Eaorõk bwe Jen Kwal̦o̦k Yokwe eo Ad

JUON kõrã ear keotak ruo nejin bo. Ear kajjitõk ippãn juon ri kaki ñan taktõ in ajri ilo college, kõn ta wãween eo em̦m̦antata ñan lale ajri ro nejin. Ta eo ri kaki in ear ba bwe kõrã eo en kõm̦m̦ane? Ear ba, “Kwõn atbo̦kwõje er aolep iien! Kwõj aikuj kwal̦o̦k am̦ yokwe er ilo elõñ wãween ko. Ñan waanjoñak, kwõj aikuj atbo̦kwõje er im mejenmaiki er. Kwõn kajerbal naan ko rejouj im nõbar er. Bareinwõt, kwal̦o̦k am̦ m̦õn̦õn̦õ kake er, jol̦o̦k aer bõd ñe rej kõm̦m̦an likjab ko, im kajim̦weik er ilo wãween eo ekkar. Ajri ro nejid reban jel̦ã bwe jej yokwe er el̦aññe jejjab kwal̦o̦ke ilo naan im kõm̦m̦an ko ad.”

Tiffany Field, eo ej jerbal ilo juon college ilo Florida, ej errã ippãn naan kein an ri kaki in. Ear ba, “Bwe ajri ro ren maroñ rũttol̦o̦k im em̦m̦an aer mour, rej aikuj m̦õñã ko reũne im kõm̦m̦ani men ko rej kãjmourur ãinwõt etetal, ettõr, im men ko ãierl̦o̦kwõt. Bõtab, rej bareinwõt lukkuun aikuj bwe jen kwal̦o̦k ad yokwe er ikijjeen ad atbo̦kwõje er, mejenmaik er, im men ko ãierl̦o̦kwõt.”

Rũtto ro rej ke bar aikuji ad kwal̦o̦k yokwe ñan er? Aet. Juon taktõ etan Claude Steiner ear kõm̦m̦an etale ko im lo bwe ajri ro kab rũtto ro rej aikuji ad nõbar er. Bareinwõt, ear kile bwe enaaj em̦m̦an aer mour el̦aññe ro jet rej kwal̦o̦k aer yokwe er. Juon nõõj etan Laura, eo ej lale l̦al̦l̦ap im lel̦l̦ap ro ej ba: “Em̦õj aõ lo oktak eo ñe kwõj kwal̦o̦k yokwe ñan rũtto ro. Ñe kwõj kwal̦o̦k jouj ñan er im eoeoki likier, renaaj lõke eok im kõn̦aan l̦oor men ko kwõj jiroñ er ñan kõm̦m̦ane. Bareinwõt, ad kõm̦m̦ane men kein ñan er ej kalikkar bwe jej kaorõk er.”

Eo ej kwal̦o̦k yokwe enaaj bõk el̦ap tokjãn ñe ej kõm̦m̦ane men in. Jijej Kũraij ear ba, “Elablok mõnõnõ ilo lelok jen bõk.” (Jerbal 20:35, UBS) Enaaj l̦aptata ad bõk tokjãn ko ñe jej kwal̦o̦k yokwe ñan ro im rej inepata, bũrom̦õj, im mijak. Elõñ bwebwenato ko ilo Baibõl̦ eo rej kwal̦o̦k kõn armej ro me rar bõk jipañ ilo ejja wãween in wõt.

L̦õmn̦ak m̦õk kõn juon em̦m̦aan me ear bõk “nañinmej in lõba.” Ejjel̦o̦k juon ear kõn̦aan kepaake. Bõtab, Jijej ear erl̦o̦kwe pein im uññũre ilo jouj. Ejjel̦o̦k pere bwe men in ear lukkuun kaenõm̦m̦an bũruon em̦m̦aan eo!—Luk 5:12, 13; Matu 8:1-3.

L̦õmn̦ak bareinwõt kõn ri kanaan eo Daniel ke ear bwijwol̦ã. Ke enjel̦ eo an Anij ear ba naan ko rekõkãtõk ñan e im uññũr e ilo jouj jilu alen, men in ear lukkuun kakajoor Daniel. M̦okta, ear kanooj m̦õk im nana an mour. Bõtab, ãlikin an enjel̦ eo kaenõm̦m̦an e kõn naan im kõm̦m̦an ko an rejouj, Daniel ear kajoor im em̦m̦an an mour. Ear aikuj bwe juon en kwal̦o̦k yokwe ñan e.—Daniel 10:9-11, 15, 16, 18, 19, UBS.

Juon iien, ro ilo Epesõs im rar lukkuun epaake Paul rar etetal ium̦win 30 mail bwe ren maroñ iione ilo Mailitõs. Ke rar iione, Paul ear jiroñ er bwe emaroñ iien eo in ãliktata in an pãd ippãer. Rar “jiburlebe im yokyokwe kin mejenma.” Ejjel̦o̦k pere bwe men in ear lukkuun kakajoor im kõkãtõk rijjelõk Paul!—Jerbal 20:36, 37, UBS.

Baibõl̦ eo im etale ko an taktõ ro rainin rej jim̦or rõjañ kõj ñan kwal̦o̦k ad yokwe doon. Enaaj em̦m̦an ãjmour eo am̦ im bũruom̦ enaaj aenõm̦m̦an el̦aññe kwõj kõm̦m̦ane men in. Innem ealikkar bwe jej aikuj kwal̦o̦k yokwe ñan ajri ro im rũtto ro jim̦or.