Ang Pagtamod sang Biblia

Posible Bala nga Higugmaon sang Isa ang Iya Kaaway?

“Nagasiling ako sa inyo,” siling ni Jesucristo, “padayon nga higugmaa ang inyo mga kaaway kag ipangamuyo ang mga nagahingabot sa inyo; agod mangin anak kamo sang inyo Amay nga yara sa langit, kay ginapabutlak niya ang iya adlaw sa mga tawo nga malaut kag sa mga maayo kag nagapaulan sa mga tawo nga matarong kag di-matarong.”—Mateo 5:44, 45.

SA BANTA mo, ginapahiusa bala sang relihion ang mga tawo ukon ang relihion amo ang ginabangdan sang pag-ilinaway? Sa karon, madamo ang nagasiling nga ang relihion amo ang ginabangdan sang pag-ilinaway, labi na gid kon ang relihion mag-entra sa pulitika kag magdampig sa isa ka rasa ukon pungsod. Pero ginapakita sa ginsiling ni Jesus nga ginailog sang matuod nga ‘mga anak sang Dios’ ang gugma sang Dios bisan sa ila mga kaaway.

Ang isa pa ka alagad sang Dios nagsiling: “Kon ang imo kaaway ginagutom, pakauna sia; kon ginauhaw sia, hatagi sia sang mainom; . . . Indi ka magpadaug sa malaut, kundi padayon nga dauga ang malaut paagi sa maayo.” (Roma 12:20, 21) Pero posible gid bala nga mapakita ini nga sahi sang gugma sa sining nabahinbahin nga kalibutan? Ang mga Saksi ni Jehova maathag gid nga magasabat sing huo! Binagbinaga ang halimbawa ni Jesus kag sang iya mga alagad sang una.

Ginhigugma Nila ang Ila mga Kaaway

Gintudlo ni Jesus ang kamatuoran parte sa Dios kag madamo ang nanamian magpamati sa iya. Pero ang iban nagpamatok kay Jesus bangod ginpatalang sila sang iya mga kaaway. (Juan 7:12, 13; Binuhatan 2:36-38; 3:15, 17) Bisan pa sini, padayon nga ginsugid ni Jesus sa tanan ang mensahe nga magaluwas sang kabuhi, lakip sa mga nagapamatok sa iya. (Marcos 12:13-34) Ngaa? Nahibaluan niya nga ang iban sa ila puede magbag-o, magkilala sa iya subong Mesias, kag magtuman sa kamatuoran nga ginasiling sang Pulong sang Dios.—Juan 7:1, 37-46; 17:17.

Sang gab-i nga gindakop sia sang armado nga mga tawo bisan wala sia sing sala, ginpakita gihapon ni Jesus ang iya gugma sa iya mga kaaway. Ang matuod, sang ginlabo ni apostol Pedro ang isa sa mga nagdakop kay Jesus, gin-ayo ini ni Jesus. Sa sini nga tion, ginsiling ni Jesus ang isa ka importante nga prinsipio nga nagagiya gihapon sa iya matuod nga mga sumulunod subong. Nagsiling sia: “Ang tanan nga nagagamit sang espada mapatay paagi sa espada.” (Mateo 26:48-52; Juan 18:10, 11) Mga 30 ka tuig sang ulihi, si Pedro nagsulat: “Si Cristo mismo nag-antos tungod sa inyo, nga nagabilin sa inyo sang huwaran agod sundon ninyo sing  maayo ang iya mga tikang. . . . Sang nag-antos sia, wala sia magpamahog, kundi padayon niya nga gintugyan ang iya kaugalingon sa [Dios].” (1 Pedro 2:21, 23) Maathag nga natun-an ni Pedro nga ang matuod nga mga sumulunod ni Cristo wala nagabalos kundi nagapakita sing gugma.—Mateo 5:9.

Ang tanan ‘nga nagasunod sa huwaran ni Jesus’ nagapakita sang iya mahigugmaon kag mainayuhon nga panimuot. “Ang ulipon sang Ginuo indi kinahanglan makig-away, kundi kinahanglan mangin malulo sa tanan, . . . nagapugong sang iya kaugalingon sa idalom sang malaut,” siling sang 2 Timoteo 2:24. Ini nga mga kinaiya dapat nga makita sa kabuhi sang mga Cristiano. Dapat nila ipakita ang paghidait kag tinguhaan nga ibalik ang maayo nga relasyon.

