Faaaogā Sesē o Fualaau

NA FAAPEA mai Lina: “Na amata ona ou faaaogā sesē fualaau na faatonu mai e le fomaʻi i le 14 o oʻu tausaga. * Na tusi mai e le fomaʻi fualaau e pulea ai laʻu ʻai ona sa ou manatu, ou te aulelei pe a ou paee. Seʻi iloga e vivii aʻu e tama ona ou fiafia lea. Na oo ina ou faaaogāina fualaau faasāina ma ola ai i se olaga lē mamā ona o na mea. Sa ou taumafai pea ia maua le fiafia e sili atu.”

Na maua se fafine e igoa iā Myra i le maʻi ulu, ona faatonu lea e le fomaʻi e inu fualaau e teʻa ai le tigā. Ae na faasolo ina tele fualaau na ia inuina e faateʻa ai le tigā o lona ulu, ma ua ola faalagolago foʻi i ai. E lē gata i lea, na ia inuina fualaau na tusi mai e le fomaʻi mo tagata o lona aiga.

Ua lipotia mai le faatupulaʻia o talavou ma tagata matutua o loo faaaogā sesē fualaau ina ia toʻafilemu ai, faateʻa ai le popole, ia ala ai mata, e faapaee ai, pe maua ai foʻi le fiafia. O loo maua i aiga le tele o nisi fualaau o loo faaaogā sesē, e pei o fualaau o mea tigā, ma fualaau e faatoʻafilemu ai, e faaala ai mata, ma faateʻa ai le popole. * E aofia ai foʻi ma fualaau e aogā e moe ai, e teʻa ai le poloka o le mānava, ma teʻa ai le patapata o le tino.

O lenei faafitauli ua taatele ma ua faatupulaʻia. I vaega o Aferika, Europa, ma Asia i Saute, ua sili atu ona faaaogā sesē fualaau e faatonu mai e le fomaʻi nai lo fualaau faasāina. I Amerika, ua sili atu foʻi ona faaaogā sesē fualaau mai le fomaʻi nai lo fualaau faasāina, seʻi vaganā ai le mariuana. I se lipoti lata mai a se nusipepa, o tamaiti i le 12-17 tausaga ua sili ona latou “faaaogā sesē fualaau mai le fomaʻi nai lo fualaau faasāina.” O le alumia tele o na fualaau ua faatupulaʻia ai pisinisi e faatau fualaau pepelo i tagata.

E faapefea ona puipuia oe ma lau fanau mai le faaaogā sesē o fualaau mai i le fomaʻi, po o fualaau faasāina? O le a iloiloina na fesili i le mataupu o loo sosoo mai.

[Faaopoopoga i lalo]

[Pusa i le itulau 3]

Ua faapea mai se lomifefiloi faafomaʻi, “E iloa ua pulea se tagata i fualaau ona ua ova le inu fualaau; pe inuina foʻi ae e lē maʻi; po o le inu pea e ui o loo afāina ai.” Ua pulea se tagata i fualaau pe afai ua fai ma ana masani.

E iloa le ola faalagolago o se tagata i fualaau pe a vaaia e maʻi pe iai nisi āuga lē lelei iā te ia ona ua tuu se fualaau po o se vai na tusi mai e le fomaʻi. O le mea lea e masani ona tupu, ae e lē tutusa ma le pulea e fualaau.

Ua lē ila pe ua lē aogā le fualaau pe afai e tatau ona faatelē le inumaga i lo le mea e masani ai ina ia teʻa ai le tigā.