Mga Batan-ong Katoliko Giagda sa Pagwali

TINAMPO SA MAGSUSULAT SA PAGMATA! SA AUSTRALIA

SA MIAGING Hulyo, ang mga Romano Katoliko sa tibuok kalibotan nagtigom sa Sydney, Australia, sa pagsaulog sa 2008 nga World Youth Day, nga usa ka relihiyosong panagtigom nga gihimo sa Iglesya Katolika.

Ang mga bisita nga nagwarawarag bandera gikan sa 170 ka nasod nagpanon sa kadalanan, nga nangabiba ug nanganta, nga nakahatag ug kasadya sa tibuok siyudad. Libolibo ang naglinya diha sa Sydney Harbor sa pagtan-aw kang Papa Benedict XVI, kinsa miabot nga gieskortan ug 12 ka mabulokong mga barko. Duolan sa 500 milyones ka tawo sa tibuok kalibotan nanan-aw niini diha sa TV.

Ang pangataposang Misa, nga gihimo diha sa dakong estadyum sa siyudad, gipunsisokan ug 400,000 ka tawo, lakip sa 4,000 ka kadagkoan sa Simbahan ug 2,000 ka reporter. Kini ang kinadak-ang panagtigom nga nahimo sukad sa Australia, nga mas daghan pa kay sa nanan-aw sa Olympic Games sa Sydney niadtong tuig 2000.

Unsa kining World Youth Day? Nganong ginahimo kini? Unsa ang mga kalihokan niini? Ug unsay gipadayag niini bahin sa pagtuo sa mga batan-on sa Sydney?

“Nagkahuyang nga Pagtuo”

Ang World Youth Day maoy usa ka tinuig nga panagtigom sa pagpalig-on sa pagtuo sa mga batan-ong Katoliko. Kasagaran ang mga membro sa simbahan maghimo niini diha sa ilang lokal nga diosesis. Apan matag duha o tulo ka tuig, usa ka dakong siyudad maoy modumala niining tigoma ug ang mga batan-ong Katoliko sa tibuok kalibotan gidapit sa pagtambong. Napulo ka siyudad sa lima ka kontinente nakadumala na niini nga panagtigom, ug milyon-milyon ang nakatambong niini.

Apan ang kadagkoan sa simbahan miadmitir nga ang World Youth Day maoy paagi usab sa pagsumpo  sa pag-us-os sa mga membro sa Iglesya Katolika. “Kita dunay dakong problema may kalabotan sa mga tawo nga mihunong na sa pagka-Katoliko ug sa nagkahuyang nga pagtuo,” miingon si Kardinal George Pell, usa ka pari sa Australia. “Ang World Youth Day maoy usa ka paagi sa pagsulbad niana nga problema.”

Nagkadiyutay na ang mga pari sa tibuok kalibotan, sumala sa rekord sa Vatican. Libolibo na ang nanghunong sa pagkapari aron magminyo. Ang nagpalista aron mabansay sa pagkapari didto sa Australia mikunhod ug kapin sa 70 porsiyento sa miaging 30 ka tuig. Ang aberids nga edad sa mga pari karon sa kinadak-ang diosesis sa Australia maoy mga 60, nga magulang ug mga 20 ka tuig kay sa aberids nga edad niadtong 1977.

Ang gidaghanon sa manimba diha sa daghang kanasoran mikunhod usab. Mga 25 porsiyento sa tanang Australiano mga Katoliko, apan 14 porsiyento lang kanila ang regular nga mosimba. Wala pay 10 porsiyento sa mga batan-ong Katoliko ang gituohang manimba. Ug gilapas sa daghang Katoliko ang mga pagtulon-an sa simbahan bahin sa seksuwal nga moralidad, mga pamaagi aron dili mamabdos, ug diborsiyo. Ang uban nahigawad sa mga eskandalo sa simbahan, sama niadtong mga pari nga nagaabuso ug mga bata.

Ang World Youth Day “sa pagkatinuod maoy ultimang solusyon sa pagsumpo sa pagkadaot sa Simbahan,” nag-ingon ang The Sydney Morning Herald. “Ang mga lider sa simbahan sa Australia ug Roma nangitag paagi sa pagpasig-uli ug sa pagpalig-on sa pagtuo pinaagi sa mga batan-on.” Unsay gihimo sa mga lider sa simbahan aron mapalig-on ang pagtuo sa mga batan-on?

