Barutwana Bao ba Gateletšegilego

JENNIFER wa nywaga e 17 o be a dula a le gare ga barutwana bao ba phalago ba bangwe ka klaseng ya gagwe. O be a tšea karolo medirong e mentši ya ka morago ga sekolo e bile o be a ratwa ke barutiši gotee le ke baeletši ba gagwe. Eupša ngwageng wa pele ga ge a ka aloga, o ile a thoma go opša ke hlogo gotee le go tlaba-tlabja ke dibete kgafetša-kgafetša. O nagana gore diiri tše ditelele tša go tsepamiša kgopolo ka mo go tseneletšego tšeo a di feditšego mošomong wa gagwe wa sekolo gotee le go robala ganyenyane ke gona go mmaketšego malwetši.

Go na le ba bantši ba nago le mathata a go swana le a Jennifer. Palo ya barutwana bao ba gateletšegilego kudu sekolong go bonagala e oketšega, gomme ba bangwe ba bona ba nyaka thušo ya tša monagano. Ka baka la seo, sehlopha sa barutiši ba Amerika se hlomile lenaneo la go fokotša maemo a gateletšago dikolong. Lenaneo leo le bitšwa Katanela go Atlega (Challenge Success).

Ge e ba o le morutwana, mohlomongwe o gateletšegile go swana le Jennifer. Goba ge e ba o le motswadi, o ka no ba o bona kgateletšo e sa fokotšegego yeo morwa goba morwedi wa gago a lebeletšanego le yona ya go atlega sekolong. Na go na le mothopo o šomago wa tlhahlo woo barutwana le batswadi ba bona ba ka nyakago thušo go wona?