Mukuli U na ni Tukelo ya ku Keta

MUÑOLI WA MU ZUHE! WA KWA ITALY

▪ Lipaki za Jehova ba hananga ku pompelwa mali. Tumelo ya bona yeo i tomile fa milao ya mwa Bibele, mi wa pili ku yona u bulela kuli: “Kono haili ka za nama ye na ni bupilo, kikuli mali a yona, ha mu na ku i ca.” Bakreste ba kwa makalelo bona ne ba bulelezwi feela kuli: “Mu itime . . . kwa mali.”—Genese 9:4; Likezo 15:29; Livitike 17:14.

Kwa Monterenzio mwa Italy, bana ba sikolo ba kwa sekondari ne ba bulelezwi kuli ba ñole taba ye kuswani ka za butokwa bwa ku fana mali. Benedetta, yo muñwi wa Lipaki za Jehova naa li mwahalaa bana ba sikolo bao, mi naa ñozi taba ye latelela:

“Ki taba ye zibahala kuli Lipaki za Jehova ba hananga ku pompelwa mali bakeñisa kuli ba latelela likuka za mwa Bibele, kono seo ha si talusi kuli ba hana likalafo ze ñwi kaufela. Mane Lipaki za Jehova ba tabela ku ba ni buikangulo bo bunde. Ba likanga ka taata ku ipatela ni ku batela bana ba bona likalafo ze nde hahulu ze fumaneha. Ba tabela hahulu ku swalisana ni madokota, ibile feela kuli litumelo za bona za kutekiwa.”

Benedetta cwale a ekeza kuli: “Mukuli kaufela u na ni tukelo ya ku iketela mualafelo wa lumela kuli u ka mu tusa, u na ni tukelo ya ku kutekiwa, mi u na ni tukelo ya ku ziba likozi ni lituso za ka fumana mwa mualafelo wa ka fiwa.”

Katengo ka mwa Monterenzio ka kopano ya AVIS (Association of Italian Blood Donors) ne ka file mipuzo kwa baituti ba ne ba talusize hande maikuto a bona fa taba ye. Piho ya mwa magazini ya Monterenzio Vivace nee i bulezi kuli: “Taba ye nee lumbilwe hahulu nee li ya naa ñozi Benedetta Barbi, ili ye nee i shutana ni maikuto a ba bañwi kaufela, mi taba yeo ne i sa lumelelani ni milelo ya kopano ya AVIS, kono ka ku eza cwalo muituti yo naa konile ku talusa litumelo za hae ka ku itikanelela ni ka likute.”

Nihaike kuli tumelo ya Lipaki za Jehova ka za mali ya “shutana ni ya batu ba bañata,” madokota ba bañata se ba bona butokwa bwa tumelo yeo. Tumelo ya Lipaki ki yona sihulu ye tahisize kuli ku be ni mialafelo ye minca ye tusa kuli mutu ha pazulwa a si ke a zweta hahulu mali. Mialafelo ye minca yeo itusize bakuli ba ba li Lipaki ni be si Lipaki. Kono libaka le li tuna le li tahisanga kuli Lipaki za Jehova ba hane mali li tomile mwa Bibele, sina mo ku taluselizwe kwa makalelo a taba ye.

Lipaki za Jehova ha ba ka mi potela fa ndu ya mina, mu ba buze, kuli ba mi taluseze mubonelo wa Mubupi ka za mali. Ba ka tabela hahulu ku ikambota taba yeo ni mina, mi ba ka eza cwalo ka “likute.”—1 Pitrosi 3:15.

[Mbokisi/Siswaniso se si fa likepe 30]

LITABA ZE ÑWI

Ka tuso ya licaziba ze ñata ze zibahala hahulu, litapa la DVD la Transfusion Alternatives li nyakisisa likuka za likalafo, za milao, ni za litaba ze lukile ze ama linzila ze ñwi za ku alafa mukuli ku si na ku mu pompela mali. I fumaneha kwa Lipaki za Jehova.