Ia Faia se Amataga Lelei i Olaga o Lau Fanau

TUSIA E LE TUSITALA O LE ALA MAI! I KANATA

▪ Ua taʻua i se lipoti i le, The New York Times e faapea, “E mafai ona avea le televise o se meafaigaluega lelei e aʻoaʻo ai.” Peitaʻi, “o le tau lava ina saofaʻi i luma o le TV mo le tele o itula, e telē sona aafiaga i tino ma mafaufau o tamaiti,” e aveesea ai avanoa ia e mafai ona suʻesuʻe ai, aʻoaʻoina ai mea, ma faifaimea faatasi ai ma isi.

Ina ua uma ona iloiloina le masaniga a tamaiti e 2,500 i le matamata TV, na taʻua i le nusipepa e faapea, na iloa e le ʻausuʻesuʻe i le Falemaʻi o Tamaiti i Seattle, i Uosigitone, i Amerika e faapea, “o le tele lava e matamata ai tamaiti laiti e tasi i le tolu tausaga i le TV, o le sili foʻi lenā ona leaga o lo latou gauaʻi atu i le fitu o o latou tausaga.” O na tamaiti e itaitagofie, e lē onosaʻi, ma e itiiti le taimi e uaʻi ai i se mea. E tusa ai o le faamatalaga a le fomaʻi tomai o le mafaufau, o Dr. Jane M. Healy, ua ia taʻua e faapea, “o le tele o mātua e iai i fanau le faafitauli o le uaʻi atu, ua latou iloa ua faaleleia lea faafitauli, ina ua latou faaitiitia taimi e matamata ai tamaiti i le TV.”

O le ā e mafai ona fai e mātua ina ia faaitiitia ai le taimi, e faaalu e a latou fanau e matamata ai le TV? O fautuaga nei ua taʻua mai i le lipoti: Ia faatulaga le taimi, ma le umi e mafai ai ona matamata lau tama i le TV i aso taʻitasi. Ia ʻalofia le faaaogā o le TV o se tausi tama. Nai lo lea, ia faaaofia lau tama i le faiga o feʻau i le fale i le tele e mafai ai. Ia filifili ata e matamata ai lau tama, ma ia tapē le TV pe a uma ata na filifilia e matamata ai. Pe a talafeagai, ia matamata faatasi ma lau tama polokalame ua filifilia e matamata ai, ma talanoa e faatatau i mea ua e vaai i ai. Ma le fautuaga mulimuli, ia faatapulaa foʻi lou taimi e te matamata ai.

O le atiina aʻe i tamaiti o tomai e fai ai mea ma feagai ai ma isi, e manaʻomia ai le taimi, taumafaiga ma pulea i tatou lava. O le a maua ni iʻuga lelei mai i na taumafaiga. E faamaonia lea i se faataoto anamua ua faapea mai: “Aʻoaʻo ia i le tama e tusa ma lona ala; a oo ina toeaina lava o ia, e lē teʻa ese ai.” (Faataoto 22:6) O se vaega tāua o lenā toleniga, e aofia ai le faatonu o tamaiti i amioga tatau.

Ua taulau Molimau a Ieova i le faaaogāina o la latou tusi, Ia Faalogo i le Faiaʻoga Sili, e aʻoaʻo ai i a latou fanau lesona e uiga i amioga lelei. O lea la, o fesootaʻiga lelei ma le uaʻi atu ma le alofa o mātua, a o faagasolo uluaʻi tausaga o se tamaitiiti, e mautinoa o le a selesele ai i ni taui e aogā ma tumau. O le a sili atu ona faamalieina mātua, pe a vaavaai atu ua tuputupu aʻe a latou fanau, o ni tagata matutua e faaaloalo ma maufaatuatuaina.