Ba Banca ba Buza Kuli

Ni Kona ku Eza Cwañi Kuli ni Ikole ku Bala Bibele?

Mu balanga ha kai Bibele? (Mu laitele mwa kambokisi ka li kañwi)

□ Ka zazi

□ Ka sunda

□ Ka linako ze ñwi ․․․․․

Mu feleleze mibamba ye latelela.

Ha ni sa ikolangi ku bala Bibele, hañata ki kabakala kuli  . . . (Mu laitele ze swanela)

□ Ni ikutwanga buzwa

□ Na lyanganehanga

□ Na filikanywanga

□ Mabaka a mañwi ․․․․․

KANA ha mu tabelangi hahulu ku bala Bibele? Haiba ku cwalo, u zibe mwa lumelelana ni Will wa lilimo ze 18, ya bulela kuli: “Ku bonahala kuli Bibele ya kona ku utwisa buzwa.” Kono u ekeza kuli: “Ku kona feela ku ba cwalo haiba ha mu zibi mwa ku i balela.”

Ki kabakalañi ha mu swanela ku ituta mwa ku balela Bibele? Kana mwa tabela ku ziba mwa ku

▪ ezeza liketo ze nde?

▪ fumanela balikani ba bande?

▪ tiyela matuku a mwa munahano a tiswa ki ku eza misebezi ye miñata?

Bibele i na ni likelezo ze nde fa litaba ze fahalimu ni ze ñwi ze ñata. Kono ku fumana likelezo zeo ku tokwa buikatazo. Niteñi, ku eza buikatazo bo bu cwalo ku swana ni ku bata maluwo a patilwe: Ha mu ka ikataza hahulu ku eza patisiso, hape mu ka tabela hahulu ze mu ka fumana!—Liproverbia 2:1-6.

Mu kona ku fumana cwañi maluwo mwa Bibele? Kapampili ke mu swanela ku puma ka ka kwa bulyo bwa likepe le, ka ka mi bonisa mo mu kona ku balela Bibele, mi kwa buse bwa kona ku na ni litaba ze bonisa mutatamanelo wa mo mu swanela ku i balela. Ku tuha fo, mu like liakalezo ze fa makepe a tatama ze mu tabela.

 Mwa kona ku fumana litaba ze ñata ka za “Ba Banca ba Buza Kuli” fa keyala ya fa Intaneti ya www.watchtower.org/ype

Haiba mu na ni Intaneti, mwa kona ku teeleza kwa ku baliwa kwa Bibele fa keyala ya www.watchtower.org/e/bible

ZA KU NAHANISISA

Ku bulelwanga kuli zaa fumana mutu mwa musebezi wa peta li itingile fa buikatazo bwa eza mwa ku peta musebezi wo.

▪ Taba yeo ki ya niti cwañi ha lu bala Bibele?

▪ Ki lili fo mu kona ku balelanga Bibele?

[Mbokisi/Siswaniso se si fa likepe 23]

MO MU KONA KU BALELA BIBELE

Pili mu si ka bala . . .

▪ Mu bone teñi kuli sibaka se mu li ku sona ki se si kuzize kuli mu si ke mwa filikanywa.

▪ Mu lapele kuli mu utwisise ze mu ka bala.

Ha mu nze mu bala . . .

▪ Mu itusise limapa ni maswaniso a bonisa litaba za mwa Bibele kuli li mi tuse ku eza inge ba ba bona luli makande a mwa Bibele.

▪ Mu nyakisise litaba kaufela, ni litaba ka butungi.

▪ Mu talime litaluso za kwatasi ni tutaku kaufela to tu libisa kwa lisupo ze ñwi.

▪ Mu ipuze lipuzo ze cwale ka:

LITABA ZA NITI: Taba ye, ne i ezahalile lili? Ki mañi ya naa bulezi manzwi a? Manzwi a naa bulelezwi bo mañi?

