Ang Katungod sa Pasyente sa Pagpili

TINAMPO SA MAGSUSULAT SA PAGMATA! SA ITALYA

◼ Ang mga Saksi ni Jehova dili magpaabonog dugo. Ang ilang pagdumili sa pagpaabonog dugo gipasukad sa mga sugo sa Bibliya, ug ang unang narekord nga sugo mabasa: “Ang unod lamang uban sa kalag niini—ang dugo niini—dili gayod ninyo pagakan-on.” Ang mga Kristohanon sa unang siglo gisugo: “Padayong magaayad . . . gikan sa dugo.”—Genesis 9:4; Buhat 15:29; Levitico 17:14.

Sa Monterenzio, Italya, ang mga estudyante sa hayskul gipasulat bahin sa pagkahinungdanon sa pagdonar ug dugo. Usa sa maong mga estudyante mao si Benedetta, nga usa ka Saksi ni Jehova. Siya misulat:

“Ang mga Saksi ni Jehova gibantog nga dili magpaabono ug dugo tungod kay nagsunod sila sa mga prinsipyo sa Bibliya, apan wala kini magpasabot nga dili sila modawat ug ubang paagi sa pagtambal. Importante kaayo sa mga Saksi ni Jehova ang ilang panglawas. Sila mangita gayod ug labing maayong paagi sa pagtambal sa ilang kaugalingon ug sa ilang mga anak. Sila mokooperar gayod sa mga doktor, basta tahoron ang ilang pagtuo.”

Dayon si Benedetta midugang: “Ang matag pasyente dunay katungod sa pagpili ug paagi sa pagtambal nga iyang gituohan nga labing maayo para niya, katungod nga pagatahoron, ug katungod sa pagkahibalo sa mga risgo ug benepisyo sa paagi sa pagtambal nga himoon kaniya.”

Ang opisina sa AVIS (Asosasyon sa mga Tigdonar ug Dugo sa Italya) sa Monterenzio naghatag ug mga premyo sa mga estudyante nga nakapahayag ug maayo sa ilang hunahuna bahin sa ilang gisulat. Ang magasing Monterenzio Vivace nag-ingon: “Si Benedetta Barbi gihatagan ug linaing premyo tungod sa iyang gisulat nga lahi sa gituohan sa kadaghanan—nga sukwahi sa baroganan sa AVIS—apan iyang napahayag ang iyang pagtuo sa makataronganon ug matinahorong paagi.”

Bisan tuod ang baroganan sa mga Saksi ni Jehova maylabot sa dugo “lahi sa gituohan sa kadaghanan,” daghang doktor karon nakakita sa kaayohan sa ilang baroganan. Ang baroganan sa mga Saksi maoy hinungdan sa pagkadiskobreg pipila ka bag-ong paagi sa pagtambal nga magpakunhod sa kusog nga pagdugo panahon sa operasyon. Tungod niini ang mga Saksi ug dili Saksi nga mga pasyente nakabenepisyo. Apan, ang pangunang katarongan nga dili magpaabono ug dugo ang mga Saksi ni Jehova maoy tungod sa gisugo sa Bibliya, sumala sa gihisgotan sa ibabaw.

Sa sunod higayong duawon ka sa mga Saksi ni Jehova sa inyong balay, pangutan-a sila kon unsay hunahuna sa Maglalalang bahin sa dugo. Malipay sila sa pagpatin-aw niini kanimo uban sa “halawom nga pagtahod.”—1 Pedro 3:15.

[Kahon/Hulagway sa panid 30]

DUGANG IMPORMASYON

Pinaagi sa tabang sa daghang espesyalista, ang DVD nga Transfusion Alternatives nagsaysay sa medikal, legal, ug moral nga mga prinsipyong nalangkit sa kapiliang mga paagi sa pagtambal nga dili na magkinahanglan ug pag-abonog dugo. Imo kining mabatonan gikan sa mga Saksi ni Jehova.