swana ni Jennifer mu sweli mwa lika ku tiyela butuku bo bu tiswa ki ku eza lituto ze ñata. Kamba haiba mu bashemi mu kana mwa bona butata bo bu sa feli bwa kopana ni bona mwanaa mina kuli a kondise kwa sikolo. Kana ku na ni simbule sa ketelelo ye tusa koo baituti ni bashemi ba bona ba kona ku fumana tuso?