Mahidaiton nga mga ‘Embahador Para kay Cristo’

Si apostol Pablo nagsulat sa pareho niya nga mga tumuluo: “Busa mga embahador kami nga salili para kay Cristo . . . Subong mga salili para kay Cristo nagapakiluoy kami: ‘Magpasag-uli kamo sa Dios.’” (2 Corinto 5:20) Ang mga embahador wala nagapasilabot sa mga nagakatabo sa pulitika kag militar sa mga pungsod nga ila ginaserbisyuhan. Sa baylo, nagapabilin sila nga wala sing ginadampigan. Ang ila trabaho amo nga itiglawas kag suportahan ang gobierno sang pungsod nga nagpadala sa ila.

Amo man sini ang ginahimo sang matuod nga mga embahador kag mga tiglawas ni Cristo. Si Jesus ang ila Hari kag ginasuportahan nila ang iya Ginharian sa langit paagi sa mahidaiton nga pagbantala sing maayong balita. (Mateo 24:14; Juan 18:36) Gani, si Pablo nagsulat sa mga Cristiano sang una: “Wala kami nagapakig-away suno sa undanon nga paagi. Kay ang mga hinganiban sang amon pagpakig-away indi undanon, kundi gamhanan paagi sa Dios agod pukanon . . . ang mga pangatarungan kag ang tagsa ka mataas nga butang nga supak sa ihibalo sang Dios.”—2 Corinto 10:3-5; Efeso 6:13-20.

Sang ginsulat ini ni Pablo, ang mga Cristiano sa madamo nga lugar ginahingabot. Puede sila makabalos kon gustuhon nila. Pero padayon nga ginhigugma nila ang ila mga kaaway kag ginsugid sa tanan nga magapamati ang mensahe parte sa pagtigayon sang kahamuot sang Dios. Ang Encyclopedia of Religion and War nagsiling: “Ang una nga mga sumulunod ni Jesus wala nag-entra sa inaway kag wala nagsoldado,” kay nahibaluan nila nga ini nga mga buhat “supak sa prinsipio sang gugma nga gintudlo ni Jesus kag sa sugo nga higugmaon ang kaaway.” *

Pareho sang mga Cristiano sang una, ginakilala man sang mga Saksi ni Jehova si Jesus subong ila Hari. Ginakilala man nila sia subong Hari sa Ginharian sang Dios. Amo ini ang gobierno sa langit nga magadala sa indi madugay sang wala sing katapusan nga paghidait kag kalig-unan sa duta. (Daniel 2:44; Mateo 6:9, 10) Gani, pareho sang mga embahador kag mga tiglawas, ginasugid nila ang maayo nga mga butang nga dalhon sini nga Ginharian. Subong man, ginatinguhaan nila nga mangin maayo nga mga pumuluyo sang mga pungsod nga ginapuy-an nila. Ginabayaran nila ang ila mga buhis kag ginasunod ang mga kasuguan basta wala ini nagasupak sa kasuguan sang Dios.—Binuhatan 5:29; Roma 13:1, 7.

Makapasubo nga pareho sang mga Cristiano sang una, may mga tion man nga ang mga Saksi wala mahangpan sing maayo, ginapakalain, kag ginahingabot. Pero wala gid sila nagabalos. Sa baylo, ginatinguhaan nila nga “magpakighidait sa tanan nga tawo,” kay nagalaum sila nga ang iban nga mga manugpamatok mahimo ‘magpasag-uli sa Dios’ kag makatigayon sing paglaum nga mabuhi sing wala sing katapusan. *—Roma 12:18; Juan 17:3.

[Mga Nota]

NAMANGKOT KA BALA?

▪ Ano dapat ang pagtamod sang mga Cristiano sa ila mga kaaway?—Mateo 5:43-45; Roma 12:20, 21.

▪ Ano ang ginhimo ni Jesus sang ginhingabot sia?—1 Pedro 2:21, 23.

▪ Ngaa wala nag-entra sa inaway ang mga Cristiano sang una?—2 Corinto 5:20; 10:3-5.