Bafsa ba a Botšiša

Nka Dira Bjang Gore go Bala Beibele go Thabiše?

O bala Beibele ga kae? (Swaya e tee)

□ Letšatši le letšatši

□ Beke le beke

□ Tše dingwe ․․․․․

Feleletša lefoko le le latelago.

Ge ke sa thabele go bala Beibele, gantši ke ka gobane ke . . . (Swaya tšohle tšeo di go diragalelago)

□ Sa kgahlwe ke seo ke se balago

□ Gakanegile

□ Šitišega

□ Tše dingwe ․․․․․

NA GA o thabele go bala Beibele? Ge e ba go le bjalo, o ka dumelelana le Will wa nywaga e 18 yo a rego: “Beibele e ka bonagala e sa kgahliše.” Lega go le bjalo o oketša ka gore, “Go ba bjalo ge feela o sa tsebe go e bala.”

Ke ka baka la’ng o swanetše go ithuta kamoo o swanetšego go bala Beibele ka gona? Go ba gona, na o ka rata go tseba ka mo go oketšegilego mabapi le kamoo o ka

▪ dirago diphetho tše dibotse ka gona?

▪ bago le bagwera ba kgonthe ka gona?

▪ lebeletšanago le kgateletšego ka gona?

Beibele e na le keletšo e bohlale kudu ditabeng tšeo le tše dingwe. Ke therešo gore go hwetša keletšo e bjalo go ka nyaka maiteko. Eupša go oketša boiteko bjoo go swana kudu le go tsena lesolong la go nyaka lehumo: Ge go nyaka lehumo leo e le tlhohlo e kgolo, go le utolla le gona e tla ba mo go thabišago kudu!—Diema 2:1-6.

O ka utolla bjang mahumo a lego ka Beibeleng? Lepokisi le le lego ka letsogong le letona leo le ka ripšago le tla go nea kgopolo ya kamoo o ka balago Beibele ka gona, le gore o ka e bala ka tatelano efe—ka lehlakoreng la ka morago la lona. Gape, leka ditšhišinyo tšeo di lego matlakaleng a latelago tšeo o bonago di ipiletša go wena.

 Dihlogo tše di oketšegilego go tšwa lelokelelong la dihlogo tša “Bafsa ba a Botšiša” di ka hwetšwa mokerong wa Web wa www.watchtower.org/ype

Ge e ba o e-na le Inthanete, o ka bala Beibele go yona go www.watchtower.org/e/bible

SEO GO KA NAGANWAGO KA SONA

Go thwe seo o se hwetšago modirong se ithekgile kudu ka maiteko ao o a dirago.

▪ Seo ke therešo ka tsela efe ge go tliwa tabeng ya go bala Beibele?

▪ Ke neng moo o ka dirago nako ya go bala Beibele ka bowena?

[Box/​Picture on page 23]

Tsela Ya Go Bala Beibele

Pele o bala . . .

▪ Kgonthišetša gore o tikologong e homotšego e le gore o kgone go tsepamiša kgopolo.

▪ Rapelela kwešišo.

Ge o dutše o bala . . . 

▪ Diriša mmapa le diswantšho tša dipego tša Beibele go go thuša go bona ditiragalo tša Beibele ka leihlo la kgopolo.

▪ Ela hloko thulaganyo gomme o ahla-ahle dintlha ka botlalo.

▪ Bala mengwalo ya tlase gotee le ditšhupetšo tše di nyalelanago.

▪ Ipotšiše dipotšišo tše bjalo ka:

DITHEREŠO: Taba ye e diregile kae? Ke mang yo a boletšego mantšu a? O be a bolela le mang?

KGWEKGWE YA TABA: Nka hlalosetša motho yo mongwe taba ye bjang?

MOHOLA: Ke ka baka la’ng Jehofa Modimo a ile a akaretša pego ye ka Lentšung la gagwe? E utolla’ng ka semelo sa gagwe goba tsela yeo a dirago dilo ka yona? Ke dithuto dife tšeo nka di dirišago bophelong bja-ka?

Ge o fetša go bala . . . 

▪ Dira nyakišišo e oketšegilego. Diriša didirišwa tšeo di tšweleditšwego ke Dihlatse tša Jehofa tše bjalo ka Insight on the Scriptures gotee le “Mangwalo ka Moka a Buduletšwe ke Modimo Gomme a a Hola,” ge e ba di hwetšagala ka leleme la geno.

▪ Rapela gape. Botša Jehofa seo o ithutilego sona le kamoo o rerago go se diriša ka gona. Mo leboge bakeng sa Lentšu la gagwe, Beibele.

 [Box/​Picture on page 24]

O TLA BALA BEIBELE KA TATELANO EFE?

Dikgetho . . . 

□ Bala go tloga mathomong go fihla mafelelong.

