Te Manako o te Pipiria

Tarevake Ainei te Taui i Taau Akonoanga?

Te akamataanga a Avtar i te apii i te Pipiria, kua riri tona ngutuare tangata Sikh iaia. “I roto i toku enua anau,” i karanga ai aia, “me taui koe i taau akonoanga kare te oire tangata e piri akaou mai kia koe. Pera katoa e aiteanga akonoanga to matou ingoa. E manakoia ana me taui koe i taau akonoanga, te kopae ra koe i toou tikaanga e te akangateitei kore ra i toou ngutuare.”

KUA riro mai a Avtar ei Kite no Iehova. Kua tarevake ainei aia i te taui i tana akonoanga? Penei aiteite toou manako ki tona ngutuare tangata. E te manako ra koe e e pirianga tinamou taau akonoanga ki te papaanga tuatua enua e te peu akonoanga a te ngutuare, e auraka te reira kia tauiia.

E puapinga i te akangateitei i to tetai ngutuare. Te karanga ra te Pipiria e: “E akarongo mai i to metua tane i anau ei koe ra.” (Maseli 23:22) Inara e puapinga maata atu i te kimi kia kite i te tuatua mou no runga i Tei Anga mai ia tatou e tona au akakoroanga. (Isaia 55:⁠6) Ka rauka ainei taua kimikimi anga ra? Me koia ia, eaa ra te puapinga no teia kimikimi anga kia koe?

Kimi Anga i te Akonoanga Tuatua Mou

Te apii ra te au akonoanga o teianei ao i te au manako kare e rotai ana. Tei tau, kare taua au apiianga katoatoa i te mea tika. Tei tupu mai, e maata te au tangata ta te Pipiria e karanga ra e, “e maroiroi to ratou i ta te Atua, kare ra i te maroiroi kite.” (Roma 10:⁠2) Inara, mei tei tataia i roto ia 1 Timoteo 2:4, te karanga ra te apotetoro ko Paulo e ko te anoanoia o te Atua e ‘kia rauka i te tangata katoatoa te kite i te tuatua-mou.’ Akapeea taua kite ra e kitenaia ai?

E akamanako ana i te au tumu no te makitoro marie anga i te Pipiria. Kua akakite a Paulo, e tangata tei akauruia kia tata i te Pipiria e: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga.” (2 Timoteo 3:16) Ei tuanga no taau kimikimi anga i te tuatua mou, e makitoro marie i te akapapuanga me e tika tikai ta te Pipiria e akakite ra. E kimikimi marie koe i te pakari aite koreia, te tuatua enua tika tikai, e te totou tei akatupuia.

Ma te kore e apii atu e te ariki ra te Atua i te au akonoanga katoatoa, te akakite maira te Pipiria ki te aronga e tatau ra i te reira e auraka e irinaki i te au mea ravarai ta ratou e akarongo ra, inara “e timata ra i taua au vaerua ra, kia kitea e, no ko mai aina i te Atua ra.” (1 Ioane 4:⁠1) Ei akaraanga, tetai ua atu apiianga no ko mai tikai i te Atua kia rotai te reira ki tona au tu, kapiti mai tona tu aroa maata.​—⁠1 Ioane 4:⁠8.

Te akapapu maira te Pipiria kia tatou e te inangaro ra te Atua kia ‘kitea tikai ia aia’ e tatou. (Angaanga 17:​26, 27, NW) I te mea e te inangaro  ra Tei Anga mai ia tatou kia kimi i te tuatua mou, kare e tarevake ana i te aru i te akapapuanga ta tatou i kite mai​—⁠noatu e ka taui tatou i ta tatou akonoanga. Akapeea ra te au manamanata ta teia ka akatupu mai?