TALUSO: Ni kona ku taluseza cwañi mutu yo muñwi taba ye?

BUTOKWA: Ki kabakalañi Jehova Mulimu haa na ekelize taba ye kwa Linzwi la hae? Taba ye i patululañi ka za mwa inezi kamba mwa ezezanga lika? Ki lituto mañi ze ni kona ku sebelisa mwa bupilo bwa ka?

Ha se mu felize ku bala . . .

▪ Mu eze patisiso. Haiba za fumaneha mwa puo ya mina, mwa kona ku itusisa libuka ze hatisizwe ki Lipaki za Jehova, ze cwale ka Insight on the Scriptures ni “Liñolo Kamukana Li Tahile ka Moya wa Mulimu, mi Li Na ni Tuso.”

▪ Mu lapele hape. Mu taluseze Jehova ze mu itutile ni mo mu bata ku li sebeliseza. Mu itumele ku yena ka ku mi fa Linzwi la hae, yona Bibele.

 [Mbokisi/Siswaniso se si fa likepe 24]

 Ki Mutatamanelo O Cwañi Wa Mo Mu Swanela Ku Balela Bibele?

Ze mu kona ku keta . . .

□ Mu bale ku zwa kwa makalelo ku isa kwa mafelelezo.

□ Mu bale ka mo li tatamanela litaba, ibe ka mo li tatamanela libuka za mwa Bibele kamba mo li tatamanela likezahalo.

□ Zazi ni zazi mu bale kalulo i sili ya Mañolo.

La Mubulo: Litaba ze tabisa za kwaikale (Genese ku isa ku Estere)

La Bubeli: Litaba za bupilo bwa Jesu ni lituto za hae (Mateu ku isa Joani)

La Bulalu: Litaba za Bakreste ba makalelo (Likezo)

La Bune: Litaba za bupolofita ni liketelelo za muzamao (Isaya ku isa Malaki, Sinulo)

La Butanu: Litoko ze tabisa ni lipina ze tabisa (Jobo, Lisamu, Pina ya Lipina)

La Mukibelo: Butali bo bu pilisa (Liproverbia, Muekelesia)

La Sunda: Mañolo a naa ñolezwi liputeho (Maroma ku isa Juda)

Ku si na taba ni mutatamanelo o mu ka keta, mu bone teñi kuli mwa latelela tomahanyo yeo! Mu beye liswayo le ✔ kwa kauhanyo ye mu felize ku bala, kamba mwa kona ku itusisa muezezo ufi kamba ufi ka za likauhanyo ze mu felize ku bala.

Mu pume kambokisi ka, ni ku ka beya mwa Bibele ya mina!

[Mbokisi/Siswaniso se si fa likepe 24]

MU IKOLE KU BALA MAÑOLO

Mu tabele ze mu bala. Ka mutala:

□ Mu ñole mabizo a batu ba ba mwa taba ye, ka ku ya ka masika a bona.

□ Mu swanise tumbokisi. Ka mutala ha mu nze mu bala ka za taba ya musepahali yo muñwi, mwa kambokisi kwa lineku le liñwi mu ñole mwateñi tulemeno ni likezo za hae, mi ku le liñwi mu ñole limbuyoti za naa amuhezi.—Liproverbia 28:20.

[Siswaniso]

Mulikanaa Mulimu

↑ Ku ipeya ku utwa

↑ Ku sepahala

↑ ↑

Abrahama

□ Mu swanise maswaniso a bonisa taba yeo.

□ Mu swanise mukoloko wa tuswaniso-nyana to tu bonisa mutatamanelo wa likezahalo. Mu taluse ze ezahala fa kezahalo ye ñwi ni ye ñwi.

□ Mu pange sika se si bulezwi mwa taba, inge cwalo aleka ya Nuwe. Ka mutala, mu bone Mu Zuhe! ya Sikuwa ya January 2007, likepe 22.

