Pagpaniid sa Kalibotan

◼ “Delikado kaayo ang among kahimtang [kagubot sa politika sa Georgia] . . . Ang Diyos nag-uban kanamo ug si Birheng Maria nanalipod [namo], apan nabalaka kaayo kami nga giunay ra pagpamomba sa Ortodoksong mga Ruso ang Ortodoksong mga taga-Georgia.”—GEORGIAN CATHOLICOS PATRIARCH ILLIA II.

◼ “Ang gidaghanon niadtong nagpareseta sa doktor ug kontrobersiyal nga kontraseptibo nga makapakuha sa gisabak misakag tulo ka pilo sa miaging unom ka bulan, [ug] ang halin misakag kapin sa 200% sukad sa 2004. . . . Mas daghan ang manawag sa doktor ma-Lunes aron magpaeskedyul ug adlaw sa pagpakonsulta. Ang kadaghanan mga batan-on.”—CLARÍN, ARGENTINA.

◼ Ang Amerikanong mga batan-on nga nag-edad ug 13 ngadto sa 17 nga tiggamit ug cellphone “nakapadala o nakadawat ug aberids nga 1,742 ka text message matag bulan sulod sa tulo ka bulan [Abril, Mayo, ug Hunyo sa 2008].”—THE NEW YORK TIMES, U.S.A.

◼ “Ang kadaot sa pangutok nakaapektar ug halos 12% sa populasyon sa kalibotan.”—WORLD FEDERATION FOR MENTAL HEALTH, U.S.A.

◼ “Gibanabana nga usa sa lima ka hamtong sa Uropa nakatilaw [ug cannabis, gikan niini ang marijuana] sa usa ka panahon sa ilang kinabuhi.”—EUROPEAN MONITORING CENTRE FOR DRUGS AND DRUG ADDICTION, PORTUGAL.

Biblikanhong Ngalan Nakubkoban

Ang mga arkeologo nga nangubkob sa karaang Siyudad ni David sa Jerusalem nakadiskobre ug 2,600 ka tuig nag edad nga timbre nga yutang kulonon, o bulla, diin nasulat ang ngalan ni “Gedalias nga anak nga lalaki ni Pasur.” Si Gedalias gihisgotan sa Bibliya diha sa Jeremias 38:1, ug maingon man si Yehukhal—nga ginganlag “Jucal nga anak nga lalaki ni Selemias”—kansang ngalan nasulat sa timbre nga yutang kulonon nga nakaplagan dinhi gihapong lugara niadtong 2005. Silang duha maoy mga opisyales ni Haring Zedekias. Ang The Jerusalem Post nagtaho: “Una kining higayon sa kasaysayan sa arkeolohiya sa Israel nga nakubkoban sa mao ra gihapong dapit ang duha ka timbre nga yutang kulonon, nga diha niana nasulat ang duha ka Biblikanhong ngalan nga gikan sa usa lang ka bersikulo.”

Teknolohiya Gigamit Batok sa Krimen

Ang Departamento sa Kapolisan sa New York mao ang kinadaghanag tawag nga emerhensiya gikan sa mga lungsoranon. Mahimo nang mapadad-an ug mga text message ang kapolisan tungod sa modernong mga gamit karon. “Ang mga lungsoranon gidasig sa pag-video sa krimen diha sa ilang mga cellphone ug sa pagpadala niini ngadto sa kapolisan,” nag-ingon ang The New York Times. May mga pamaagi usab nga gihimo, nag-ingon ang mantalaan, “aron ang hedkuwarter makapadalag mga hulagway ngadto sa tanang sakyanang nagpatrolya sa lugar nga nahitaboan sa krimen.”

Langgam nga Magpie Makaila sa Ilang Kaugalingon

“Gituohan nga mga unggoy, lumod ug mga elepante lang ang makaila sa ilang kaugalingon diha sa salamin,” matod pa sa report sa Reuters. Karon, ang mga magpie sa Asia ug Uropa nahibaloan nga makaila usab sa ilang kaugalingon. Gibutangan sa mga tigdukiduki ug lama ang mga magpie nga ilang makita lang sa salamin. “Gikuskos sa mga langgam ang lama, nga nagpamatuod nga sila mismo ang ilang nakita diha sa salamin ug dili laing langgam,” matod pa sa report.