Makalingawng mga Pasundayag ug mga Parti

Lakip sa mga kalihokan sa 2008 nga World Youth Day mao ang makalingawng mga pasundayag,  pag-ambitay ug mga kasinatian uban sa grupo, pagbisita sa mga dapit nga giisip nga sagrado, ug dagkong mga tigom alang sa Misa. Bisan tuod daghang bisita natandog pag-ayo niining mga okasyona, ang uban nakamatikod ug laing tinamdan nga nagpabibo niini. Ang batan-ong Katoliko nga si Alexandra nga gikan sa Amerika miingon bahin sa World Youth Day, “Usa lang kini ka dakong parti.”

Ang unom ka adlawng panagtigom sa Sydney dunay 450 ka sadya nga mga programa, lakip sa mga concert, pelikula, drama, eksibisyon, ug mga pasundayag sa kadalanan. Dunay musika usab nga gidrama, mga pangadye nga ginaawit, ug musikang rock ug rap nga saba kaayo. Ang mga rock concert nakadanig libolibong batan-on nga mahigugmaon ug kalingawan.

Nabalaka niini ang ubang mga Katoliko. Ang okasyon nahimong “usa lang ka sadyang parti—usa ka semanang pagparti ug mga concert ug kalibotanong mga kalihokan nga wala kaayo maghisgot ug espirituwal nga mga butang,” miingon ang paring si Peter Scott sa ABC News sa Australia. Sa pagkatinuod, niadtong tuig 2000, si Papa Benedict XVI, nga Kardinal Ratzinger pa niadtong panahona, misulat: “Ang [musikang] ‘rock’ maoy pagpahayag sa unodnong kailibgon, ug dunay nagasimba niini ug sa mga mag-aawit niini, nga sukwahi kaayo sa Kristiyanong pagsimba.”—The Spirit of the Liturgy.

Busa ang pangutana mao, “Makapausab ba gayod sa kinabuhi ang World Youth Day?” “Tingali sa pipila,” miingon ang pari kaniadto nga si Paul Collins. “Apan ang kadaghanan mobalik sa ilang naandang kinabuhi,” siya miingon. “Dili mausab ang tawo pinaagig halandomong mga okasyon, kondili pinaagi sa pagpamalandong ug maayo, maayong pagplano ug pagkaandam sa pagdawat ug pagtul-id sa seryoso ug dugay nang mga problema.”

“Mahimo Kamong Akong mga Saksi”

Ang mga lider sa relihiyon nahibalo gayod niini nga mga kamatuoran. Busa kini ang gipasiugdang tema sa 2008 nga World Youth Day: “Kon mokunsad na kaninyo ang Espiritu Santo, makadawat kamog gahom ug mahimo kamong akong mga saksi.” a

Gidapit sa mga obispo ang mga bisita sa “pagpasundayag  ug kadasig, nga sama sa kadasig sa mga apostoles sa pagwali sa mga pagtulon-an ni Kristo niining modernong kalibotan.” Giawhag ni Papa Benedict XVI ang mga bisita sa pagkahimong “bag-ong kaliwatan sa mga apostoles,” ug sa laing okasyon iyang gidapit sila sa pagpakaylap sa “Maayong Balita ngadto sa ilang mga higala, pamilya, ug sa tanan nga ilang mahibalag.”

Ang ubang sinserong mga bisita nadasig. Ang 20 anyos nga si Ramido nga gikan sa Amerika miingon sa usa ka reporter: “Nagtuo ko nga kinahanglan gyod kitang magwali.” Apan ang 18 anyos nga si Beatrice nga gikan sa Italya miingon: “Ang mga batan-on karon dili na maghisgot bahin sa Diyos. Lisod kaayo karon nga mahimong magwawali.” Daghan sa mga bisita samag komento sa duha ka tin-edyer nga babaye nga gikan sa Texas, U.S.A., “Sa among dapit, mga Saksi ni Jehova lang ang nagasangyaw!”

Mga Batan-on nga Nagasangyaw

Sa pagkatinuod, ang mga Saksi ni Jehova, batan-on ug tigulang, ilado sa ilang madasigong pagsangyaw. Nganong mosangyaw man sila? “Tungod sa among gugma sa Diyos, gugma sa mga tawo, ug gugma sa Bibliya,” miingon ang 22 anyos nga si Sotir, nga taga-Sydney.