□ Mu bale hamoho ka ku tiisa ni balikani kamba ba mwa lubasi lwa mina. Akalezo: Mu kete mutu a li muñwi kuli a bale manzwi a mutu ya kandeka likande leo. Ba bañwi ba kona ku ikabela ku bala manzwi a batu ba ba shutana ba ba mwa taba yeo.

□ Mu kete taba mi mu i eze inge kuli ki likande. Mu bihe taba yeo ka ku shutana-shutana ka ku buhisana ni batu ba ba bala manzwi a batu ba mwa taba yeo ni ba ba bala a batu ba ne ba iponezi lika zeo ha li ezahala.

□ Mu kete taba ye bonisa mutu ya naa ezize keto ye fosahalile mi mu nahane inge kuli naa si ka eza cwalo! Ka mutala, mu nyakisise mutala wa Pitrosi haa hana Jesu. (Mareka 14:66-72) Pitrosi naa swanela ku alaba cwañi hande mwa nako ye taata yeo?

□ Mu buhe kamba ku teeleza kwa madrama a litaba za mwa Bibele ze fa makaseti.

□ Mu iñolele drama. Mu kopanyeleze lituto ze kona ku itutiwa mwa taba yeo.—Maroma 15:4.

MWA KU EZEZA: Mu bapale drama ye ni kakwata ka balikani ba mina.

 [Mbokisi/Siswaniso se si fa likepe 25]

KULI MU SUSUEZWE

▪ Mu itomele sikonkwani! Kwatasi mu ñole lizazi fo mu ka kalela ku bala Bibele.

․․․․․

▪ Mu kete kalulo ya Bibele ye mu tabela hahulu. (Mu bone kambokisi ka ka li:  “Ki Mutatamanelo O Cwañi wa mo mu Swanela ku Balela Bibele?”) Cwale kwatasi mu ñole kalulo ya Bibele ye mu ka kalela ku bala.

․․․․․

▪ Mu kale ka ku bala ka nako ye kuswani. Nihaiba ku bala feela Bibele ka mizuzu ye 15 ha ku swani ni ku ina feela. Kwatasi mu ñole nako ye mu ka tandanga kwa ku bala Bibele.

․․․․․

Akalezo: Mu be ni Bibele ye mu ka itusisanga feela kwa ku ituta. Mu ñolange mwateñi lisupo. Mu swaye litimana sihulu ze mu utwisisa hande.

[Mbokisi/Maswaniso a fa likepe 25]

ZE LI BULELA LITAKA ZA MINA

“Ni likanga ku bala hanyinyani Bibele busihu ni busihu ni si ka lobala kale. Ku eza cwalo ku ni tusanga ku ba ni litaba ze nde za ku nahana ha ni nze ni ya fa buloko.”—Megan.

“Ni balanga timana iliñwi ka mizuzu ye 15. Ni balanga litaluso za kwatasi kaufela, ni talimanga tutaku kaufela to tu libisa kwa lisupo ze ñwi, mi ni ezanga patisiso ye ekezehile. Fokuñwi ha ni fezangi ku bala timana ka nako iliñwi feela, kono muezezo wo u ni tusanga ku utwisisa hande ze ni bala!”—Corey.

“Ka nako ye ñwi, ne ni balile Bibele mwa likweli ze lishumi. Ka mubalelo wo, ne ni konile ku bona swalisano ya likalulo ze shutana za mwa Bibele ze ne ni si ka utwisisa kwamulaho.”—John.

[Mbokisi fa likepe 25]

MU KETE!

□ Mu kete kezahalo. Mwa Bibele ku na ni makande a mande a mañata. Mu kete taba ye mu tabela, mi mu feze ku i bala.

Akalezo: Ka za mo mu kona ku itutela litaba ze ñata mwa taba ye mu bala, mu bone likepe 292 mwa buka ya Questions Young People Ask—Answers That Work, Volyumu 2, ye hatisizwe ki Lipaki za Jehova.

