Le Manatu o le Tusi Paia

Pe Tatau Ona E Fefe i Tagata ua Maliliu?

E talitonu tagata o le ituaiga o le Annang i Nigeria e faapea, afai e tanu tagata ua maliliu e aunoa ma le faia i ai o viiviiga ma faaaloaloga talafeagai, o le a faapogaia e o latou agaga o loo ola pea ni tulaga leaga—e aofia ai le oti—i tagata o o latou aiga. E talitonu foʻi nisi tagata Saina e faapea, afai e lē faatinoina tū masani i le tanuina o tagata ua maliliu, o le a osofaʻi ma fasiotia e le agaga o le tagata ua maliu isi.

UA TAATELE i le tele o aganuu i le lalolagi aoao le talitonuga, a oti le tagata, o loo iai se mea i lona tino o loo ola pea—le agaga, po o le aitu. E talitonu foʻi le toʻatele e faapea, e mafai e lenei agaga ona faalavelave i mataupu fai a tagata o o latou aiga po o uō.

Peitaʻi, po o iai moni se mea e ola pea pe a oti le tagata? Ma pe e mafai e lenā “mea” ona faaleagaina i latou o loo ola? O le ā le manatu o le Tusi Paia?

Po o Iloa e Tagata ua Maliliu ni Mea?

Ua taʻua i le Tusi Paia e faapea, o i latou ua maliliu e “latou te lē iloa se mea.” O loo faapea mai foʻi, o ē ua maliliu “o agaga i latou.” (Failauga 9:5; Isaia 26:14) E tusa ai o le uluaʻi tagata, o Atamu, ua faamatalaina e le Afioga a le Atua e faapea: “Ona faia lea e Ieova le Atua o le tagata i le efuefu o le eleele, ma ua mānava i ona pogaʻiisu o le mānava ola; ona avea ai lea o le tagata ma tagata ola.”—Kenese 2:7.

Ia mātau, na foafoaina Atamu e avea ma tagata ola. Pe a fua i le Tusi Paia, e leʻi tuuina iā Atamu se agaga e mafai ona ola ese mai i lona tino. O lea la, ina ua agasala Atamu, na oti o ia. Ua avea o ia ma “tagata oti.” (Numera 6:6) Ua taʻua foʻi i le Tusi Paia, “O le tagata e agasala e oti ia.” (Esekielu 18:4) Ua tuufaasolo mai iā i tatou uma le agasala, po o le lē lelei atoatoa, mai i le uluaʻi tagata, o Atamu. O lea la, pe a tatou feoti, ua oti foʻi le tagata.—Roma 5:12.

Pe a faamatala e le Tusi Paia le tulaga o ē ua maliliu, e lē o faaaogāina ai ni faaupuga e faigatā ona malamalama i ai, ae o loo faaaogā faaupuga e mafai ona tatou malamalama i ai, e pei o le “moe i le oti.” (Salamo 13:3) I se tasi taimi, na fetalai ai Iesu e uiga i se teineitiiti e 12 tausaga e faapea: “E leʻi oti le teine, o loo moe.” Sa “toē faaamuamu [tagata] iā te ia auā ua latou iloa ua oti le teine.” Peitaʻi, ua faamatalaina i le Tusi Paia e faapea, na fafagu o ia e Iesu mai le moe i le oti.—Luka 8:51-54.

O le tulaga foʻi e tasi ina ua oti Lasalo. Na taʻu atu e Iesu i ona soo o le a alu e asiasi iā Lasalo, “e fafagu iā te ia auā o loo moe.” E leʻi malamalama soo i le uiga o le fetalaiga a Iesu, a ua “fetalai saʻo atu Iesu iā i latou: ‘Ua oti Lasalo.’” Sa tautala foʻi le aposetolo o Paulo e uiga iā i latou “o ē ua feoti,” ma taʻua e faapea, i le taimi atofaina a le Atua, o le a toe faatutūina i latou mai i le oti.—Ioane 11:11-14; 1 Tesalonia 4:13-15.

O le mea e mataʻina ai, e leai se vaega o le Tusi Paia o aʻoaʻo mai ai e faapea, e iai se agaga e ola pea pe a maliu se tasi. O lea la, e leai se māfuaaga e fefefe ai fua i tagata ua maliliu. O le ā la le pogai o le talitonuga ua taatele e faapea, e iai se vaega o le tagata e ola pea pe a oti? Ma o le ā le māfuaaga o le fefefe e faapea, e mafai e tagata ua maliliu ona faaleaga i latou o loo ola?

E Pepelo—E Taufaasesē

Ua faaauiluma e lotu sesē le manatu e faapea, a feoti tagata, e lē o feoti moni lava. I le amataga o le talafaasolopito o le tagata, na talia ai i le lalolagi aoao le aʻoaʻoga i le ola pea o le agaga pe a oti. O le iʻuga, ina ua maliliu nisi o taʻitaʻi—e pei o Farao i Aikupito anamua—sa fasiotia foʻi a latou pologa ina ia auauna atu i nei taʻitaʻi i le olaga i le lumanaʻi.

 O le toʻatele o tagata ua faataugā e mea ua latou talitonu i ai o agaga o ē ua maliliu. Ua faatalitonuina i latou e faapea, o lenei faataugā e māfua mai i agaga o tagata o aiga ma isi ua maliliu, o loo faasoesa solo. Peitaʻi, e pei ona faaalia manino mai i le Tusi Paia, e lē saʻo lenei manatu. O agaga malolosi e lē vaaia e taʻu o temoni, o loo i tua o na osofaʻiga, ma e latou te fiafia e faataugā ma faafefe tagata.—Luka 9:37-43; Efeso 6:11, 12.

Ua faamatalaina i le Tusi Paia Satani o “le tamā o le pepelo,” o lē “e fai ma liua . . . o ia lava e avea ma agelu o le malamalama.” O ia ma ana temoni o loo “faasesēina le lalolagi atoa.” (Ioane 8:44; 2 Korinito 11:14; Faaaliga 12:9) O le mea moni, o Satani o loo i tua o le pepelo e faapea, e ola pea le agaga pe a oti le tagata, ma e mafai ona faaleagaina tagata o loo ola.

Peitaʻi, o i latou ua talitonu i le Tusi Paia, ua puipuia mai i le faasesēina i na pepelo. Ua latou iloa o loo taumafai Satani e faasesē tagata e ala i le talitonu e faapea, e mafai e tagata ua maliliu ona fesootaʻi ma i latou o loo ola. O le mea moni, e pei ona taʻua i le Tusi Paia: “O ē ua ola, ua latou iloa e oti i latou; a o ē ua oti, latou te lē iloa se mea.” (Failauga 9:5) Ioe, o loo iai i le Afioga a le Atua upu moni, lea e mafai ona faasaʻoloto ai i tatou mai i pepelo, e faatatau i le tulaga o ē ua maliliu!—Ioane 8:32.

PE SA E TAUMĀNATU?

▪ Po o iloa e tagata ua maliliu ni mea?—Failauga 9:5; Isaia 26:14.

▪ O le ā le pogai o le talitonuga ua taatele e faapea, e iai se vaega o le tagata e ola pea pe a oti?—Ioane 8:44.

▪ O fea e mafai ona tatou maua mai ai le upu moni e faatatau i le tulaga o ē ua maliliu?—Ioane 8:32; 17:17.

[Faamatalaga faaopoopo i le itulau 31]

E lē o tagata ua maliliu, ae o agaga leaga e fiafia e faataugā tagata