Taviri 1: Te Mea Puapinga Atu

‘Kia akapapu i te au mea puapinga rava atu.’​—Philipi 1:10, NW.

Te aiteanga o teia. I roto i te au akaipoipo puapinga, te tuku ra tetai tokorua i te anoano o tetai ke na mua ake i tona, tana au apinga, tana angaanga, te au oa, e te kopu tangata. E akapou ana te tane e te vaine i to raua taime kia raua uaorai e ki ta raua tamariki. Te inangaro ra raua i te rave i te au mea ei mea puapinga no te ngutuare.​—⁠Philipi 2:⁠4.

Te mea puapinga. Te manako maata ra te Pipiria i te puapinga o te ngutuare. E tika, kua tata te apotetoro ko Paulo e ko te tangata kare i akono i tona ngutuare “e maata atu ïa tona kino i to te tangata akarongo kore ra.” (1 Timoteo 5:⁠8) Inara, e taui ana te au mea puapinga o tetai tangata i te au tuatau. Ei akaraanga, kua akakite mai tetai tangata ako tauturu ngutuare e e maata tei aere mai ki tana uipaanga, te akaraanga e maata atu to ratou manako ki ta ratou angaanga i to te ngutuare. Te karanga ra aia e mei te mea te tapapa ra ratou i te apii “viviki i te au ravenga akatikatika anga” kia “maka ratou e kua akono ratou i te au manamanata o te ngutuare, kia manako ua ratou ki runga i ta ratou angaanga.” Eaa te apiianga? Mama ua te tuatua e ka tuku tatou i te ngutuare na mua i to te akaari anga i te reira.

Taangaanga i teia. E akamanako e mei teaa te puapinga o toou ngutuare kia koe, na te aru anga i teia au uianga ei aratakianga.

▪ Me inangaro toku tokorua me kore taku tamaiti i te tuatua, e akarongo ana ainei au?

▪ Me tuatua ki tetai ke no taku au angaanga, e uriuri putuputu ana ainei au i te au mea e rave ana matou ko toku ngutuare tangata?

▪ Ka kopae ainei au i tetai apainga (i te angaanga me kore i tetai ngai ke) me anoano mai toku ngutuare i toku taime?

Me pau koe ae ki te au uianga i runga akenei, penei ka manako koe e te rave ra koe i te au mea puapinga. Eaa ta toou tokorua e taau tamariki ka manako mai no runga ia koe? Ta tatou akara anga ia tatou uaorai, kare ko to tatou turanga anake ua te mea puapinga atu. E tika katoa taua kaveinga ra ki tetai au taviri puapinga te ka uriuriia i roto i te au kapi ka aru mai.

Rave i te ikianga tau. E akamanako ana e tai me kore e rua mataara ka akaari koe e ko toou ngutuare tangata te mea puapinga atu. (Ei akaraanga: E akaiti mai te taime te kaimoumou ra koe ki runga i tetai au mea, e kia akapou atu i te reira ki toou tokorua e te tamariki.)

Eaa ka kore ei e uriuri i taau ikianga ki toou ngutuare tangata? Me inangaro tetai mema i te taui, penei ka taui rai tetai pae.

[Tutu i te kapi 3]

E tuku ana tetai metua tei autu i tona tokorua e te tamariki ko te mea puapinga atu