□ Bala go ya ka tatelano, e ka ba ya kamoo dipuku di ngwadilwego ka gona goba ya ditiragalo.

□ Letšatši le letšatši, bala go tšwa karolong e fapanego ya Mangwalo.

Mošupologo: Histori yeo e tletšego ditiragalo (Genesi go ya go Esitere)

Labobedi: Bophelo bja Jesu le dithuto tša gagwe (Mateo go ya go Johane)

Laboraro: Bokriste bja pele (Ditiro)

Labone: Boporofeta le tlhahlo ya boitshwaro (Jesaya go ya go Maleaki gotee le Kutollo)

Labohlano: Direto tšeo di kgomago pelo gotee le dikopelo (Jobo, Psalme le Sefela sa Difela)

Mokibelo: Bohlale bjo bo šomago bophelong (Diema, Mmoledi)

Sontaga: Mangwalo ao a yago diphuthegong (Baroma go ya go Juda)

Go sa šetšwe gore ke mokgwa ofe wa go bala woo o o kgethago, kgonthišetša gore o dula o swaya seo o se balago. Swaya ka ✔ kgaufsi le kgaolo e nngwe le e nngwe ge o fetša go e bala, goba ka tsela e itšego dira pego ya dikgaolo tšeo o di badilego.

Ripa lepokisi le gomme o le boloke ka Beibeleng ya gago!

[Box/​Diagram on page 24]

DIRA GORE MANGWALO A PHELE!

E-ba karolo ya seo o se balago. Ka mohlala:

□ Dira malokelelo a maina go ya ka mašika a malapa a ona.

□ Dira ditšhate. Ka mohlala, ge o bala ka motho yo a botegago, tswalanya dika le ditiro tša motho yoo le ditšhegofatšo tšeo a di hweditšego.—Diema 28:20.

[Seswantšho]

Mogwera wa Modimo

↑ Go kwa

↑ Go botega

↑ ↑

Aborahama

□ Thala diswantšho go bontšha seo pego yeo e se bolelago.

□ Bontšha tatelano ya ditiragalo, ka go thala diswantšho tše bonolo tšeo di bontšhago ditiragalo tšeo. Hlalosa seo se diragalago tiragalong e nngwe le e nngwe.

□ Dira meago e menyenyane ya tshwantšhetšo, e bjalo ka areka ya Noa.—Ka mohlala bona Phafoga! (ya Seisemane) ya January 2007, letlakala 22.

□ Bala ka go hlaboša o e-na le bagwera goba ditho tša lapa. Tšhišinyo: Abela motho o tee go bala kanegelo. Ba bangwe ba ka tšea dikarolo tša baanegwa.

□ Kgethang pego, gomme le e fetoše pego ya ditaba. Bega ditiragalo go tšwa diponong tše mmalwa ka go akaretša “dipoledišano” le baanegwa-thwadi gotee le dihlatse tšeo di bonego ka mahlo.

□ Kgetha pego yeo go yona moanegwa a dirilego phetho e sego bohlale gomme o akanye ka mafelelo a fapanego! Ka mohlala, ela hloko ge Petro a be a latola Jesu. (Mareka 14:66-72) Petro a ka be a ile a arabela ka tsela efe e kaone kgateletšong yeo?

□ Bogela goba o theetše diterama tša Beibele tšeo di gatišitšwego.

□ Ingwalele terama ya gago. Akaretša dithuto tšeo di ka ithutwago go tšwa pegong yeo.—Baroma 15:4.

KGOPOLO: Bapala terama ye gotee le sehlopha se senyenyane sa bagwera ba gago.

 [Box/​Picture on page 25]

GORE O TUTUELETŠEGE

▪ Ipeele pakane! Ngwala letšatši-kgwedi leo o ka ratago go thoma mmalo wa gago wa Beibele ka lona ka mo fase.

․․․․․

▪ Kgetha karolo ya Beibele yeo e go kgahlago. (Bona lepokisi leo le rego, “O tla Bala Beibele ka Tatelano Efe?”) Ke moka ka mo fase o ngwale karolo ya Beibele yeo o tlago go e bala pele.

․․․․․

▪ Thoma go bala ka nako e nyenyane. Gaešita le metsotso e 15 ya go bala Beibele e kaone go feta go se e bale le gatee. Ka mo fase ngwala nako yeo o tlago go e beela ka thoko bakeng sa go bala.

․․․․․

Tšhišinyo: E-ba le Beibele yeo o e boloketšego feela bakeng sa go bala. Ngwala dintlha go yona. Swaya ditemana tšeo di go kgomago ka mo go kgethegilego.

[Box/​Pictures on page 25]

SEO DITHAKA TŠA GAGO DI SE BOLELAGO

“Ke leka go bala karolo e nye- nyane ya Beibele bošego bjo bongwe le bjo bongwe pele ke robala. Se se nnea selo se itšego se sebotse seo nka naganago ka sona ge ke dutše ke swarwa ke boroko.”—Megan.

