Sena Mulikatede Kapati?

MUNYIKA yoonse, ikujana ciindi cakulanganya mukwasyi caba cintu cikatazya kapati akaambo kakubeleka. Ibbuku limwi lyaamba kuti, ‘kumvwana kwamasi mumakani aamakwebo, kusumpuka kwaluzyibo lwasayaansi, alimwi amakwebo aacitwa buzuba boonse kwamazuba oonse aali ciloba mumvwiki (ngobati ‘high-pressure, 24/7 economy’) apa bantu kwaalilwa kukkala aŋanda nkaambo lyoonse bali kumilimo.’ Eeci capa bantu kuvwuba citaambiki. Pele alimwi caleta mapenzi. Mulembi umwi waamba kuti: “Bunji bwesu tubeleka mawoola manji kapati, tupegwa milimo minji. Tulikatede kapati.”

Lino alimwi kuli buyumu-yumu akaambo kakuti calino-lino makwebo ayaansi kapati. Munyika yoonse, babelesi banji basweekelwa milimo akubula maanda aakukkala. Ambweni lino balombozya kuti nibakali kubeleka canguzu.

Atubone mpaateene mapenzi aaya:

▶ Mu Europe, babelesi bali cisambomwe akati kababelesi bali kkumi, balityompedwe akaambo kakubeleka kapati.

▶ Mu U.S, akati kababelesi botatwe, kweelede kuba omwe uulimvwa kukatala akaambo kakubelesyegwa kapati.

▶ Mu Canada, akati kababelesi botatwe, bobile balakatazyigwa kujana ciindi cibotu cakuba amikwasyi yabo akaambo kamilimo.

▶ Kwaambwa kuti ibabelesi bainda ku 600,000,000 munyika yoonse, nkokuti 22 pesenti, babeleka mawoola aainda ku 48 amvwiki.

Eeyi myeelwe itondezya kuti bantu bali mumapenzi aataambiki. Buvwuntauzi bumwi butondezya kuti ikubeleka mawoola manji alimwi aaindene-indene kupa bantu kuciswa-ciswa, kutamvwana, kutalela kabotu bana, kwaandaana alimwi akulekana.

Ino mbuti nywebo kumugama? Sena mulalijaya kubeleka? Sena muli akati kazyuulu zyabantu ibatabeleki? Sena mulombozya kujana ciindi ceelede cakubeleka acakulanganya mukwasyi? Ikuti naa mboobo, ino mbuti mbomukonzya kucijana?

[Kabbokesi/Cifwanikiso icili apeeji 19]

“IMULIMO WABILI”

Mukaintu umwi, uujisi mulimo wakumubili waamba kuti: “Ndazwa kuncito ndeelede kujika zilyo zyakumangolezya, kusalazya muŋanda, kuwasya zisani, kuyobolola bana, kubagwasya milimo njobapegwa kucikolo, kubasanzya akubalazika. Eeci cindipa kukatala kapati.” Akati kabamakaintu babalilwa ku 1,200,000,000 ibajisi milimo yakumubili, ibali zyuulu zili mbozibede balakatazigwa “amulimo wabili” ooyu (milimo yaaŋanda njobabeleka bazwa kuncito) mbubwenya mbuli bamaalumi banji. Nokuba boobo, buvwuntauzi butondezya kuti kanji-kanji bamaalumi balakaka kubeleka milimo yaaŋanda. Bunji bwaziindi bamakaintu mbobabeleka milimo eeyi, kufwumbwa naa abalo balabeleka naa pe.