Le Taimi e Amata ai le Ola o le Tagata

NA TAʻUA e Siana, “E sefulufitu tausaga o loʻu tinā a ua 7 1/2 masina lona maʻitaga, ma na fai lana faaiʻuga e faapaʻū lana pepe e ala i se auala faapitoa. Na ou ola, ou te leʻi oti ai.” *

O lenei molimau na tuuina atu i le 1996 e Siana i le 19 o ona tausaga, i luma o le komiti o le malo o Amerika ina ua fofogaina le mataupu e faatatau i le faapaʻū tama. I le fitu ma le afa masina lea na iai Siana i le manava o lona tinā, na atoa uma vaega o lona tino. Atonu e te ioe, o ia o se tagata i lea taimi, auā sa faaauau pea ona ola o ia ina ua faapaʻū o ia i lenā taimi.

O lea la, ina ua lima vaiaso o Siana i le manava o lona tinā, ma e na o le 1/3 inisi [1 senitimita] lona umi, pe e taʻu o ia o se tagata? E moni e leʻi atoa vaega o lona tino, ae ua atoa ona neula, e aofia ai ma lona faiʻai. E faa-8 ona tātā lona fatu i le minute ,ma faasolo ai le toto i ona alātoto. Afai e taʻu Siana o se tagata i le 7 1/2 masina a o iai i le manava o lona tinā, pe e lē talafeagai la ona faapea atu, o ia foʻi o se tagata i le lima vaiaso, e ui e leʻi atoa lona tino?

Le Ofoofogia o le Afuafuaina

E amata i le taimi e afuafua ai le tagata ona tutupu vaega o lona tino, ina ua tuufaatasi le fua mai le tinā ma le sua ola mai le tamā. E ala i masini faaonapōnei, ua mafai e saienitisi ona mātauina suiga mataʻina i totonu o lenei sela fou ua afuafuaina. Ua tuufaatasi sela mai le tamā ma le tinā, ma ua faia aʻe ai se tagata fou.

Ua amata mai i lenā sela e tasi le fausaga ofoofogia o le tino atoa o le tagata. E faatautaia e ou sela le galuega o le fausaga o lou tagata. O loo iai i sela mea e fafau aʻe ai mea uma e faatatau iā i tatou, o lo tatou maualuga, o foliga, lanu o mata ma le lauulu, ma le anoanoaʻi o isi uiga.

Mulimuli ane, pe a toe vaevae sela muamua e fai aʻi isi sela fou, o loo iai i sela fou uma le “ata” o le tagata o le a fanau mai. O le mea e ofo ai ona o nei sela uma, ua faapolokalameina e tupu mai ai ituaiga o sela eseese e manaʻomia, e aofia ai le sela o le fatu, sela o le faiʻai, ponaivi, paʻu, e oo lava i sela o o tatou mata. O le faapolokalameina o nei sela mai i le amataga e fafau aʻe ai se tagata fou, ua taʻu o se mea e ofoofogia tele.

Ua fai mai Dr. David Fu-Chi Mark, o se alii e lauiloa i suʻesuʻega i sela o le tagata: “Mai i le taimi faatoʻā avea le tagata ma sela, ua atoa uma mea o iai mo lona tuputupu aʻe o se tagata i lona olaga atoa.” O lana faaiʻuga i ai: “Mai lava i le amataga o le afuafuaina o le tagata, e  aunoa ma se masalosalo, o tagata taʻitasi uma, o se tagata fou.”

O le Tagata i Totonu o le Manava

I le taimi e afuafua ai le pepe i le manava o le tinā, ua avea ai o ia o se tagata e ese mai lona tinā, ae e lē o se vaega o le tino o le tinā. E iloa e le tino o le tinā, o le tagata fou o se mea e ese mai, ma e vave lava ona teena e le tino o le tinā pe ana lē seanoa le puipuiga faapitoa i le manava o lona tinā. O loo puipuia lenei tagata fou e le ʻafuʻafu, ma e ese o ia mai i so o se isi lava tagata.

Ua finau mai nisi e faapea, e masani ona fafano le pepe a se tinā pe a iai se faalētonu, o lea la, o le ā le eseesega o lenā mea ma le faapaʻū o se pepe? E telē lava le eseesega o le pepe e fafano ma le pepe ua fasiotia. I se atunuu i Amerika i Saute, i tamaiti e toʻa 1,000, e 71 o i latou e feoti a o leʻi atoa le tausaga o lo latou matutua. E ui ina toʻatele tamaiti e feoti a o laiti, ae e lē faapea ai ua talafeagai le fasiotia o se tamaitiiti e leʻi atoa sona tausaga. E lē o se mea e tatau ona faia!

O le mea e tāua ona o loo faamatala e le Tusi Paia le ola o le tagata a o iai i le manava o le tinā. Na tusi Tavita e faatatau i le Atua: “Na silasila mai ou fofoga i oʻu tino uma ina o afuafua; ua tusia foʻi uma lava i lau tusi.” (Salamo 139:16) E leʻi faapea mai Tavita ‘o se tino o afuafua,” a o “OʻU tino uma,” ma ua faailoa mai ai, na amata le ola o Tavita ina ua afuafua, a o leʻi fanau mai o ia. Na faagaeeina e le Atua Tavita e faailoa mai e faapea, ina ua afuafuaina vaega o lona tino, na faia e tusa ma mea ua “tusia” po o se fuafuaga, ma avea ai o ia ma tagata ma ona uiga uma ua iai.

Ia mātau faamolemole, e lē o fai mai le Tusi Paia e afuafua e se fafine se ʻafuʻafu. Nai i lo lea, o loo faapea mai: “Ua tō le fafine, o le tama tane!” (Iopu 3:3) O lea, e tusa ai ma le Tusi Paia, e avea le pepe ma tagata ola i le taimi e afuafua ai. Ioe, o le taimi tonu lenā e amata ai le ola o le tagata.

[Faaopoopoga i lalo]

[Ata i le itulau 14, 15]

O se pepe i le manava ua lima vaiaso le matua, e lē na o se ʻafuʻafu ae o loo iai mea uma e fafau mai ai se tagata

(lona lapoʻa saʻo i le lima vaiaso)