Gidisenyo ba Kini?

Ang Madaginoton ug Enerhiya nga Kaban-Kaban

Aron makagamag sakyanan nga mas lig-on, dili kalas ug gasolina o krudo, ug dili makadaot sa palibot, ang mga tigdisenyo nangita diha sa dili katuohang lugar aron makakuhag ideya—sa ilalom sa dagat! Ang kaban-kaban o boxfish, nga nanimuyo duol sa katakotan, maayong tun-an aron makagamag usa ka sakyanan nga gaan ug maayog aerodynamics.

Hunahunaa kini: Ang kaban-kaban kusog kaayong molangoy nga moabot ug unom ka pilo sa gitas-on niini sa usa lang ka segundo. Apan ang katulin niini dili tungod kay kusgan kining isdaa. Wala gayod sila magtuo nga ang kuwadrado nga pagkaporma sa isda maoy nakapakusog sa dagan niini. Gani ang mga inhenyero nga naghimo sa modelo sa sakyanan ug nagtesting sa pagpadagan niini diha sa testinganang tunel nga pabugahan ug hangin nakadiskobre nga kini nga disenyo mas hanoy modagan kay sa gagmayng mga sakyanan.

Ang kaban-kaban bukogon ug panit nga nakapalig-on niini apan kini dili bug-at. Dunay gagmayng bula-bula nga maporma palibot sa isda nga maghimo niini nga dili daling mapaling bisag makutaw pa ang iyang palibot. Busa ang kaban-kaban maayong moliwag-liwag ug lig-og lawas.

Nagtuo ang mga inhenyero nga pinaagi sa pagtuon sa kaban-kaban maimbento ra unya ang mga sakyanan nga mas luwas, dili kalas ug gasolina o krudo, ug gaan pa. “Sa pagkatinuod, kami nahingangha gayod nga kining laig dagway nga isda nahimong among modelo sa paggamag sakyanan nga maayog aerodynamics ug dili kalas ug gasolina o krudo,” nag-ingon ang pangulo sa pagpanukiduki ug sa proyekto nga si Dr. Thomas Weber.

Unsay imong hunahuna? Ang madaginoton ug enerhiya nga kaban-kaban sulagma lang bang mitungha? O dunay nagdisenyo niini?

[Picture Credit Lines sa panid 10]

Boxfish: © Hal Beral/V&W/SeaPics.com; car: Mercedes-Benz USA