Se Mea e Sili Atu i lo Fualaau

INA ua 32 tausaga o Lina lea na taʻua i le mataupu muamua, na “tumu [o ia] i lagona nofosala, ma e na o le malaia ma le oti na manatu i ai,” talu ai lona faaaogā sesē o fualaau. Na tusi mai o ia: “Na ou manaʻo ia avea aʻu o se tinā ma se avā lelei, ae ua faanoanoa mea uma i loʻu olaga faapea ma le lalolagi, ma e leai se uiga e taumafai ai. O taimi uma na ou taumafai ai, ou te lē taulau.”

Ona amata lea ona suʻesuʻe Lina ma Molimau a Ieova. E leʻi umi ae ona maua le filemu o le loto ma le fiafia, lea na ia faamatalaina “o se faalogona e sili ona manaia ua oo iā te aʻu.” O le malamalama i taʻiala o le Tusi Paia faapea le faamoemoe matagofie mo le lumanaʻi, na uunaʻia ai o ia e faamamā lona olaga ma manumalo i lana masaniga leaga.

 Taʻiala o le Olaga

Ua faapitoa mo i tatou tulafono ma taʻiala o loo i le Tusi Paia, mai i Lē na faia i tatou o Ieova le Atua. Ua faapea mai le Salamo 19:7, 8: “E sao le tulafono a Ieova, e faafoʻisia [faafouina] mai ai le agaga. . . . E tonu feʻau a Ieova, e faafiafia ai le loto; e mamā poloaʻiga a Ieova, e malamalama ai mata.”

O se faataʻitaʻiga ua timaʻi mai le 2 Korinito 7:1 ia ‘tatou faamamā i tatou mai i mea uma e faaleagaina ai le tino ma le agaga.’ Na ave i fale e Lina lenā fautuaga mai le Tusi Paia ma na aogā e tuu ai lana masaniga leaga. E faapea foʻi Myra lea na taʻua i le mataupu muamua o lenei faasologa. Atonu o e manatua na pulea o ia e fualaau na tusi mai e le fomaʻi mo lona maʻi ulu. Na faapefea ona faaleleia e Myra lona faafitauli? Na talanoa ma lana fomaʻi ma sa fesoasoani iā te ia e saʻili nisi togafitiga. * Na ia faaaogā foʻi faalaeiauga faaleagaga mai toeaina o le faapotopotoga.

Sa taufai tatalo uma Lina ma Myra mo se fesoasoani. Ua faapea mai le Filipi 4:6, 7: “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai le Atua, lea e silisili i mea uma lava e manatu i ai.” Na maua e se auauna a le Atua i aso anamua le toʻafilemu o lona loto ma na tusi o ia e faapea, ina ua ‘tele o manatunatu [popolega] i lona loto,’ o afioga a le Atua na faamāfanafana ai o ia ma maua ai le fiafia. (Salamo 94:19) E maua faamāfanafanaga faapena mai i le Tusi Paia, ma e ala mai i faalaeiauga ma le lagolagosua a le ʻauuso Kerisiano e aofia ai ma toeaina.

Peitaʻi, i nisi taimi, e ono lagona ai e se tagata ua leai sona aogā ona o loo ia faaaogā sesē fualaau. Na faapea mai Janice, o se Kerisiano sa tele tausaga o ia faaaogā sesē fualaau sa tusi mai e fomaʻi: “O tagata e pulea e fualaau, ua vaivai lava faaleagaga, ma ua lē fiafia iā te ia lava, ma faafaigatā ai pe ua lē mafai foʻi ona liliu atu iā Ieova mo se fesoasoani.” I na tulaga, e tāua ona latou saʻili atu  i Kerisiano taʻumatuaina mo se fesoasoani. O a latou faalaeiauga alofa ma le faapalepale, ma a latou tatalo o le faatuatua, e mafai ona “malosi ai le tagata maʻi.” (Iakopo 5:15) Afai o lē ua aafia o se talavou, e tatau i mātua ona saʻilia se fesoasoani faaleagaga ma ave e vaai se fomaʻi ina ia toe malosi ai o ia.

