Turuturu, Angaanga Kapiti Nga Metua

▪ E anu tikai te reva i tetai ngai teitei paraa i Aperika Tonga. Mei te maramarama o toku opati maana, kua kite atu au i tetai pu rakau kare e rau, e arara ra i roto i te matangi uriia i te tuatau anu. I runga i te manga o te pu rakau, te akono maanaana ra te kukupa i tana punua e toru ra.

I mua ake ka anau ei i te ua kukupa mua, e angaanga kapiti ana nga kukupa i te maani i te koanga​—⁠na te toa e apai mai i te au atava rikiriki e na te ua e akapapa ana i te reira. Meitaki tikai ta raua angaanga no te mea kare e rauka i te matangi ririnui i te tuatau anu i te akakeukeu i te koanga, tei riro mai i teianei ei kainga no nga ua kukupa. Na te ua e tamaanaana i nga ua kukupa i te po; na te toa e tamaanaana i te ao. E rua epetoma i muri ake, kua pana mai nga ua kukupa. I mua ake ka ope ei nga epetoma, ka mamaata mai nga punua e te maroiroi katoa no te rere anga.

Akarongo! Te rongo ra ainei koe i te tangi anga reka mei te kata anga maru rai? Kua nanunanu mai te ua kukupa ki tana nga punua matepongi, e kua tae mai aia ma tana kou kai i runga i te rara i te pae mai, e ka mono atu i te ngai o te toa. Me akaruke nga punua i te koanga, ka angai ua atu rai nga metua ia raua e rauka ua atu ia raua i te akono ia raua uaorai.

Umere ua ana rai au te angaanga kapiti e te tu akono maru ta taua nga manu ra i akaari mai, e pati uaia ana teia tu kite mei tera uki ki tera uki. Te akariro ra teia au tupuanga kia akamanako au i te au tuatua a Salamo 86:8 e: “Kare oou e aite, e te Atu . . . , kare oki e angaanga e arite ki taau ra angaanga.”

I roto i tana Tuatua i tataia, te Pipiria Tapu, kua oronga mai te Atua ko Iehova i te aratakianga irinakiia no te au metua tangata, mei te au tu kite rai tana i oronga ki nga kukupa. Ei akaraanga, te raurau maira te Pipiria i te au metua vaine “kia aroa oki i ta ratou au tamariki.” (Tito 2:⁠4) Ki te au metua tane, te karanga ra te reira e: “Auraka e akariri atu i ta kotou au tamariki ra: e apii ra ia ratou kia pakari ma te ako a te Atu ra.” (Ephesia 6:4; 1 Timoteo 5:⁠8) Papu tikai e, te akaperepereia ra te au metua te rave ra i teia au mea i roto i nga mata o te Atua.