Id-​Dipressjoni​—Kif Tikkuraha

“JIEN u żewġi fittixna kura medika, għamilna bidliet fl-​istil taʼ ħajja tagħna, u stinkajna biex niżviluppaw rutina li jien nistaʼ nkampa magħha,” tgħid Ruth, li ilha tbati mid-​dipressjoni għal ħafna snin. “Issa donna sibna mediċini effettivi, u sejra aħjar. Imma meta kien hemm żmien li fih xejn qisu ma kien qed jaħdem, l-​imħabba kontinwa taʼ żewġi u l-​ħbieb għenitni ma naqtax qalbi.”

Bħalma tindika l-​esperjenza taʼ Ruth, il-​pazjenti li jbatu mid-​dipressjoni klinika jkollhom bżonn kull appoġġ li jistgħu jsibu, inkluż kwalunkwe kura medika xierqa. Jistaʼ jkun taʼ dannu li tinjora d-​dipressjoni, għax xi drabi meta din ma tiġix ikkurata tistaʼ tipperikola l-​ħajja. Madwar elfejn sena ilu, Ġesù Kristu rrikonoxxa li dawk b’esperjenza medika jistgħu jipprovdu l-​għajnuna meħtieġa, meta qal li ‘dawk li huma morda għandhom bżonn tabib.’ (Marku 2:17) Il-​fatt hu li t-​tobba jistgħu jgħinu ħafna biex itaffu t-​tbatija taʼ ħafna pazjenti dipressi. a

Xi Għażliet li Jgħinu

Hemm diversi tipi taʼ kura għad-​dipressjoni, li jvarjaw skont is-​sintomi tal-​marda u kemm din tkun qawwija. (Ara l-​kaxxa f’paġna 5,  “X’Tip taʼ Dipressjoni?”) Ħafna nies jistgħu jiġu megħjunin mit-​tabib tal-​familja tagħhom, imma xi wħud ikollhom bżonn kura iktar speċjalizzata. It-​tabib jistaʼ jordnalhom xi mediċina antidipressanti jew jirrikkmandalhom xi  ħaġa oħra li tistaʼ tgħinhom. Xi wħud kellhom riżultati tajbin permezz taʼ mediċini magħmulin mill-​ħxejjex, bdil fid-​dieta, jew programm t’eżerċizzju kontrollat.

Kwistjonijiet Komuni

1. Ħbieb b’intenzjoni tajba imma bi ftit taħriġ mediku jew xejn jistgħu jipprovaw jgħidulek liema kura għandek taċċetta u liema tirrifjuta. Forsi jkollhom opinjonijiet sodi dwar jekk għandekx tieħu mediċini magħmulin mill-​ħxejjex, mediċina ordnata mit-​tabib, jew li ma tieħu xejn.

Qis dan: Kun ċert li kwalunkwe parir li taċċetta jkun ġej minn sors li tistaʼ toqgħod fuqu. Fl-​aħħar mill-​aħħar l-​għażla informata trid tagħmilha int.

2. L-​iskuraġġiment jistaʼ jġiegħel lill-​pazjenti jwaqqfu l-​kura li jkunu għażlu għax iħossu li ma jkunux sejrin għall-​aħjar jew minħabba l-​effetti koroh tal-​kura.

Qis dan: “Il-​pjanijiet jisfrattaw meta ma jkunx hemm diskors kunfidenzjali, imma jirnexxu meta jkun hemm ħafna li jagħtu l-​pariri.” (Proverbji 15:22) Programm taʼ terapija medika x’aktarx li jirnexxi iktar jekk ikun hemm komunikazzjoni tajba bejn it-​tabib u l-​pazjent. Spjega b’mod sinċier lit-​tabib tiegħek x’qed jinkwetak jew iddeskrivilu s-​sintomi, u staqsih jekk hemmx għalfejn tbiddel il-​kura jew inkella għandekx bżonn sempliċement tistenna iktar qabel tibda tara l-​benefiċċji tagħha.

3. Il-​fatt li jkunu kunfidenti żżejjed jistaʼ jġiegħel lill-​pazjenti jwaqqfu l-​kura medika f’daqqa wara ftit ġimgħat għax iħossuhom  aħjar. Forsi jinsew kemm kienu koroh is-​sintomi tagħhom qabel bdew il-​mediċina.

Qis dan: Jekk twaqqaf il-​kura medika f’daqqa mingħajr ma tikkonsulta t-​tabib jistaʼ jkollok konsegwenzi serji u li saħansitra jipperikolaw il-​ħajja.

Għalkemm il-​Bibbja mhijiex ktieb tal-​mediċina, l-​Awtur tagħha, Alla Ġeħova, hu l-​Ħallieq tagħna. L-​artiklu li jmiss se jeżamina l-​faraġ u l-​gwida li tipprovdi l-​Kelma t’Alla kemm għal dawk li jbatu mid-​dipressjoni u kemm għal dawk li jieħdu ħsiebhom.

[Nota taʼ taħt]

 [Kaxxa f’paġna 5]

X’TIP TAʼ DIPRESSJONI?

Kemm tkun effettiva ċerta kura medika jiddependi minn liema tip taʼ dipressjoni jkollu l-​pazjent.

◼ Id-​dipressjoni maġġura għandha sintomi li huma qawwijin biżżejjed biex idumu sitt xhur jew iktar jekk ma tiġix ikkurata u li jeffettwaw kważi kull aspett tal-​ħajja taʼ min ikun qed ibati minnha.

◼ Id-​diżordni bipolari hu magħruf ukoll bħala dipressjoni manijaka. Min ibati minnu jistaʼ jesperjenza estremi emozzjonali li jinbidlu drammatikament bejn fażijiet twal t’attività eċċessiva (maniji) u fażijiet taʼ dwejjaq li jifnuh (dipressjonijiet).—Ara l-​artiklu “Intom Ma Tafux X’Għad Isir Għada,” fil-​ħarġa tat-​Torri tal-​Għassa tal-​1 taʼ Diċembru, 2000.

◼ Id-​distimja (dysthymia), għalkemm ma ddgħajjifx lil dak li jkun daqs id-​dipressjoni maġġura, għandha sintomi dipressivi li jagħmluha diffiċli għall-​ġisem tal-​pazjent biex jiffunzjona b’mod normali. Xi wħud jistgħu jesperjenzaw ukoll perijodi taʼ dipressjoni maġġura minn żmien għall-​ieħor.

◼ Id-​dipressjoni wara t-​twelid taʼ tarbija (postpartum depression) hija kundizzjoni emozzjonali li teffettwa lil ħafna ommijiet wara l-​ħlas u tixorbilhom saħħithom.—Ara l-​artiklu “Nifhmu d-​Dipressjoni wara t-​Twelid taʼ Tarbija,” fil-​ħarġa taʼ din ir-​rivista tat-​8 t’Awwissu, 2003.

◼ Id-​dipressjoni staġjonali (seasonal affective disorder) x’aktarx tirriżulta minħabba nuqqas taʼ dawl tax-​xemx matul il-​ħarifa u x-​xitwa. Ġeneralment min ibati minnha jħossu aħjar fir-​rebbiegħa u s-​sajf.