Pagpaniid sa Kalibotan

◼ “Mga 160,000 ka eksibit nangawagtang sa mga museyo sa tibuok Rusya.”—RIA NOVOSTI, RUSYA.

◼ “Ang Phoenix Mars Lander sa NASA nakakuhag hulagway nga nag-ulan ug niyebe sa Mars.”—“NASA MISSION NEWS,” U.S.A.

◼ “65 porsiyento sa mga drayber ug mga pasahero nga nangamatay sa kadalanan sa Gresya wala mogamit ug seat belt o helmet.”—EIKONES, GRESYA.

Nangawalang mga Bagahe

Ang mga tawo kanunayng mawad-ag mga bagahe dihang mosakay ug ayroplano. Ang International Herald Tribune nagtaho nga sa 2007, “42 milyones ka bag ang nangawala, 25 porsiyento nga mas daghan kay sa 2006.” Kadaghanan sa maong mga bag gihatod ngadto sa mga tag-iya niini sulod sa 48 oras, apan ang 3 porsiyento niini, “usa ka bag sa kada 2,000 ka pasahero, ang wala na gayod igkita.” Ang mga kompaniya sa ayroplano nakabayad ug $3.8 bilyones niadtong 2007 tungod sa nangawalang mga bag. Ang pipila ka hinungdan mao ang “pagdaghan sa mga pasahero, pag-apas sa ayroplano sa eskedyul sa biyahe,” dili maayong pagdumala sa mga bagahe, ug sayop nga pagbutang ug tag.

Nagpuyopuyong mga Katoliko

Ang usa ka panukiduki sa Pransiya nag-ingon nga “ang pagkawala na kaayoy impluwensiya sa relihiyon” maoy hinungdan sa kausaban sa kinabuhi ug mga prinsipyo sa mga tawo, bisag unsa pang relihiyona sila nasakop, nag-ingon ang magasing Population & Sociétés. Pananglitan, mga 88 porsiyento sa mga batan-on sa Pransiya nga nag-edad ug 18 ngadto sa 24 nag-angkong Katoliko, apan 80 porsiyento kanila dili moadto ug simbahan gawas kon dunay kasal, bunyag, o lubong. Ang pagkawala sa naandang mga batasan makita diha sa pamilya. Kuwarenta ka tuig kanhi, 1 sa 10 ka magtiayon ang nag-ipon bisag wala pa makasal. Karon, 9 sa 10 ka magtiayon ang nag-ipon bisag wala pa makasal. “Taliwala sa hinimba kaayong mga Katoliko, 75 porsiyento ang nagpuyopuyo,” sumala sa pagtuon.

Mga Mag-uuma sa India Naghikog

Sukad sa 2002, kapin sa 17,000 ka mag-uuma ang naghikog tuig-tuig sa India, kasagaran pinaagig pag-inom ug pamatay sa dangan, matod sa mantalaang The Hindu. Lakip sa mga kalisdanan nga giatubang sa mga mag-uuma mao ang hulaw, pag-us-os pag-ayo sa prisyo sa mga abot sa uma, pagtaas sa prisyo sa mga palaliton para sa pagtikad ug uma, ug problema sa pagpangutang sa bangko. Tungod niana, daghan ang mangutang sa mga tigpatanto, nga taas kaayog interes, mao nga malumos sa utang ang mga nanghulam. Aron mabayran ang ilang mga utang, ang ubang mga mag-uuma namaligyag mga organo sa ilang lawas. Apan kon dili na kana mosaler o wala nay laing kapaingnan, libolibo modangop sa bugtong sulbad nga ilang nahibaloan—paghikog.

Gagmayng mga Buaya sa Nilo Mag-estoryahanay sa Dili pa Mapusa

“Ang gagmayng mga buaya mag-estoryahanay samtang anaa pa sa itlog,” nga magsabot nga magdungan ug pusa, nag-ingon ang The Times sa London. Ang tingog sa mga buaya sa Nilo nga hapit nang mapusa girekord, ug dayon gipatokar diha sa usa ka pundok sa mga itlog. Ang mga buaya nianang pundok sa mga itlog misanong ug giuyog-uyog ang itlog nga nasudlan niini. “Ang nakadungog sa tingog niadtong mga buaya diha sa hapit nang mapusa nga itlog makigdungan sa pagpusa sulod sa napulo ka minutos,” nag-ingon ang report. Ang mga itlog nga wala makadungog sa tingog sa ubang mga buaya dili makadungan sa pagpusa.