Pagpaniid sa Kalibotan

◼ Sa pagpaningkamot nga masagubang ang 2.2 milyones porsiyento nga implasyon, gipaubsan sa Zimbabwe ug napulo ka sero ang bili sa ilang kuwarta (papel de bangko) niadtong Agosto 2008. Busa, ang papel de bangko nga nagkantidad ug $10 ka bilyon nahimo nang usa ka “zimdollar” (dolyar sa Zimbabwe).”​—AGENCE FRANCE PRESSE, ZIMBABWE

◼ “Kapin sa 12,000 ang gitaho nga napusilan ug namatay didto sa Amerika sa 2005. Apan mas daghan pa ang napusilan nga wala mamatay​—duolan sa 53,000 ang gitambalan diha sa mga emergency room niadtong 2006.”​—THE SEATTLE TIMES, U.S.A.

◼Sulod sa 35 ka tuig gikan sa 1970 hangtod sa 2005, 25 porsiyento sa mga mananap nga dunay dugokan​—isda, mananap nga mabuhi sa tubig ug sa mamala, reptilya, langgam, ug mga mananap nga sus-an​—ang nangapuo.​—SÜDDEUTSCHE ZEITUNG, GERMANY

“Malipayong” Pasko?

Mga 20 porsiyento sa mga kaso sa diborsiyo sa Australia ang gisugdan liwas sa Pasko ug Bag-ong Tuig, nag-ingon ang Sunday Telegraph sa Sydney. “Daghan ang mag-away o magbulag atol sa maong mga selebrasyon ug mangadto dayon sa among opisina inig-pangabli namo,” matod pa sa usa ka abogado sa diborsiyo nga si Barry Frakes. “Nagdahom ang mga tawo nga magmalipayon ang ilang Pasko sama sa makita diha sa mga salida sa TV ug sa mga panganunsiyo.” Kon dili ingon niana ang mahitabo, siya midugang, makigdiborsiyo dayon sila. Apan, sumala kang Angela Conway, nga tigpamaba sa Australian Family Association, “ang diborsiyo panagsa rang makasulbad sa dugay na kaayong mga problema o makahatag kalinaw ug kalipay.” Siya nagsugyot: “Mas maayo pang mounong ka sa imong kapikas ug maningkamot nga masulbad ang mga problema.”

“Balay Alang sa mga Mabdos” Nakaluwas ug Kinabuhi

Ang Peru naningkamot pag-ayo nga mamenosan ang gidaghanon sa mga inahan nga mangamatay inigpanganak. Aron maaghat ang mga babaye sa Andes nga magpahiling ug manganak sa klinika imbes sa balay, 390 ka “balay alang sa mga mabdos” ang gibuksan sa Peru sulod sa miaging dekada. Ang mabdos nga babaye ug ang iyang pamilya makaestar sa usa niana nga mga balay hangtod manganak. Ang matag usa nianang mga balaya nahimutang tapad sa usa ka klinika. Ang balita sa Reuters gikan sa Cuzco nag-ingon nga ang usa sa makapadani niining maong mga klinika mao ang pagsagol sa “modernong pagpanambal ug sa ilang mga kostumbre,” sama sa “pagpanganak nga nagtindog,” nga “makapamenos sa gidugayon sa pagbati ug sa pagpanganak . . . ug makatan-aw pag-ayo ang inahan sa paggawas sa bata kay sa nianang maghigda siya.”

Pirmeng Ulahi

Sumala sa report sa U.S. Department of Transportation sa 2008, duolan sa 30 porsiyento sa tanang gieskedyul nga biyahe sa ayroplano sa Amerika ang madelatar ug kapin sa 15 minutos. Lakip sa pirmeng maulahi mao ang biyahe gikan sa Texas paingon sa California.