Mga Batan-on Nangutana

Nganong Mahadlok man Kong Magpaambit sa Akong Pagtuo?

“Daghan unta kaayong higayon nga makapadayag ako bahin sa akong pagtuo diha sa eskuylahan. Apan gipalabay lang nako kini.”—Kaleb. a

“Gipangutana sa among maestra ang klase kon unsay among hunahuna bahin sa ebolusyon. Nahibalo ko nga higayon na kini sa pagpaambit sa akong pagtuo. Apan nahadlok ko ug naghilom. Human niana, lain kaayo kog gibati.”—Jasmine.

KON ikaw usa ka Kristohanong batan-on, tingali nakaagi ka usab sama sa naagian ni Kaleb ug Jasmine. Sama kanila, tingali nahigugma ka sa mga kamatuoran sa Bibliya nga imong nakat-onan ug buot nimo nga ipaambit kini sa uban. Bisan pa niana, tingali nahadlok ka sa paghunahuna pa lang sa pagpakigsulti bahin niini. Apan makabaton kag kaisog. Sa unsang paagi? Sunda ang mosunod nga mga paagi:

1. Sayra kon unsay imong gikahadlokan. Kon maghunahuna ka sa pagpaambit sa imong pagtuo, makahunahuna ka dayon ug mga kahimtang nga dili maayo! Apan usahay mamenosan ang imong kahadlok kon imong isulat kon unsay imong gikahadlokan.

Kompletoha ang mosunod.

◼ Kon mopadayag ako sa akong pagtuo diha sa eskuylahan, mahimong kini ang mahitabo:

․․․․․

Tingali mahupayan ka sa pagkahibalo nga ang imong gikahadlokan sama usab sa gikahadlokan sa ubang Kristohanong mga batan-on. Pananglitan, ang 14-anyos nga si Christopher miadmitir, “Nahadlok ko nga yagayagaan sa ubang mga batan-on ug ilang sultihan ang uban nga abnormal ko.” Ug si Kaleb, nga gikutlo sa ibabaw, miingon, “Nahadlok ko nga may mangutana nako ug dili ko makatubag.”

2. Dawata ang problema. Duna ba gayoy katarongan nga mahadlok ka? Oo. “Ang ubang mga batan-on nagpakaaron-ingnong interesado,” matod  pa ni Ashley. “Apan ilang gituis ang akong gisulti ug ila akong gibugal-bugalan atubangan sa uban.” Si Nicole, nga 17 anyos, miingon: “Gitandi sa usa ka batan-ong lalaki ang usa ka teksto diha sa iyang Bibliya ug sa akong Bibliya, ug lahi ang pagkapamulong niini. Siya miingon nga ang akong Bibliya giusab. Nakurat ko! Wala ko makatingog.” b

Ang mga situwasyon nga sama niini makahadlok gayod! Apan imbes moikyas, dawata nga ang mga problemang sama niini maoy bahin gayod sa imong kinabuhi ingong Kristohanon. (2 Timoteo 3:12) “Si Jesus miingon nga ang iyang mga sumusunod pagalutoson,” matod pa sa 13-anyos nga si Matthew, “busa dili kita makadahom nga ang tanan makaangay kanato o sa atong tinuohan.”—Juan 15:20.

3. Palandonga ang mga kaayohan. Duna bay maayong sangpotanan ang daw dili maayong kasinatian? Mao kanay pagtuo sa 21-anyos nga si Amber. “Lisod ipatin-aw ang imong pagtuo ngadto sa mga tawo nga dili motuo ug Bibliya,” siya miingon, “apan makatabang kini kanimo sa pagsabot ug pagsusi kon unsa gayoy imong pagtuo.”—Roma 12:2.

Palandonga pag-usab ang situwasyon nga imong gisaysay diha sa Paagi 1. Paghunahuna ug labing menos duha ka maayong butang nga mosangpot gikan sa maong situwasyon, ug isulat kini sa ubos.

1 ․․․․․

2 ․․․․․

Tagda kini: Nganong dili ka kaayo pit-oson sa imong isigkabatan-on kon mopadayag ka sa imong pagtuo? Nganong makabaton kag kompiyansa sa imong kaugalingon kon mopadayag ka sa imong pagtuo? Sa unsang paagi ang imong pagpadayag sa imong pagtuo makaapektar sa imong pagbati kang Jehova nga Diyos ug sa iyang pagbati kanimo?—Proverbio 23:15.

4. Magmaandam. “Ang kasingkasing sa matarong nagapamalandong aron sa pagtubag,” nag-ingon ang Proverbio 15:28. Gawas pa sa pagpamalandong kon unsay imong isulti, hunahunaa daan ang mga pangutana nga motungha. Tun-i kini, ug andama kon unsay imong itubag.—Tan-awa ang tsart nga  “Andama Kon Unsay Imong Itubag,” sa panid 25.

