Sekreto 1: Husto nga Prioridad

“Pat-ura ninyo ang mas importante nga mga butang.’—Filipos 1:10.

Ano ang buot silingon sini? Sa madinalag-on nga pag-asawahay, ginauna sang kada isa ang kinahanglanon sang iya bana ukon asawa sangsa iya kaugalingon, pagkabutang, trabaho, mga abyan, kag bisan gani sa iya mga paryente. Ang bana kag asawa nagahatag sing madamo nga tion sa isa kag isa kag sa ila kabataan. Handa sila nga magsakripisyo para sa kaayuhan sang ila pamilya.—Filipos 2:4.

Ngaa importante ini? Ginapabaloran gid sang Biblia ang pamilya. Ang matuod, si apostol Pablo nagsulat nga ang isa ka tawo nga wala nagaaman sa iya pamilya “malain pa sa tawo nga wala sing pagtuo.” (1 Timoteo 5:8) Pero pagligad sang tion, mahimo magbag-o ang mga prioridad sang isa ka tawo. Halimbawa, ang isa ka manuglaygay sang pamilya nagsiling nga madamo sang mga nagtambong sa iya seminar ang nagauna sang ila trabaho sangsa ila pamilya. Nagsiling sia nga daw nagapaabot sila nga makatuon sing mahapos nga mga paagi para mahimo nila ang ila mga obligasyon sa pamilya agod makakonsentrar sila liwat sa ila mga obra. Ginapakita sini nga mas mahapos lang isiling nga ginauna naton ang aton pamilya sangsa himuon ini.

Tilawi ini. Hibalua kon daw ano ka importante sa imo ang imo pamilya paagi sa pagsabat sang masunod nga mga pamangkot.

▪ Kon gusto ako istoryahon sang akon asawa ukon bana ukon anak, ginapamatian ko bala sila dayon?

▪ Kon nagaistorya ako sa iban, pirme ko bala ginasugid sa ila ang mga butang nga ginahimo ko upod sa akon pamilya?

▪ Ginabalibaran ko bala ang dugang nga mga responsibilidad (sa trabaho ukon bisan diin) kon kinahanglan sang akon pamilya ang akon tion?

Kon huo ang imo sabat sa sini nga mga pamangkot, mahimo nga nagahunahuna ka nga husto ang imo mga prioridad. Pero ano ayhan ang masiling sang imo asawa ukon bana kag mga anak? Ang aton pagtamod sa aton kaugalingon indi lamang ang basihan kon ano gid ang aton prioridad. Matuod man ini sa iban pa nga mga sekreto para magmadinalag-on ang pamilya nga pagabinagbinagon sa masunod nga mga pahina.

Ang puede mo himuon. Maghunahuna sing isa ukon duha ka paagi nga mahimo mo agod ipakita nga ginauna mo ang imo pamilya. (Halimbawa: Buhini ang imo tion sa iban nga mga butang agod mas daku ang imo tion para sa imo asawa ukon bana kag mga kabataan.)

Ngaa indi mo pag-isugid sa imo pamilya ang imo mga plano nga himuon? Kon ang isa ka miembro sang pamilya handa nga maghimo sing mga pagbag-o, ang iban mahimo magsunod man.

[Retrato sa pahina 3]

Ginauna sang isa ka maayo nga ginikanan ang iya asawa ukon bana kag ang ila kabataan