Ipakita ang Pagpalangga!

“HAKSA sila pirme!” siling sang isa ka propesor sa child psychiatry sa isa ka iloy nga bag-o lang nagbun-ag sing kapid. Nangayo ang iloy sing laygay sa propesor kon ano ang pinakamaayo nga paagi sa pagpadaku sa iya mga bata. “Ang gugma kag pagpalangga dapat ipakita sa lainlain nga paagi,” siling pa gid sang propesor, “subong sang paghakos kag paghalok, pag-angga, pagpakita sing paghangop, kalipay, kaalwan, kag pagpatawad, kag kon kinahanglanon, paagi sa makatarunganon nga pagdisiplina. Indi gid naton paghunahunaon nga nahibaluan na sang aton mga bata nga palangga naton sila.”

Ang direktor sang Touch Research Institute sa University of Miami, Florida, U.S.A. nga si Tiffany Field, ugyon man sa sini. “Ang pag-uyat kag pagtandog sa bata importante gid sa iya pagdaku, panglawas, kag kalipay pareho sang pagkaon kag ehersisyo,” siling niya.

Kinahanglan man bala sang mga may edad na ini nga sahi sang pagpalangga? Huo. Nakita sang clinical psychologist nga si Claude Steiner sa iya pagtuon nga ang paghambal kag pagpabatyag sa aton sing pagpalangga kag pagpalig-on importante sa aton kapagros kag kalipay, bisan pila man ang aton edad. Si Laura, nga isa ka nars nga nagaatipan sa mga tigulang nagsiling: “Nakita ko nga daku gid ang mahimo sang pagpalangga sa mga tigulang. Kon ginaayuhan mo sila kag gina-angga, saligan ka nila kag mapati sila sa imo. Dugang pa, ang pagpalangga sa ila nagapakita nga ginarespeto mo sila.”

Ang pagpakita sing pagpalangga may kaayuhan gid sa ginapalangga kag sa nagapalangga. Subong sang ginsiling ni Jesucristo, “may kapin nga kalipay sa paghatag sangsa pagbaton.” (Binuhatan 20:35) Labi nga mabatyagan naton ang kalipay kon ipakita naton ang pagpalangga sa mga tawo nga nagakabalaka, ginasubuan, ukon wala sing kompiansa sa kaugalingon. Madamo sing rekord sa Biblia parte sa mga tawo nga nakabaton sini nga sahi sang bulig.

Hunahunaa kon daw ano nga paumpaw ang nabatyagan sang “isa ka lalaki nga puno sang aro,” ang tawo nga ginakangil-aran sang kadam-an, sang mainayuhon sia nga gintandog ni Jesucristo!—Lucas 5:12, 13; Mateo 8:1-3.

Hunahunaa kon daw ano nga kabakod ang nabatyagan sang tigulang nga propeta nga si Daniel sang ginpalig-on sia sang anghel kag gintandog sing tatlo ka beses. Yadtong mahigugmaon nga pagtandog kag makapalig-on nga mga pulong amo gid ang kinahanglan ni Daniel para maulian ang iya kakapoy sa pisikal kag hunahuna.—Daniel 10:9-11, 15, 16, 18, 19.

Sang isa ka bes, ang mahigugmaon nga mga abyan ni apostol Pablo naglakbay sing mga 50 kilometros halin sa Efeso pa Mileto para tabuon sia. Didto ginsugiran sila ni Pablo nga basi indi na sila magkitaay liwat. Napalig-on gid si Pablo sang ‘ginhakos nila sia kag mapinalanggaon nga ginhalukan’!—Binuhatan 20:36, 37.

Gani, ang Biblia kag ang mga pagtuon subong nagapalig-on sa aton nga ipakita ang pagpalangga sa isa kag isa. Kon himuon naton ini, mangin maayo ang aton panglawas kag emosyon. Maathag gid nga ang nagakaigo nga pagpalangga indi lamang para sa mga bata.