Ka ku ya ka Bibele

Kana Mwa Swanela ku Saba Bafu?

Batu ba mushobo o bizwa Annang wa mwa Nigeria ba lumela kuli haiba bafu ba sa bulukiwi ka likute ni tumbo ye swanela, mioyo ya bona i ka to kataza ba ba siyezi mwa lubasi kamba mane ku ba bulaya. Machaina ba bañwi ni bona ba lumela kuli haiba lizo za ku buluka bafu li sa latelelwi, mioyo ya bafu i ka taseza batu ba bañwi mane nihaiba ku ba bulaya.

TUMELO ya kuli ku na ni nto ye ñwi ye zwanga ku mutu ka nako ya lifu, ye cwale ka moyo, moya, silumba, ya zibahala hahulu mwa lizo ze ñata mwa lifasi. Batu ba bañata hape ba lumela kuli moyo kamba moya wo, wa kona ku kataza ba lubasi kamba balikani.

Niteñi, kana luli ku na ni nto ye ñwi ye zwelangapili ku pila mutu haa sa shwile? Mi kana “nto” yeo ya kona ku holofaza ba ba pila? Bibele i lutañi fa taba ye?

Kana Bafu ku na ni se ba Ziba?

Bibele i bulela kuli ba ba shwile “ha ba na se ba ziba.” Hape i bulela kuli bafu “ba inzi ku ba ba shwile.” (Muekelesia 9:5; Isaya 26:14) Ka za mutu wa pili Adama, Linzwi la Mulimu li talusa kuli: “Muñaa Bupilo Mulimu a bupa mutu ka liluli la lifasi, mi a bululela mwa lingo za hae moya wa ku pila, mi mutu a ba moyo o pila.”—Genese 2:7.

Mu lemuhe kuli Adama naa bupilwe a li moyo, ku talusa kuli naa li mutu ya pila. Ka ku ya ka Bibele, Adama naa si ka fiwa moyo wo no kona ku ipilela feela kwande a mubili wa hae. Kacwalo Adama ha naa ezize sibi, naa shwile. Naa bile “situpu sa ya shwile.” (Numere 6:6) Bibele hape i bulela kuli: “[Moyo] o eza sibi, ki ona o ka shwa.” (Ezekiele 18:4) Kaufela luna lu hozize sibi, kamba ku sa petahala, ku mutu wa pili Adama. Kacwalo ha lu shwa, moyo wa shwa.—Maroma 5:12.

Bibele ha i bulelanga ka za muinelo wa bafu, ha i itusisangi lipulelo ze taata, kono i itusisanga lipulelo ze lu kona ku utwisisa hande, ze cwale ka ku “swalwa ki buloko bwa lifu.” (Samu 13:3) Nako ye ñwi Jesu ha naa bulela ka za musizana wa lilimo ze 12, naa ize: “Haa si ka shwa, u lobezi.” Batu “ba mu seha, inze ba ziba kuli u shwile.” Kono Bibele i talusa kuli Jesu a mu zusa kwa buloko bwa lifu.—Luka 8:51-54.

Ne ku bile cwalo Lazaro ha naa shwile. Jesu naa bulelezi balutiwa ba hae kuli naa ya ku Lazaro ku “yo mu zusa.” Balutiwa ne ba si ka utwisisa za naa talusa Jesu, kacwalo “Jesu a ba taluseza, a li: Lazaro u shwile.” Muapositola Paulusi ni yena naa bulezi ka za batu ‘ba ne ba itobalezi mwa lifu,’ mi a bulela kuli ka nako yaa tomile Mulimu ba ka kutisezwa kwa bupilo.—Joani 11:11-14; 1 Matesalonika 4:13-15.

Mane, ha ku na fo i luta Bibele kuli moyo wa zwelangapili ku pila mutu ha saa shwile. Kacwalo ha lu swaneli ku saba bafu. Kono cwale ki nto mañi ye tahisa kuli batu ba lumele kuli ku na ni nto ye ñwi ku mutu ye zwelangapili ku pila mutu ha saa shwile? Mi kiñi se si tahisanga sabo ya kuli ba ba shwile ba kona ku holofaza ba ba pila?

Tuto ya Buhata

Bulapeli bwa buhata bu lutile kuli fa lifu, batu ha ba shwangi luli. Isali kwa makalelo a bupilo bwa batu, tuto ya kuli moyo ha u shwangi ne i lumelwa mwa lifasi kaufela. Kabakaleo, malena ba bañwi, ba ba cwale ka bo Faro ba Egepita wa kwaikale ha ne ba shwanga, ne ku bulaiwanga batanga ba bona kuli ba yo ba sebeleza mwa bupilo bwa kwapili.

 Batu ba bañata ba nyandisizwe ki lika ze ba susuelizwe ku lumela kuli ki mioyo kamba mioya ya ba ba shwile. Ba kozwi kuli ku nyandiswa ko, ne ku tisizwe ki mioyo ye nee si ka tabiswa ya bahabo bona ba ba shwile ni ba bañwi. Kono sina mwa boniseza Mañolo, taba ye haki ya niti. Mioya ye maswe ye sa bonwi ye bizwa badimona ki yona ye tasezanga batu, mi i tabela ku nyandisa ni ku sabisa batu.—Luka 9:37-43; Maefese 6:11, 12.

Mañolo a bulela ka za Satani kuli ki “ndatahe lishano,” ya “ifetula sibupeho sa lingeloi la liseli.” Satani ni badimona ba hae ba “pumanga lifasi kamukana.” (Joani 8:44; 2 Makorinte 11:14; Sinulo 12:9) Satani ki yena luli ya tahisezanga batu ku lumela kuli moyo ha u shwangi mi u kona ku holofaza ba ba pila.

Niteñi, batu ba ba lumela ze i bulela Bibele bona ba silelelizwe kwa buhata bo bu cwalo. Ba zibile niti ka za milelo ya Satani ya ku puma batu kuli ba lumele kuli batu ba ba shwile ba kona ku ambola ni ba ba pila. Sina mo i bulelela Bibele, niti ki ya kuli: “Ba ba pila ba ziba kuli ba ka shwa; kono ba ba shwile ha ba na se ba ziba.” (Muekelesia 9:5) Kaniti, Linzwi la Mulimu li na ni litaba za niti ze kona ku lu lukulula kwa buhata bwa za muinelo wa bafu!—Joani 8:32.

KANA MU KILE MWA IPUZA KULI:

▪ Kana bafu ku na ni se ba ziba?—Muekelesia 9:5; Isaya 26:14.

▪ Ki mañi ya tahisa tumelo ye atile hahulu ya kuli ku na ni nto ye ñwi ku mutu ye zwelangapili ku pila hamulaho wa lifu?—Joani 8:44.

▪ Lu kona ku fumana kai niti ka za muinelo wa bafu?—Joani 8:32; 17:17.

[Manzwi a fa likepe 19]

Haki bafu ba ba tabela ku nyandisa batu, kono ki libupiwa za moya ze maswe