5. Pagsugod. Kon andam ka na sa pagpaambit sa imong pagtuo, sa unsang paagi makasugod ka? Duna kay kapilian. Ang pagpaambit sa imong pagtuo samag paglangoy: Ang ubang mga tawo hinay-hinayng moubog sa tubig, samtang ang uban moambak dayon. Sa susama, mahimo kang makasugod pinaagi sa paghisgot ug mga butang nga dili bahin sa relihiyon ug tan-awa kon interesado ba ang imong kaestorya. Apan kon naglibog ka kon unsaon pagsugod, mas maayo nga mosugod dayon ka sa pagpadayag sa imong pagtuo. (Lucas 12:11, 12) “Ang pagpalandong kon unsaon pagpaambit sa akong pagtuo mas lisod kay sa aktuwal nga pagsulti niini,” nag-ingon ang 17-anyos nga si Andrew. “Sayon lang diay kini kon makasugod ka na sa pagpakig-estorya!” c

6. Magmaalamon. Maingon nga dili ka moambak diha sa mabaw nga katubigan, ayaw usab tubayi ang walay kapuslanang mga panaglantugi. Hinumdomi nga adunay panahon sa pagsulti ug sa paghilom. (Ecclesiastes 3:1, 7) May mga panahon nga si Jesus midumili sa pagtubag sa mga pangutana. (Mateo 26:62, 63) Ug hinumdomi kini: “Ang tawong maalamon makakita sa kadaot ug maglikay niini, apan ang tawong walay buot molahos ug lakaw diha niini ug magmahay sa ulahi.”—Proverbio 22:3, Today’s English Version.

Busa kon makamatikod ka nga paingon na sa panaglantugi ang inyong panag-estorya, ayaw ‘paglahos ug lakaw diha niini.’ Hinunoa, tubag sa mubo ug matinahorong paagi. Pananglitan, kon biaybiayon ka sa imong klasmet ug sultihan ka, ‘Nganong di man ka manigarilyo?’ sultihi lang siya, ‘Kay dili ko gustong madaot ang akong lawas!’ Depende sa tubag, mahimo nimong ipatin-aw ug dugang ang imong pagtuo.

Ang mga paagi nga gihisgotan sa ibabaw makatabang kanimo nga mahimong “andam kanunay sa pagdepensa” sa imong pagtuo. (1 Pedro 3:15) Siyempre bisan pag andam ka, nerbiyoson gihapon ka. Apan ang 18-anyos nga si Alana nag-ingon: “Dihang nagpatin-aw ka sa imong pagtuo bisan pag nahadlok ka, mobati ka nga morag duna kay nahimo—nabuntog mo ang imong kahadlok ug nangarisgar bisan pag sa imong hunahuna dili kini moresultag maayo. Ug kon maayo man ugaling ang resulta niini, mas malipay ka! Di gyod ka magmahay nga wala ka motalaw sa pagpaambit sa imong pagtuo.”

Ang ubang mga artikulo gikan sa seryeng “Mga Batan-on Nangutana” makita diha sa Web site nga www.watchtower.org/ype

[Mga footnote]

 ANGAYNG PALANDONGON

◼ Mao ba usab kiyni ang anaa sa hunahuna sa imong eskolmet?

‘Nahibalo ko nga Saksi ni Jehova ka. Basin maghunahuna ka nga yagayagaan ti ka, apan ang tinuod gitahod ti ka. Nganong kalmado man gihapon ka bisag daghan kaayong problema ang kalibotan? Pero ako nahadlok. Duna kahay mahitabong gubat? Magbulag kaha ang akong mga ginikanan? Masumbagan kaha ko sa eskuylahan? Daghan kaayo ko ug mga pangutana, pero ikaw, morag duna gyoy katuyoan ang imong kinabuhi ug nahibalo ka kon unsay imong gusto. Tungod ba sa imong relihiyon? Gusto kong makig-estorya bahin niana, apan nagpanuko ko sa paghisgot niana. Pwede bang mag-estorya ta bahin niana?’

[Kahon/Mga hulagway sa panid 26]

KON UNSAY GISULTI SA IMONG MGA ISIGKABATAN-ON

“Kataw-an ko sa ubang mga batan-on tungod sa akong pagpahayag sa akong pagtuo. Apan kasagaran pasagdan ko nila dihang ilang makita nga balewala ra nako ang ilang pagyagayaga.”—Francesca, Luxembourg.

“Kon dili ka magpaila nga Kristohanon ka, mahimong malimot ka kon kinsa ka ug magsugod sa paglihok nga sama nila. Dili mahimong magsunodsunod ka nila; kinahanglang ipakita nimo nga lahi ka.” —Samantha, Amerika.

