Na o Gateletšegile?

LEFASENG ka bophara, go thulana magareng ga mošomo wa boiphedišo le bophelo bja lapa ke taba e kgolo kudu. Ka ge mothopo o mongwe o bontšha, ‘koketšego ya ditšweletšwa go dikologa lefase, thekinolotši e mpsha, mošomo o gateletšago kudu, go šoma bošego le mosegare, go bakile karogano magareng ga lapa le mošomo wa boiphedišo.’ Diphetogo tše di bakile lehumo leo le sa kago la bonwa. Eupša katlego ye ga se ya hwetšwa gabonolo. Mongwadi yo mongwe o re: “Ba dimilione ba rena ba šoma ka thata, ba šoma nako e telele e bile ba a imelwa. Re fo ba re gateletšegile kudu.”

Go oketša tabeng ye, re nolwa moko ke ditla-morago tša tšhaparego yeo e diregago morago-bjale. Lefaseng ka bophara, bašomi bao ba šomago ka ofising le bao ba šomago mošomo wa diatla, ba lahlegetšwe ke mešomo le magae a bona. Ba kganyoga eka ba ka be ba šoma ka thata.

Anke re eleng hloko bogolo bja mathata a:

▶ Go bašomi ba Yuropa, ba 6 go ba 10 ba gateletšwa ke mošomo.

▶ Go bašomi ba U.S., o tee go ba bararo o ikwa a šoma nako e telele.

▶ Batho ba fetago ba babedi go ba bararo ba Canada ba hwetša go le thata go leka-lekanya bophelo bja lapa le mošomo.

▶ Go akanywa gore bašomi ba fetago dimilione tše 600, goba 22 lekgolong lefaseng ka bophara ba fetša diiri tše fetago tše 48 ka beke mošomong wa bona.

Dipalo-palo tše di bontšha kotsi e kgolo yeo batho ba lebanego le yona. Dinyakišišo tše dingwe di kgokaganya go šoma diiri tše telele gotee le tše di sa tlwaelegago le boemo bjo bo sa kgahlišego bja tša maphelo, ditswalano tše di sentšwego, go se godiše bana gabotse, karogano gotee le tlhalo.

Go thwe’ng ka wena? Na o šoma ka thata? Goba na o yo mongwe wa batho ba dimilione bao ga bjale ba sa šomego? Na o kganyoga go ba le teka-tekano e kaone magareng ga mošomo le bophelo bja lapa? Ge e ba go le bjalo, o ka e hwetša bjang?

[Box/​Picture on page 19]

“MOŠOMO WA BOBEDI”

Mosadi yo mongwe yo a šomago o re: “Ge ke boa gae, ke swanetše go apea dijo tša mantšiboa, ke hlwekiše ka ntlong, ke hlatswe diaparo, ke late bana, ke ba thuše ka mošomo wa sekolo wa ka gae le go kgonthiša gore ba hlapile le go ba iša malaong. Ka nako yeo, ke ba ke lapile kudu.” Basadi ba šomago bao ba akanyetšwago go dimilione tše dikete tše 1,2 ba lebane le bothata bjo bogolo bja go šoma “mošomo wa bobedi,” go swana le banna bantši bao ba lego boemong bjo bjalo. Lega go le bjalo, dinyakišišo di bontšha gore banna gantši ba gana go šoma mošomo wa ka gae. Bontši bja mešomo ye gantši bo phethwa ke basadi, go sa šetšwe gore ba šoma mošomo wa boiphedišo goba go se bjalo.