□ Mu kete buka ya Evangeli. Mu bale Mateu (buka ya Evangeli ye ne i ñozwi pili), Mareka (ye talusa likezahalo ze ñata ze tabisa), Luka (ye koñomeka butokwa bwa tapelo ni ku isa mamelelo kwa basali), kamba Joani (ye sa buleli ka butungi litaba ze bulezwi mwa libuka ze ñwi za Evangeli).

Akalezo: Mu si ka bala kale, ka bukuswani mu bone litaba ka za buka yeo ya Bibele ni muñoli wa yona ilikuli mu kone ku utwisisa hande shutano ye mwahalaa buka yeo ni libuka ze ñwi za Evangeli.

□ Mu kete samu. Ka mutala:

Haiba mu ikutwa buinosi, mu bale Samu 142.

Haiba mu zwafisizwe ki mifokolo ya mina, mu bale Samu 51.

Haiba mwa kakanya butokwa bwa likuka za Mulimu, mu bale Samu 73.

Akalezo: Mu buluke mukoloko wa lisamu ze mu balile ili ze mi susuelize hahulu.

[Mbokisi fa likepe 26]

MU BATISISE HAHULU

▪ Mu nyakisise litaba kaufela. Mu tatubisise fo ne li ezahalezi litaba zeo, ko ne li ezahalezi, ni miinelo ye nee li teñi.

Mutala: Mu bale Ezekiele 14:14. Daniele naa swanela ku ba wa lilimo ze kai Jehova ha naa mu pundile kuli neeli mutu yo munde hamoho ni Nuwe ni Jobo?

Taba: Ezekiele kauhanyo 14 nee i ñozwi lilimo liketalizoho ku zwa feela fa naa iselizwe Daniele mwa Babilona —fo mwendi inge a sa nonoboka.

Litaba ze mu kona ku fumana ha mu eza patisiso: Kana Daniele naa li mwanana hahulu kuli Jehova a bone busepahali bwa hae? Ki liketo mañi ze nde za naa ezize kuli a fumane limbuyoti? (Daniele 1:8-17) Mutala wa Daniele u kona ku mi tusa cwañi kuli mu eze liketo ze nde?

▪ Mu nyakisise litaba ka butungi. Fokuñwi linzwi li li liñwi kamba a mabeli a likani.

Mutala: Mu bapanye Mateu 28:7 ni Mareka 16:7. Ki kabakalañi Mareka ha naa kopanyize taba ya kuli Jesu naa ka tuha a bonahala kwa balutiwa “ni Pitrosi”?

Taba: Mareka naa siyo ko ne li ezahalezi litaba ze, kono ku bonahala kuli naa li taluselizwe ki Pitrosi.

Litaba ze mu kona ku fumana ha mu eza patisiso: Ki kabakalañi Pitrosi ha naa ikutwile ku susuezwa hahulu ha naa utwile kuli Jesu naa bata ku mu bona hape? (Mareka 14:66-72) Jesu naa bonisize cwañi kuli nee li mulikanaa Pitrosi luli? Mu kona ku likanyisa cwañi Jesu ni ku ba mulikani luli wa ba bañwi?

▪ Mu eze patisiso ye ekezehile. Mu bate litaluso mwa lihatiso ze tomile fa Bibele.

Mutala: Mu bale Mateu 2:7-15. Baana ba ba nuha ka linaleli ne ba potezi lili Jesu?

Taba: Mu bone Tawala ya Mulibeleli ya January 1, 2008, likepe 31, ye hatisizwe ki Lipaki za Jehova.

Litaba ze mu kona ku fumana ha mu eza patisiso: Ku bonahala kuli Jehova naa babalezi cwañi lubasi lwa Jesu kwa mubili ha ne lu li mwa Egepita? Ku sepa Mulimu ku kona ku mi tusa cwañi ku tiyela miinelo ye zinga?—Mateu 6:33, 34.