Tabàky—Murhi Wo Tisasekisa Lowu Humaka eNsinyeni

◼ Le dzonga vupela-dyambu bya Madagascar etindhawini leti nga kwandzasi, vavasati va kona va tshama va ri elwandle va lavana ni swiphambati swa tihumba leswaku va ta swi xavisela vavalangi. Eswikandzeni va va va tole murhi lowu vuriwaka tabàky. Ku tola murhi lowu exikandzeni swi sirhelela nhlonge eka miseve ya dyambu, kambe vanhu va tlhela va wu tirhisa ku tisasekisa ha wona.

Murhi wa tabàky wu endliwa hi riphantsu ra nsinya wa masonjoany ni wa fihamy (lowu nakambe wu vuriwaka aviavy). Murhi wa kona wu endliwa hi ndlela leyi: Wansati u sila xiphemu xitsongo xa riphantsu, a ri karhi a chela mati hakatsongo-ntsongo ku kondza swi hlangana. Vavasati van’wana va teka ximhandzana kumbe nchumu wun’wana wa pulasitiki kutani va wu peta eka murhi wolowo ivi va titsala exikandzeni.

Vavasati van’wana va titsala xikandza hinkwaxo va siya xiphemu xitsongo lexi rhendzeleke matihlo. Van’wana va wu tola ntsena emombyeni, emarhameni kumbe exilepfini. Murhi lowu wu nga tirhisiwa ku susa swivati exikandzeni kumbe ku endla leswaku xi nga vi ni mafurha yo tala. Minkarhi yin’wana wu pfanganisiwa ni swilo swin’wana ivi swi endla leswaku wu va ni mihlovo yo hambana-hambana.

A nga kona loyi a a ta ehleketa leswaku nsinya wu nga humesa murhi wo tisasekisa ha wona. Hambileswi le Madagascar murhi lowu wa tabàky wu nga tolovelekangiki, kambe i wunene loko u tisasekisa ha wona.