Batswadi ba ka Thuša Bjang?

MOKGATLO o mongwe wa tša thuto kua United States o hlohla barutwana ba sekolong se se phagamego ka gore: “Bontšhang maikemišetšo a lena ka go diriša matla a lena ka moka.” Ka go dirwa gore ba katanele go fihlelela dipakane tša bona, bafsa ba bangwe ba fetela ka kua ga matla a bona. Madeline Levine, yo go boletšwego ka yena sehlogong se se fetilego, o ngwadile gore: “Magareng ga dithuto tšeo di nago le tsebišo e ntši kudu, mediro e mentši ya ka morago ga sekolo, dithuto tšeo di lokišeletšago motho go ya sekolong se se phagamego goba kholetšheng, bahlahli le barutiši ba kgethegilego bao ba thwaletšwego go thuša barutwana go dira sohle seo ba ka se kgonago gore ba tšwelele dithutong tša bona, barutwana ba bantši ba ikhwetša ba swaregile kudu moo ba beago boemo bja bona bja maphelo kotsing.” Barutwana ba lego boemong bjo bjalo ba ka gobala mmeleng le maikwelong.

Ge e ba o tshwenyegile ka kgateletšego yeo ngwana wa gago a lebeletšanego le yona sekolong, e-ya sekolong ka bowena. Boledišana le barutiši, baeletši le balaodi ba sekolo. Ba botše seo o se lemogilego. O na le tshwanelo ya go dira bjalo.

Beibele e kgothaletša batswadi go ela hloko kudu kgolo ya bana ba bona. Moše o boditše batswadi ba Baisiraele gore: “O a [melao ya Modimo] tiišetšê bana ba xaxo; O bolêlê ôna Ò dutše ngwakong wa xaxo, le xe O le tseleng, xe O y’o rôbala le xe Ò tsoxa.”—Doiteronomio 6:7.

Go tshwenyega ka mo go tseneletšego ka thuto ya ngwana wa gago ga se go itsenya-tsenya ditabeng tše di sa go nyakego. Go bontšha gore ngwana wa gago o na le thekgo ya gago e lerato. Le gona seo se ka thuša ngwana wa gago ka go mo fokoletša kgateletšego sekolong.

 [Seswantšho go letlakala 16, 17]

Boledišana le barutiši le baeletši ba ngwana wa gago ka tekanyo ya kgateletšego ya gagwe