E Mea Maaniia Ainei?

Te Ika Moamoa Renga Tau ua te Ririnui

Maani anga i tetai motoka pakari, tau meitaki ua te ririnui, kare e takino i te reva, kua akara te aronga maani motoka ki tetai ngai kare i manakoia ana, ei aru anga na ratou​—⁠i roto i te tai! E kiteaia ana te ika moamoa renga i te pae i te kaoa o te akau i roto i te tai maana, kua riro ei tu akaraanga meitaki no tetai apinga akaoro mamangika ua, e te tere viviki meitaki tikai.

Akamanako ana: E kau viviki ana te ika moamoa renga​—⁠taeriaia ana e ono taime te kau anga i te tekoni okotai, roroa atu i tona kopapa. Inara, maata atu ta te reira ka rauka i te rave. Kare i manakoia ana, e ka rauka te tu piapia o te ika i te akameitaki atu i tona tu viviki i te kau. Kua maani te au enitinia i tetai tu mei te ika moamoa renga rai, e kua tamata i te reira i roto i tetai ana pupui matangi, kiteaia mai e e meitaki atu te tere anga o teia apinga i maaniia na roto i te reva, i to te au motoka rikiriki ua.

E pakiri angiangi pakari e te mamangika ua to te ika moamoa renga. Te kopupu matangi rikiriki i roto i te tai takapini ra i te ika, te tauturu ra i te ika kia kore e tauriuri i te tuatau kinokino te tai. No reira, mama ua i te ika moamoa renga te kau viviki aere ma te tu karape e te paruruia anga mei te kino.

Te irinaki ra te au enitinia e ka rauka i te ika moamoa renga i te akaari mai i te tu umere no te maani anga i tetai apinga akaoro meitaki, kare e kaimoumou ana i te penitini, e mamangika ua ra. “E tika rai, kua poitirere tikai matou te riro anga teia ika akaraanga marikonga kore, ei tu akaraanga no te maani anga i tetai motoka tere viviki na matou, kare e kaimoumou ana i te penitini,” i na te pu ei o te ngai kimikimi anga e te maani anga ko Dr. Thomas Weber.

Eaa toou manako? E mea tupu ua mai ainei te ika moamoa renga tau ua te ririnui? Me kore, e mea maaniia ainei?

[Au Akameitakianga no te Tutu i te kapi 16]

Boxfish: © Hal Beral/V&W/SeaPics.com; car: Mercedes-Benz USA