Le Manatu o le Tusi Paia

Faamaoni i le Faaipoipoga—O le ā Lona Uiga Moni?

O le toʻatele o tagata e latou te faatalitalia ia paaga faaipoipo ina ia faamaoni le tasi i le isi i feusuaʻiga. O lenei manatu o le faamaoni i le faaipoipoga, e ōgatusa ma le Tusi Paia, lea e faapea mai: “Ia [faamamaluina] e tagata uma le faaipoipoga, ma ia leai se mea e faaleagaina ai le moega o le faaipoipoga.”—Eperu 13:4.

PO O le ʻaloʻalo ese mai i feusuaʻiga ma isi paaga, o le uiga atoa lenā o le faamaoni i le faaipoipoga? Ae faapefea le na ona mafaufau i feusuaʻiga e aofia ai se tasi e ese mai i lau paaga faaipoipo? Pe e ono avea ma “lē faamaoni” se faauōoga māfana ma se tasi o le isi itupā?

Pe Iai se Afāina o le na Ona Mafaufau i Feusuaʻiga?

O loo taʻua i le Tusi Paia o feusuaʻiga, o se vaega masani o le olaga faaipoipo, ma o se puna o le fiafiaga i le ulugalii ma e faamalieina ai. (Faataoto 5:18, 19) Ae e toʻatele tagata atamamai i aso nei ua talitonu e faapea, o se tu masani ma e lē afāina, mo se tagata ua faaipoipo ona tau ina mafaufau i feusuaʻiga ma se isi tagata. Pe e iai se afāina o le na ona mafaufau i feusuaʻiga, ae lē faatinoina?

O le na ona mafaufau i feusuaʻiga, ua taulaʻi patino atu i le faamalieina o le tagata lava ia. O na amioga manatu faapito e feteenaʻi ma le fautuaga a le Tusi Paia i tagata faaipoipo. Ua faapea mai le Afioga a le Atua e faatatau i feusuaʻiga: “E lē pule le avā i lona lava tino, ae e pule ai lana tane; e faapena foʻi ona lē pule le tane i lona lava tino, ae e pule ai lana avā.” (1 Korinito 7:4) Afai e mulimuli i le fautuaga a le Tusi Paia, o le a lē avea ai feusuaʻiga ma auala e faamalie ai tuʻinanauga manatu faapito o le tagata lava ia. O le iʻuga, o le a matuā fiafia ai paaga faaipoipo uma.—Galuega 20:35; Filipi 2:4.

O le mafaufau i feusuaʻiga i fafo atu o le faaipoipoga, e aofia ai le mafaufau i gaoioiga o le a fai, ma pe a faataunuuina, o le a faamanuʻalia ai faalogona o le isi paaga. Po o le tau ina mafaufau i feusuaʻiga, o le a faateteleina ai le faia o le mulilua? Ioe. Ua faafesootaʻi e le Tusi Paia mafaufauga i gaoioiga: “A ua faaosoosoina tagata taʻitoʻatasi ona ua tosina ma maileia i ona lava tuʻinanau. Auā a tō le tuʻinanau, ona fanau mai ai lea o le agasala.”—Iakopo 1:14, 15.

Na fetalai Iesu: “Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.” (Mataio 5:28) O le teena o le mafaufau i faiga e mulilua ai, ua e ‘leoleoina ai lou loto’ ma puipuia ai lau faaipoipoga.—Faataoto 4:23.

Aiseā e Tumau ai Ona E Faamaoni i Ou Faalogona?

O se faaipoipoga taulau manuia e manaʻomia ai ona “faauluulumamau le tuʻinanau” i lau paaga. (Pese a Solomona 8:6; Faataoto 5:15-18) O le ā le uiga o lenā mea? E ui o se tu  masani le iai o ni uō a itupā uma e lua i fafo atu o le faaipoipoga, ae e tatau ona faaalu le tele o lou taimi, o lou uaʻi atu, ma ou faalogona i lau paaga. O se faiā e faaalu ai le tele o mea, e tatau ona na o lau paaga, o se tasi lenā o ituaiga o le “lē faamaoni,” e tusa lava pe e leʻi faatinoina ni feusuaʻiga. *

E faapefea ona tupu o lenā faiā? Atonu o se tasi o le isi itupā e foliga mai e sili atu ona aulelei ma loto fesoasoani nai lo o lau paaga. O le faaalu o se taimi tele ma lenā tagata i le fale faigaluega po o ni faatasitasiga masani, e iʻu ai ina talanoaina ni mataupu patino, e aofia ai faafitauli po o mea ua e lē fiafia ai i lau faaipoipoga. E mafai ona tupu aʻe ai se lagona ua e faalagolago i lenā tagata. O le talanoa faafesagaʻi, i le telefoni, po o le initaneti, e iʻu ai ina lē toe talitonu le tasi i le isi. E faatalitalia e le paaga faaipoipo le tatau ona talanoaina nisi o mataupu e na o i laʻua lava, ma e lē faalauaʻiteleina a la mataupu ‘faalilolilo.’—Faataoto 25:9.

