Kasaligan ug Matinabangong mga Ginikanan

◼ Ang temperatura sa kapatagan sa ibabaw sa bukid sa Habagatang Aprika grabe ka bugnaw. Gikan sa akong alimuot nga opisina sa ikatulong andana, wala ko mamilok nga nagtan-aw sa walay dahon nga kahoyng naglubay-lubay kay gihuros sa hangin. Sa ubos-ubos nga sanga sa kahoy, nakakita akog usa ka laki nga tukmo nga nag-akob sa iyang pako sa duha ka tres-diyas nga kuyabog aron dili tugnawon.

Sa wala pa mangitlog ang baye, ang laki ug baye nga tukmo nagtinabangay sa paggamag salag—ang laki naghatod ug mga sanga-sanga ug ang baye maoy naghimo sa salag. Lig-on kaayo ang salag nga ilang gihimo kay wala kini maunsa bisag gikusokuso sa hangin, nga karon duna nay duha ka kuyabog. Ang baye maoy maglumlom niini sa magabii, ug ang laki sa maadlaw. Paglabayg mga duha ka semana, ang mga itlog mapusa. Dayon, paglabay ug mga duha ka semana, ang mga kuyabog managko na ug may igo nang kusog nga makalupad.

Pamati! Madunggan ba nimo ang nindot pamation nga pagkurok-kurok niini? Ang baye nga tukmo, nga ang pabalonan punog pagkaon para sa iyang gutom nga mga kuyabog, nagpahibalo sa iyang pag-abot diha sa duol nga sanga ug iyang relebohan ang iyang paris. Bisag makalupad na ang mga kuyabog, ila gihapon silang pakan-on hangtod makahimo na sila sa pagkinaugalingon.

Nahingangha gayod ko sa pagtinabangay ug sa pag-amoma sa mga tukmo sa ilang mga kuyabog, diin kini nga kinaiyahan ilang ipasa ngadto sa sunod nga mga kaliwatan. Tungod niini, nahinumdom ako sa giingon sa Salmo 86:8: “Oh Jehova, walay sama kanimo . . . , ni adunay mga buhat nga sama sa imoha.”

Diha sa iyang sinulat nga Pulong, ang Balaang Bibliya, si Jehova nga Diyos naghatag ug giya sa tawhanong mga ginikanan nga ingon ka kasaligan sa kinaiyanhong katakos nga iyang gihatag sa mga tukmo. Pananglitan, ang Bibliya nag-awhag sa mga inahan sa “paghigugma sa ilang mga anak.” (Tito 2:4) Para sa mga amahan, kini nag-ingon: “Ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.” (Efeso 6:4; 1 Timoteo 5:8) Sa pagkatinuod, bililhon gayod sa mga mata sa Diyos ang mga ginikanan nga nagabuhat niini.