“Sa bata-bata pa ko, dili ko gusto nga malahi sa ubang mga bata. Apan akong naamgohan nga ang akong pagtuo nakatabang kaayo nako sa pagbaton ug mas maayong kinabuhi. Kana nakahatag kanako ug kompiyansa sa kaugalingon ug tungod niana magarbohon ako sa akong tinuohan.”—Jason, New Zealand.

 [Kahon sa panid 26]

MGA ULOHAN ARON MAKASUGOD UG PANAG-ESTORYA

◼ “Unsay imong mga plano sa bakasyon?” [Human matubag, hisgoti ang imong mga plano maylabot sa imong pagsimba, sama sa pagtambong sa kombensiyon o pagpauswag sa imong ministeryo.]

◼ Paghisgot ug usa ka balita, ug dayon pangutana: “Nakadungog ka ba bahin niana? Unsay imong hunahuna niana?”

◼ “Sa imong tan-aw, moarang-arang pa kaha ang ekonomiya [o ubang problema] sa kalibotan? [Paminawa ang tubag.] Nganong nakasulti ka man niana?”

◼ “Nakabasa ka nag Bibliya?”

◼ “Unsa kahay imong kahimtang lima ka tuig gikan karon?” [Human matubag, hisgoti ang imong espirituwal nga mga tumong.]

  [Chart sa panid 25]

(Alang sa aktuwal nga porma, tan-awa ang publikasyon)

Andama kon Unsay Imong Itubag

Guntinga kini!

Sugyot: Hisgoti kini nga tsart uban sa imong mga ginikanan ug mga higala. Kompletoha ang tsart. Ug tan-awa kon duna ka pay mahunahunaang mga pangutana nga mahimong isukna sa imong mga klasmet.

Moralidad

Pangutana

Unsay imong panglantaw sa homoseksuwalidad?

Tubag

Wala ko magdumot sa mga homoseksuwal, apan dili ko mouyon sa ilang ginahimo.

Sunod nga pangutana

Dili ba mapihigon ang maong panglantaw?

Susiha

1 Corinto 6:9, 10; Mga Pangutanang Gisukna sa mga Batan-on—Mga Tubag nga Mosaler, Tomo 2, kapitulo 28. d

Tubag

Dili, kay supak ako sa tanang matang sa imoralidad—dili lang sa homoseksuwalidad.

Pagpakigdeyt

Pangutana

Nganong dili ka makigdeyt?

Tubag

Gusto kong makigdeyt kon anaa na ko sa hustong pangedaron.

Sunod nga pangutana

Tungod ba sa imong relihiyon?

Susiha

Awit ni Solomon 8:4; Gisukna sa mga Batan-on, Tomo 2, kapitulo 1.

Tubag

Oo Makigdeyt lang mi kon andam na kaming magminyo ug nahibalo ko nga dili pa ko andam!

Neutralidad

Pangutana

Nganong dili ka mosaludo ug bandera?

Tubag

Akong gitahod ang akong nasod, apan dili ko mosimba niini.

Sunod nga pangutana

Sa ato pa, dili ka makiggubat alang sa imong nasod?

Susiha

Isaias 2:4; Juan 13:35; Unsay Tinuod nga Gitudlo sa Bibliya? panid 148-151. e

Tubag

Dili, ug minilyong Saksi ni Jehova sa ubang mga nasod dili usab makiggubat sa atong nasod.

Dugo

Pangutana

Nganong dili ka magpaabono ug dugo?

Tubag

Modawat ko ug mga kapuli sa dugo, nga walay peligro nga mataptan ug AIDS. Ang Bibliya nagsugo sa paglikay sa dugo, busa dili ko magpaabono ug dugo.

Sunod nga pangutana

Apan unsaon kon mameligro ang imong kinabuhi? Dili ka ba pasayloon sa Diyos?

Susiha

Buhat 5:28, 29; Hebreohanon 11:6; Librong Gitudlo sa Bibliya, panid 129-131.

Tubag

Mga Kapilian

Pangutana

Dili ba pareho mog relihiyon ni Tampulano? Pwede man lagi ni niya. Nganong di man pwede nimo?

Tubag

Gitudloan kami kon unsay mga gikinahanglan sa Diyos, apan wala kami pugsa sa pagsunod niini! Dunay uban nga wala magsunod.

Sunod nga pangutana

Lain-lain diay mog gisunod nga sukdanan?

Susiha

Tubag

Paglalang

Pangutana

Nganong dili ka motuo ug ebolusyon?

Tubag

Nganong motuo man kog ebolusyon? Dili man gani magkauyon ang mga siyentipiko bahin niana nga sila man untay eksperto!

Sunod nga pangutana

Susiha

Tubag

[Footnote]

[Hulagway sa panid 26]

Ang pagpaambit sa imong pagtuo samag paglangoy. Pwede kang hinay-hinayng moubog sa tubig​—o moambak dayon!