Ia faaeteete neʻi e mautinoa naʻuā e lē o iai ni ou faalogona fetosinaaʻi, ae o loo iai! Ua faapea mai le Ieremia 17:9, “e sili le faaʻoleʻole o le loto.” Pe a iai sau faauōoga māfana ma se isi tagata o le isi itupā, ia fesili ifo iā te oe lava: ‘Pe ou te ita pe a talanoaina lenā faauōoga, po o ou fai faalilolilo lenā faauōoga? O ā ni ou faalogona pe a faalogo ane lau paaga i au tala o loo fai? O ā ni oʻu faalogona pe a faia e laʻu paaga se faauōoga faapena?’—Mataio 7:12.

O se faiā lē talafeagai e iʻu ai i se tulaga malaia i le faaipoipoga, talu ai o faalogona māfana e oo atu i ni faiā māfana tau feusuaʻiga. E pei ona lapataʻi mai Iesu, ‘E sau mai le loto le mulilua.’ (Mataio 15:19) Ae peitaʻi, e tusa lava pe lē faia ai se mulilua, ae o āuga o le lē fetalitonuaʻi e matuā faigatā ona faaleleia. Ua faapea mai se avā e igoa Kerena: * “Ina ua ou iloa, na talanoa faalilolilo Mareko ma se fafine i le telefoni i nisi taimi o le aso, na taʻe ai loʻu fatu. E faigatā ona ou talitonu, e la te lē o faia ni feusuaʻiga. Ou te lē o mautinoa pe ou te toe talitonu iā te ia.”

Ia faia ni faauōoga ma tagata o le isi itupā i ni tulaga talafeagai. Ia aua neʻi e lē ano i faalogona sesē po o le taumafai e faapea e leai se afāina o na faalogona. Pe a e lagona e ono lamatia lau faaipoipoga i se faiā faapena, ia gaoioi loa e faaitiiti pe faamuta loa lenā faiā. Ua faapea mai le Tusi Paia: “O lē ua faautauta, na te iloa atu le leaga, ma lafi ai.”—Faataoto 22:3.

Puipuia Lau Faiā o le Tino e Tasi

Na fuafua e Lē na faia i tatou le faaipoipoga ina ia iai se faiā māfana a ni tagata se toʻalua. Na ia faapea mai, o le tane ma le avā e tatau ‘ona avea ma tino e tasi.’ (Kenese 2:24) O le faiā o le tino e tasi, e aofia ai mea e sili atu nai lo o le māfana tau feusuaʻiga. O loo aofia ai se fusi o faalogona māfana, lea e faamalosia i le fefaatuatuaaʻi e lē manatu faapito, ma le faaaloalo o le tasi i le isi. (Faataoto 31:11; Malaki 2:14, 15; Efeso 5:28, 33) O le faatatauina o nei mataupu silisili, o le a fesoasoani e puipuia ai lau faaipoipoga mai i le faaleagaina ona o le lē faamaoni i mafaufauga ma faalogona.

[Faaopoopoga i lalo]

PO O E TAUMĀNATU EA I NISI TAIMI?

▪ Pe e ono gaoioi ai se tasi ona o le mafaufau i feusuaʻiga?—Iakopo 1:14, 15.

▪ Pe e ono lamatia lau faaipoipoga ona o lau faauōoga māfana ma se isi o le isi itupā?—Ieremia 17:9; Mataio 15:19.

▪ E faapefea ona faamalosia le fusi o le faaipoipoga?—1 Korinito 7:4; 13:8; Efeso 5:28, 33.

[Faamatalaga faaopoopo i le itulau 15]

“Ai se tasi e vaavaai pea i se fafine ma manaʻonaʻo i ai, ua uma ona mulilua ma ia i lona loto.”—Mataio 5:28.