Na oo atu Janice i se falemaʻi faapitoa, ma na mafai ai ona manumalo i lona faafitauli, ma ua lē toe tagofia ai fualaau. Na tusi mai o ia e faapea: “Na ou faalagolago iā Ieova ina ia ou fesagaʻia taimi faigatā. Ua ou maua le toʻafilemu, ma ua ou lagona le fiafia lea sa iai muamua.”

Pe a Mou Atu Faafitauli

E oo mai le aso o le a lē toe iai ni fualaau. E faapefea? Ua tali mai le Faaaliga 21:3, 4 e faapea: “Ua iai i tagata le faleʻie o le Atua . . . E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua [e aofia ai faafitauli i aso nei].”

Ua faatusa e le Tusi Paia le faamoemoe o Kerisiano i se “taula i o tatou ola, e mautinoa ma mausalī.” (Eperu 6:18, 19) I aso anamua, pe a afātia se vaa, e lafo e le ʻauvaa le taula i le sami, ma e magoto ma mau i le ilititai, ma saogalemu ai le vaa ia lē tutaʻia i le āʻau po o le matafaga. E faapena le faamoemoe o loo i le Tusi Paia, e “mautinoa ma mausalī” ma e aogā ia toʻafilemu ai o tatou faalogona, mafaufau, ma le faaleagaga, pe a pei o afā le oo mai o tofotofoga, ma e lē mafai ona lē oo mai!

E lelei ona iloiloina le Tusi Paia ma iloa ai le aogā o fautuaga ma aʻoaʻoga o loo iai, ma faalaeiauina ai. E naunau Molimau a Ieova e fesoasoani iā te oe, ma o le a e fiafia ai.

[Faaopoopoga i lalo]

[Faamatalaga faaopoopo i le itulau 9]

“Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga . . . , ona leoleoina ai lea o o outou loto ma mafaufau i le filemu mai le Atua.”—Filipi 4:6, 7

[Pusa/Ata i le itulau 10]

AUALA AOGĀ E OLA LELEI AI

Ua taʻua i se tusi e faatatau i le aogā o le mafaufau i mea lelei, o le faamalositino, e ono “faaleleia ai ou faalogona ma aumaia ai se mapusaga mai i mafatiaga.” E aogā foʻi le taumafa i taumafa tatau, ma sui au masaniga i le faaletino ma le mafaufau. Seʻi manatu iā Valelia, o lē sa faaaogā sesē fualaau a o laʻitiiti. Na oo ina pulea o ia e fualaau, a itiiti mai e 12 fualaau eseese o ituaiga e faatonu mai e fomaʻi. Peitaʻi, sa mafai ona tuu lana masaniga ma ola e pei ona sa iai muamua. O le ā na aogā ia faia faapea?

Nai lo le matamata i le TV ma faitau tusi lē aogā, na faia se faasologa lelei a Valelia o le suʻesuʻe i le Tusi Paia ma sema le taimi e faitau ai lomiga faale-Tusi Paia a Molimau a Ieova, e aofia ai lenei mekasini. Sa tatalo pea o ia i le Atua mo le malosi, ma faaaogā le fesoasoani a le faapotopotoga Kerisiano, ma faaalu lona taimi i le faia o galuega lelei e pei o le talaʻi atu i isi le feʻau faamāfanafana mai i le Tusi Paia. E lē gata i lea, sa matuā suia ana taumafa, na tipi uma taumafa e lē aogā i le soifua mālōlōina. O le iʻuga, na ia maua le malosi e leʻi faatalitalia e ana fomaʻi. Ua lē o toe tagofia e ia fualaau talu mai lena taimi. *

[Faaopoopoga i lalo]