Parani Anga i te tu Tiratiratu o te Ngutuare

Me taui te au tangata i ta ratou akonoanga, penei ka iki ratou e kare ratou e piri akaou ki tetai au peu a te akonoanga me kore te au orote. Tei maramaia, e akatupu ana teia i te au manako ngakau ketaketa i roto i te ngutuare. Kua akatika a Iesu i teia. Kua akakite aia ki tana au pipi e: “I aere mai nei au e akatupu i te tamaki i te metua tane raua ko te tamaiti, te metua vaine raua ko te tamaine, te metua ongoai vaine raua ko te unonga vaine.” (Mataio 10:35) Te karanga ra ainei a Iesu e kua akanooia te au apiianga a te Pipiria ei akatupu i te manamanata kare e rauka i te kopaeia? Kare. Te kite atura ra aia eaa te ka tupu me patoi mai te au mema o te ngutuare i tetai te aru ngaueue kore ra i to ratou irinakianga tei tuke mei to te ngutuare.

Ka tau ainei kia kopaeia te au manamanata i roto i te ngutuare noatu eaa te tu? Te apii maira te Pipiria e kia akarongo te tamariki ki te au metua e kia kauraro te au vaine ki ta ratou au tane. (Ephesia 5:22; 6:⁠1) Inara, te ikuiku maira te reira i te aronga te inangaro ra i te Atua kia ‘akarongo ki te Atua e tikaʼi auraka te tangata.’ (Angaanga 5:29) No reira, tetai au taime, ka vai tiratiratu koe ki te Atua me rave koe i tetai ikianga kare tetai au mema o te ngutuare e mareka mai.

Noatu e te akataka meitaki maira te Pipiria i te tuke i rotopu i te au apiianga tika tikai e te pikikaa, te akatika ra te Atua i te tangata tataki tai kia iki e akapeea aia i te ariu atu anga ki te reira. (Deuteronomi 30:​19, 20) Kare tetai tangata e maroia ana kia akamori na roto i tetai tu kare aia e ariki ana me kore kia iki i rotopu i tana e irinaki ra e tona ngutuare tangata. E akatakake ana ainei te apiianga a te Pipiria i te ngutuare? Kare. Te tikaanga, te akamaroiroi ra te Pipiria i te tane e te vaine kare e aiteite ana te akonoanga kia noo kapiti ua ei ngutuare tangata.​—⁠1 Korinetia 7:​12, 13.

Autu Anga i te Mataku

Penei ka mataku koe me patoi mai te oire tangata ia koe me te apii ra koe i te Pipiria ki te Au Kite o Iehova. Te karanga ra a Mariamma e: “Kua manamanata toku ngutuare kare e rauka mai tetai tane tau ei akono iaku. No reira kua patoi mai ratou i taku apii Pipiria.” Kua irinaki a Mariamma i te Atua ko Iehova e kua apii ua atu rai. (Salamo 37:​3, 4) Ka rauka katoa ia koe i te rave i te reira. Eiaa e mataku eaa te ka tupu mai, e akamanako ra i te au akameitakianga. E taui ana te karere Pipiria i te oraanga tangata e te au tu kia meitaki atu. Te apii ra te au tangata i te akaari i te aroa karapii kore ki to ratou ngutuare tangata. Ka rauka i te autu atu i te au peu kino, mei te tuatua kino e te takinokino anga, te inu tau kore i te kava, e te kai anga i te au apinga akakona. (2 Korinetia 7:⁠1) Te akamaroiroi maira te Pipiria i taua au peu tau tikai mei te tu tiratiratu, te tu tika, e te angaanga pakari. (Maseli 31:​10-31; Ephesia 4:​24, 28) Eaa ka kore ei e apii i te Pipiria e ka kite koe i te au akameitakianga no te taangaanga anga i ta te reira apiianga i roto i toou oraanga?

I MANAKO ANA AINEI KOE?

▪ Eaa ka makitoro marie ei i taau irinakianga akonoanga?​—⁠Maseli 23:23; 1 Timoteo 2:​3, 4.

▪ Akapeea koe me akataka i te au apiianga tika?​—⁠2 Timoteo 3:16; 1 Ioane 4:⁠1.

▪ Ka arai ainei te patoianga a te ngutuare ia koe no te apiianga i te Pipiria?​—⁠Angaanga 5:⁠29.

[Tataanga i te kap 29]

E taui ana te karere Pipiria i te oraanga tangata e te au tu kia meitaki atu

[Tutu i te kap 29]

Mariamma raua ko tana tane