Sa 2008 nga World Youth Day, ang duolan sa 400 ka batan-ong mga Saksi nga taga-Sydney, bisag wala makigbahin niini nga panagtigom, miduyog sa linaing kampanya sa pagpaambit sa kamatuoran sa Bibliya ngadto sa miduaw nga mga bisitang Katoliko. “Nalipay ko nga nakailag Katolikong mga batan-on nga mahunahunaon sa espirituwal nga mga butang,” miingon ang 25 anyos nga si Travas. “Kadaghanan kanila daghag pangutana bahin sa Bibliya, ug nalipay ko sa pagpakita kanila sa makapakombinsir nga mga tubag.”

“Impormal ang akong paagi sa pagsangyaw,” miingon ang 23 anyos nga si Tarsha. “Buot ko nga sila malingaw sa Sydney ug makadungog ko sa ilang gituohan.” “Kon interesado, akong gasahan ang mga bisita ug librong Kon Unsay Tinuod nga Gitudlo sa Bibliya?” b miingon ang 20 anyos nga si Frazer. “Ang tanan nga akong nahibalag mahinangpong midawat niana.”

Daghang bisita naikag sa ilang pagpakigsulti sa batan-ong mga Saksi. Gipangutana ni Suzanne, nga gikan sa Fiji, ang 19 anyos nga Saksi nga si Belinda, kon nganong gitugotan sa Diyos ang pag-antos. Si Belinda miingon nga ilang hisgotan ang tubag diha sa librong Gitudlo sa Bibliya. Sa dihang natapos sila, si Suzzane miingon: “Kasagaran sultihan lang ko sa mga tawo nga misteryoso ang mga paagi sa Diyos. Niining higayona natubag gayod ang akong pangutana!” Sa gihatag ni Belinda kaniya ang libro, si Suzanne miingon: “Naningkamot ko sa paghinumdom sa tanan nga imong gisulti nako, kay abi nakog dili ko nimo hatagan ug libro!”

Gihangyo sa usa ka Pilipina nga bisita ang 27 anyos nga Saksi nga si Marina, sa pagkuha kaniya ug letrato atubangan sa usa ka iladong timaan sa Sydney. Human niana naghisgot sila bahin sa Bibliya, ug gihatagan ni Marina ang babaye ug librong Gitudlo sa Bibliya. “Nag-ampo ko gabii nga unta masabtan nako ang Bibliya,” matod pa sa babaye. “Kining libroha tingali mao na ang tubag sa akong pag-ampo!”

Ang 27 anyos nga Saksi nga si Levi, nakaestorya ug inahan ug anak nga gikan sa Panama. Wala magdugay nakahisgot sila bahin sa espirituwal nga mga butang, ug dayon sa mga pagtulon-an sa Bibliya. Gidawat nila ang librong Gitudlo sa Bibliya. Sa ulahi si Levi nangutana, “Unsay dili ninyo malimtan sa inyong pag-anhi dinhi?” Nagkapot sa librong Gitudlo sa Bibliya, ang anak nga babaye mitubag, “Ang pagkaila namo kanimo.”

Oo, daghang batan-ong Katoliko maikagon sa pagkahibalog dugang bahin sa Bibliya. Ikaw komosta? Gusto ka bang makasabot pag dugang bahin sa Bibliya? Paghangyo sa mga Saksi ni Jehova ug libre nga pagtuon sa Bibliya. Sila malipay sa pagtabang kanimo!

[Mga footnote]

[Blurb sa panid 27]

“Kita dunay dakong problema may kalabotan sa mga tawo nga mihunong na sa pagka-Katoliko ug sa nagkahuyang nga pagtuo.”—Romano Katolikong Kardinal George Pell

[Kahon/Mga hulagway sa panid 25]

DAKONG PANAGTIGOM SA IGLESYA KATOLIKA

Ang 2008 nga World Youth Day nagpasiugda sa labing dakong panagtigom sa Iglesya Katolika nga gihimo didto sa Australia. Kapin sa 100 ka Katolikong mga orden ug mga organisasyon ang nag-awhag sa kapin sa 50,000 ka bisita sa pagkahimong mga pari, madre, o mga tig-alagad sa simbahan.

[Hulagway sa panid 24, 25]

Mabulokon ug sinina nga mga bisita nga nagparada sa kadalanan

[Mga hulagway sa panid 26]

Gisangyawan sa mga Saksi ni Jehova ang mga bisita nga nanuroy sa siyudad sa Sydney

[Picture Credit Line sa panid 24]

Getty Images