“Ke tsepamiša kgopolo temaneng e tee ka metsotso e 15. Ke tla bala mongwalo o mongwe le o mongwe wa tlase, ke lebelele tšhupetšo e nngwe le e nngwe e nyalelanago le yona gomme ka dira nyakišišo e oketšegilego. Ka dinako tše dingwe ga ke fetše temana yeo ka nako yona yeo, eupša ke holega kudu ge ke diriša mokgwa wo mmalong wa-ka!”—Corey.

“Ke ile ka bala Beibele ka dikgwedi tše lesome. Ka lebelo leo ke ile ka bona kgokagano yeo ke sa kago ka e bona pele magareng ga dikarolo tša Beibele.”—John.

[Lepokisi go letlakala 25]

O KA IKGETHELA!

□ Kgetha tiragalo. Beibele e tletše ka dikanegelo tša bophelo bja kgonthe. Kgetha pego yeo e go kgahlago, ke moka o e bale go tloga mathomong go fihla mafelelong.

□ Kgetha Ebangedi. Bala Mateo (Ebangedi ya mathomo), Mareka (e tsebjago e le e laodišago dilo ka go akgofa le e tletšego ditiragalo), Luka (yeo e lebišago tlhokomelo e kgethegilego thapelong le go basadi) goba Johane (yeo e akaretšago karolo e nyenyane ya seo se begilwego Diebangeding tše dingwe).

Tšhišinyo: Pele o bala, ka boripana bala tsebišo ya mabapi le puku yeo ya Beibele le mongwadi wa yona e le gore o tle o kwešiše gakaone seo se dirago gore Ebangedi yeo e be e kgethegilego.

□ Kgetha psalme. Ka mohlala:

Ge o lewa ke bodutu gomme o se na bagwera, bala Psalme 142.

Ge e ba o nolega moko ka baka la mofokodi a gago, bala Psalme 51.

Ge e ba o belaela bohlokwa bja ditekanyetšo tša Modimo, bala Psalme 73.

Tšhišinyo: Boloka lelokelelo la dipsalme tšeo o di badilego tšeo di go kgothatšago e le ruri.

[Lepokisi go letlakala 26]

NYAKIŠIŠA

▪ Ela hloko thulaganyo. Hlahloba nako, lefelo le maemo ao taba yeo e ngwadilwego tlase ga ona.

Mohlala: Bala Hesekiele 14:14. Daniele a ka ba a be a e-na le nywaga e mekae ge Jehofa a be a mo hlalosa e le mohlala o mobotse gotee le Noa le Jobo?

Tshedimošo: Hesekiele kgaolo 14 e ile ya ngwalwa nywaga e mehlano feela ka morago ga gore Daniele a išwe bothopša Babilona—go ka direga gore e be e sa le mofsa yo a lego mahlalagading.

Thuto e bohlokwa: Na Daniele e be e le yo monyenyane kudu moo Jehofa a bego a ka se lemoge potego ya gagwe? Ke diphetho dife tše dibotse tšeo di dirilego gore a šegofatšwe? (Daniele 1:8-17) Mohlala wa Daniele o ka go thuša bjang gore o dire diphetho tše dibotse?

▪ Ahla-ahla dintlha ka botlalo. Ka dinako tše dingwe lentšu le tee goba a mabedi a bohlokwa.

Mohlala: Bapiša Mateo 28:7 le Mareka 16:7. Ke ka baka la’ng Mareka a ile a akaretša taba ya gore go se go ye kae Jesu o be a tla bonagala go barutiwa ba gagwe “gotee le Petro”?

Tshedimošo: Mareka e be e se hlatse e bonego ka mahlo ya ditiragalo tše; go molaleng gore o hweditše tsebišo ya gagwe go Petro.

Thuto e bohlokwa: Ke ka baka la’ng Petro a swanetše go kgothatšwa ke go kwa gore Jesu o be a nyaka go mmona gape? (Mareka 14:66-72) Jesu o ipontšhitše bjang e le mogwera wa kgonthe wa Petro? O ka ekiša Jesu bjang gomme wa ba mogwera wa kgonthe wa ba bangwe?

▪ Dira nyakišišo e oketšegilego. Bala dikgatišo tša Beibele bakeng sa ditlhaloso.

Mohlala: Bala Mateo 2:7-15. Balepi ba dinaledi ba ile ba etela Jesu neng?

Tshedimošo: Bona Morokami wa January 1, 2008, letlakala 31, o gatišitšwego ke Dihlatse tša Jehofa.

Thuto e bohlokwa: Go bonagala Jehofa a ile a hlokomela lapa la gabo Jesu bjang ka dilo tše di bonagalago ge le be le le Egipita? Go bota Jehofa go ka go thuša bjang go lebeletšana le maemo ao a gateletšago?—Mateo 6:33, 34.