Ncolyaamba Bbaibbele

Sena Mweelede Kubayoowa Bafwide?

Bantu bamwaambo waci Annang mucisi ca Nigeria basyoma kuti ikuti bantu ibafwa taakwe nobazikkwa munzila yeelede iitondezya kuti balalemekwa, mizimo yabo ilakonzya kuleta mapenzi—nokuba kujaya ibanamukwasyi. Bantu bamwi bakucisi ca China abalo basyoma kuti ikuti tunsiyansiya tujatikizya kuzikka muntu taakwe notwatobelwa, mizimo yabafwide ilakonzya kubalwana nokuba kujaya bantu.

KUSYOMA kuti ciindi muntu afwa kuli cintu cizwa mumubili—muuya, muzimo, ceelo—kulidumide muziinga zinji munyika yoonse. Alimwi bantu banji basyoma kuti muuya naa muzimo ooyu ulakonzya kutola lubazu mutwaambo tujatikizya banamukwasyi naa balongwe.

Nokuba boobo, sena ncobeni kuli cintu cimwi cizumanana kupona muntu afwa? Alimwi sena “cintu” eeco cilakonzya kubalwana baumi? Ino ncinzi ncolyaamba Bbaibbele?

Sena Bafwide Kuli Ncobazyi?

Ibbaibbele lyaamba kuti bafwide “tabezi cintu niciba comwe.” Alimwi lyaamba kuti bafwide “tabaciponi.” (Mukambausi 9:5; Isaya 26:14, BT) Kujatikizya muntu wakusaanguna, Adamu, Ijwi lya Leza lyaamba kuti: “Jehova Leza wakabumba muntu. Wakamubumbya bulongo bwaansi, wamufulida mumpemu zyakwe muuya wabuumi, nkabela mpawo muntu wakaba muumi.”—Matalikilo 2:7.

Amubone kuti Adamu wakalengwa kali muntu uupona. Kweelana ancolyaamba Bbaibbele, Adamu taakwe naakapegwa cintu cakali kukonzya kuzumanana kupona kakutakwe mubili wakwe. Aboobo ciindi Adamu naakabisya, wakafwa. Wakaba “mutunta.” (Myeelwe 6:6) Ibbaibbele alimwi lyaamba kuti: “Muntu uubisya, ngonguwe uuyoofwa.” (Ezekieli 18:4) Toonse twakakona cibi, naa kutalondoka kuzwa kumuntu wakusaanguna, Adamu. Aboobo tulafwa.—Ba-Roma 5:12.

Ciindi Bbaibbele nolipandulula ciimo cabafwide, talibelesyi mabala ngotutazyi, pele libelesya mabala ngotukonzya kumvwisya, mbuli aakuti ‘koona mulufwu.’ (Intembauzyo 13:3) Cimwi ciindi Jesu wakaamba boobu kujatikizya musimbi wakajisi myaka yakuzyalwa iili 12: “Tafwide pe, uloona.” Bantu bakatalika “[ku]museka mbobali kuzi kuti musimbi wafwa.” Nokuba boobo, Bbaibbele lipandulula kuti Jesu wakamubusya musimbi ooyu kuzwa kuŋonzi zyalufwu.—Luka 8:51-54.

Eeci ncecakacitika akuli Lazaro naakafwa. Jesu wakaambila basikwiiya bakwe kuti wakalilibambilide kuunka kuli Lazaro kutegwa “[a]kamusinsimune.” Basikwiiya taakwe nobakamvwisya ncaakali kwaamba Jesu, aboobo “wakabapandulwida kuti, Lazaro wazaya.” Awalo mwaapostolo Paulo wakaamba kujatikizya baabo ‘bakali koona mulufwu’ alimwi akwaamba kuti muciindi ncabikkide Leza, bayoobusyigwa.—Johane 11:11-14; 1 Ba-Tesalonika 4:13-15.

Masimpe, taakwe Bbaibbele mpoliyiisya kuti kuli cintu cizumanana kupona muntu afwa. Aboobo taakwe kaambo keelede kupa kuti muntu kayoowa bafwide. Pele, ino ncinzi cipa kuti bantu banji kabasyoma kuti kuli cintu cimwi cizumanana kupona muntu afwa? Alimwi ino ncinzi cipa kuti bantu kabayoowa kuti bafwide balakonzya kubalwana baumi?

Bubeji Bwakuti Kuli Cintu Cimwi Mumubili Wamuntu Citafwi

Zikombelo zyakubeja ziyiisya kaambo kakuti bantu nobafwa, tabafwi ncobeni pe. Lyansiku, njiisyo yakuti muntu tafwidilili yakali dumide kapati. Akaambo kaceeci, ciindi beendelezi bamwi nobakali kufwa—mbuli bama Farao baku  Egepita yansiku—bazike babo bakali kujaigwa kutegwa bakazumanane kubelekela mweendelezi ooyo.

Bantu banji balapenzyegwa azyintu nzyobasyoma kuti myuuya, naa mizimo yabafwide. Basyoma kuti balapenzyegwa amizimo iinyemede yabasazinyina bakafwa ayabantu bamwi. Pele Magwalo alatondezya cakusalazya kuti eeci tacili camasimpe pe. Myuuya iitabonwi yiitwa kuti madaimona njiilwana bantu kwiinda mukubapenzya akubakonga alimwi ilakkomana kucita boobo.—Luka 9:37-43; Ba-Efeso 6:11, 12.

Ibbaibbele lyaamba Saatani kuti “ngowisi wababeja,” walo “[uu]lisandula mbuli angelo wamumuni.” Walo amadaimona aakwe “[mbabe]ena bantu boonse baansi.” (Johane 8:44; 2 Ba-Korinto 11:14; Ciyubunuzyo 12:9) Masimpe ngakuti, Saatani nguupa bantu kubeja kuti kuli cintu cimwi mumubili wamuntu citafwi alimwi cilakonzya kubalwana baumi.

Nokuba boobo, aabo basyoma ncolyaamba Bbaibbele tabacengwi atwaambo twakubeja ootu. Balaazyi masimpe aajatikizya Saatani mbwasola kweena bantu kutegwa kabasyoma kuti bafwide balakonzya kubandika abaumi. Masimpe ngakuti, Bbaibbele lyaamba kuti: “Baumi balizi kuti balafwa, pele bafwide tabezi cintu niciba comwe.” (Mukambausi 9:5) Masimpe, Ijwi lya Leza lijisi njiisyo zyakasimpe izitugwasya kuti tuteenwi kujatikizya ciimo cabafwide.—Johane 8:32.

SENA KULI NOMWAKABUZYIDE KUTI?

▪ Sena bafwide kuli ncobazyi?—Mukambausi 9:5; Isaya 26:14.

▪ Ino ncinzi cipa kuti bantu banji kabasyoma kuti kuli cintu cimwi cizumanana kupona muntu afwa?—John 8:44.

▪ Ino nkuli nkotukonzya kujana makani aamasimpe aajatikizya ciimo cabafwide?—Johane 8:32; 17:17.

[Majwi aakwelelezya sikubala aali apeeji 19]

Zilenge zyamyuuya mibyaabi, ikutali bantu bafwide, zilakkomana kupenzya bantu